Кто тебе по достоянию ублажити может, Пресвятая Дево? Кая уста воспети Твоя величие, всяк смысл превосходящее, возмогут? Вся преславная от Тебе содеянная таинства, Богородице, выше смысла и слова суть. Красоте девства Твоего и пресветлей чистоте Твоей удивишася Херувими и ужасошася Серафими: чудесе же рождества Твоего нетаеннаго ни человеческий, ни ангельский язык изрещи может. От Тебе бо безлетный и Единородный Сын Божий, Бог Слово, неизреченно воплощься, родися и с человеки поживе, и Тя, яко Матерь Свою, зело возвеличи, Царицу Тя всея твари показа, нам же известное спасения пристанище. Темже вси под кров Твой притекающии, различными скорбьми и болезньми одержимии, богатное утешение и исцеление приемлют и Тобою от бед спасаются: Ты бо еси воистину Мати всех скорбящих и обремененных, печальных радость, больных Целительница, юных Хранительница, старости жезл, праведных похвала, грешных спасения надежда и к покаянию Путеводительница: всем бо всегда предстательством Твоим помогаеши, и всех с верою и любовию к Тебе прибегающих заступаеши. Ты и мне помози, отчаянному деяний моих ради. Заступнице усердная рода христианскаго, заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота: не остави убо мене и не презри мя, но, имиже Сама веси судьбами, спаси мя, яко благословена еси во веки веков.