Ирмос: О́троцы евре́йстии в пещи́/ попра́ша пла́мень дерзнове́нно и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.
Преподо́бнии отцы́ Афо́нстии, моли́те Бо́га о нас.
Преподо́бнии отцы́, во Афо́не возсия́вшии, луча́ми доброде́телей и Боже́ственных дарова́ний озаря́ете Го́ру сию́, я́ко зве́зды многосве́тлыя, и Не́бо друго́е ме́сто по́двигов ва́ших показа́сте, разгна́вше лю́тый мрак де́монский. Не преста́йте моля́щеся за ны ко Го́споду.
Преподо́бнии отцы́ Афо́нстии, моли́те Бо́га о нас.
Еди́н от святы́х, иже во Афо́не, показа́ся Ни́фонт Богоно́сный, и́же пти́чим житие́м живя́ше в преде́лех ла́врских/ и проро́ческий дар от Бо́га прия́т.
Преподо́бнии отцы́ Афо́нстии, моли́те Бо́га о нас.
Нил, ла́врский мирото́чец, и Никоди́м, Кавсокали́вский цвет, от Христа́ возлю́блен бы́вый, но́вый му́ченик, в пе́снех и пе́ниих похвали́тася досто́йно.
Пресвята́я Богоро́дице, спаси́ нас.
Богородичен: Ра́дуйся, вся́ких даро́в рабо́м Твои́м Всеще́драя Пода́тельнице; ра́дуйся, во бра́ни, в боле́знех и труде́х их премилосе́рдая Уте́шительнице; ра́дуйся, благоде́нственное житие́ на земли́ и всеблаже́нное на Небеси́ им устроя́ющая; ра́дуйся, наде́ждо и спасе́ние душ на́ших.
Ин канон Преподо́бнии отцы́ Афо́нстии, моли́те Бо́га о нас.
Ка́ко не почту́ в лице́ Боже́ственных отец до́бляго Ники́фора, и́же безмо́лвно живя́ше в преде́лех пусты́нных и духо́вных дарова́ний сподо́бися досто́йно?
Преподо́бнии отцы́ Афо́нстии, моли́те Бо́га о нас.
Па́вел, двух обит́елий кти́тор, Гео́ргиевы и Ксиропота́мския, по́стников добро́та, просия́вый на кончи́не, я́коже друго́е со́лнце, да похва́лится в пе́снех.
Сла́ва Отцу́ и Сы́ну и Свято́му Ду́ху.
Песнь воспева́ю Пахо́мию, Боже́ственней о́трасли Кавсокали́встей, но́вому му́ченику Христо́ву, сугу́бый вене́ц прие́мшему от руки́ Госпо́дни.
И ны́не и при́сно и во ве́ки веко́в. Ами́нь.
Богородичен: Влады́чица ми́ру Ты еси́, Присноде́во, изря́днее же Горы́ сея́ Влады́чица еси́ и Предста́тельница, спаса́ющи сию́ от вся́каго искуше́ния и вре́да.