О всесвятый и великий угодниче Христов, Иоанне Златоусте, началопа́стыря и архиере́а великаго, небеса прошедшаго, Господа нашего Иисуса Христа ученичѐ, ри́торе богоискусный и премудрый, обидимым великий заступниче и предстателю, больных немздоприе́мный целе́бниче, грешников ко спасению и покаянию истинный наставниче, нищих питателю, вдова́м и сирым помощниче и о всех теплый молитвенниче! Молим тя ныне, грешнии и недостойнии: моли о нас щедролюбиваго Бога, да подаст нам благодать Святаго Духа ко укреплению не́мощей наших, яко зело преогорчи́хом безмерную Его благость безчисленными нашими грехи, завистию, гордостию, гневом, братоненави́дением и иными грехѝ, и́хже и исчестѝ несть возможно: и уже не смеем на небо возвести очеса наша и призвати имя святое Его. Темже к тебе припадаем, молящеся со слезами: тебе бо дадеся от Бога молитися за ны. Подаждь убо ми, паче всех гре́шнейшему, руку твоея̀ помощи, понеже изнемо́же во мне крепость моя, и живот мой даже до ада прибли́жися, и весь сокруши́хся, яко скуде́ль, о камень отчаяния. Ускори, о архиере́ю великий, на помощь мою, и расто́ргни узы печали моея̀ святыми твоими молитвами, и подаждь ми лечьбу̀ покаяния: разженѝ о́блак темный страстей моих, посети мя милостию твоею, и неплодную душу мою благоплодну сотвори. Ты веси, о архиере́ю Божий, святе Иоанне Златоусте, горесть сердца моего: темже по благодати, тебе да́нней от Бога, потщи́ся преложити ю̀ на сладость всесильным твоим к Богу хода́тайством: можеши бо, яще восхо́щеши, помощѝ мне окая́нному, грешному, хульнику, распина́телем о́бщнику: несть бо грех, побежда́яй человеколюбие Божие, яко хоте́нием не хо́щет смерти грешника, но милостивно ожидает его покаяния и обращения. Бу́ди убо подо́бник Влады́це Христу, иже и блудницы слез не презрѐ: сице и ты, о трубо благогласная, и моего воздыхания не пре́зри, но возгремѝ ко мне гласом радования, и исполни недоста́точество мое и скудость от неоску́дных твоих сокровищ: бу́ди ми пастырь добрый, дале́че отгоняя от менѐ мы́сленныя волки жезло́м святых твоих молитв: направи стопы̀ моя тещѝ непреткнове́нно путем заповедей Господних: да достигну и а́з па́жити райския, иде́же есть Источник жизни и непрестанное веселие, и радость, и сладкий глас а́нгельскаго пения: еже да сподобимся вся мы получити, благодатию и человеколюбием Господа и Бога и Спаса нашего Иисуса Христа, Ему́же да будет от нас всякая слава, честь и поклонение, со Отцем и Святым Духом, ныне и присно и во веки веков.