О преблаженне Васи́лие! Ты, на высоту добродетелей восше́д, к Богу прибли́жился еси, и яко пресветлая звезда житием твоим возсия́в, всю страну нашу просветил еси, и любовь родительскую оставив, Единаго в Троице славимаго Бога возлюбил еси, и Тому невозвра́тным желанием последовав, и по апостолу юродственное жительство избрав, мiра сего кра́сная ни во чтоже вменил еси. Молим убо тя, преблаженне Василие: молися Владыце Христу Богу нашему, и испроси молитвами твоими благочести́вейшему, самодержа́внейшему, вели́кому госуда́рю нашему, императору Николаю Александровичу всея России, и всему царствующему дому здравие и спасение, и победы на вся язы́ки, бра́ни хотящыя. Святейшему правительствующему Синоду, и преосвященнейшему владыце нашему имярек, всем преосвященным митрополитом, архиепископом и епископом, архимандритом и игуменом, и всему священному и монашескому чину испроси душевное и телесное здравие, и царствующым градо́м нашым, и сему граду, и святей обители сей утверждение, и мiру всему умире́ние. Еще же и веру нашу непорочну молитвами твоими соблюди, от глада и па́губы избави нас и от нападения иноплеменных сохрани, старыя уте́ши, юныя наста́ви, безумныя умудрѝ, вдовицы и сироты помилуй, младенцы воспитай, и творящыя святую память твою люди сия сохрани от всяких бед и напастей. И сподоби ны̀ грешныя в день судный одесную Сына Божия ста́ти, твоими святыми молитвами ко Спасу и Пречистей Его Матери, Преблагословенней Владычце нашей Богородице, от всех родов ублажа́емей ныне и присно и во веки веков.