О преподобне и преблаженне отче наш Никандре, горняго Иерусалима гражданине, избранных во́ев небесных друже и споборниче, прославляяй непрестанно триипоста́снаго Бога! Воззри милостивно на ны, раце честных мощей твоих предстоящыя, аще и ко сластем века сего пригвожде́нныя помыслы своими, яже ко взысканию блаженств горних обрати. Ты вселяешися во обителех небесных с премiрными ду́хи Церкве торжествующия: мы же грешнии, в мiре сем пребывающии, отстоим от тебе не толико местом, елико грехми и беззаконьми, имиже прогневляем по всяк час Господа и саме́х себе приводим на пагубу. Но к тебе, яко нам соестественному, прибегаем и взываем с теплыми слезами: настави и вразуми нас ходити по стопам твоим: буди на пути сем избранный вождь нам, якоже древле Моисей бяше людем Израилевым: свойственно бо есть тебе, отче наш, сострадание к скорбящым и человеколюбие ко всем, от тебе помощи в напастех и во благовремении требующым: живущу бо тебе на земли, не о твоем токмо спасении тщание твое приложися, но и о всех к тебе притекающих моление ко Всевышнему приносил еси, да не презрит дело рук Своих, ниже погубит ѐ со беззаконьми его. Сего ради отеческая наставления твоя, еже ходити по стопам заповедей Господних, прозябоша в сердцах сынов твоих, яко семя доброе, с плодоношением: таже и недужнии, разсла́бленнии же и боля́щии, скорбя́щии и озло́бленнии скорую твою помощь со славословием проповедают: и все житие твое бысть зерцало всяких добродетелей. Аще толи́к был еси, ученичѐ Христов, на земли: коли́к ныне еси на небеси! Ты всегда предстоиши престолу неприступнаго Бога, и в Нем, якоже в зерца́ле, зриши вся нашя нужды и прошения: ты свеселишися со Ангелы Божиими о едином гре́шнице кающемся, радостию велиею: и милосердие Божие, и любы Его к роду человеческому неоскудны, и твое дерзновение к Нему много. Испроси убо у Всемилостиваго Подателя всех благ мир и святыню Церкви Его, по знамением Креста во́инствующей, на невидимыя враги ея̀ победу и одоление, верным же в вере единомыслие: такожде и заблуждшыя от православия к познанию истины призови, неверныя светом Евангелия просвети, грешныя к покаянию приведи и обрати, девствующым чистоту и целомудрие даруй, брачным святыню: вдовицам и сирым буди препитание, нищым покров, странствующым возвращение, плавающым пристанище: кающымся прощение испросѝ, плачущым утешение, требующым помощь, напаствуемым заступление, болящым скорое исцеление, и всякому прошению во благих исполнгение. Не отри́ни нас, преподобне, с верою и любовию тебе призывающих! Аще бо и недостойни есмы толи́каго отца и хода́тая, оскверне́ни душею и телесе суще: но ты, быв подражатель человеколюбия Божия, соделай нас твоими молитвами достойны чрез покаяние. Новград и Псков, и вся Россиа, просвещенная твоим богоугодным житием и чудесы, проповедуют тя быти теплаго заступника. Яви убо и нам недостойным милости твоя! Веруем, яко духом нам соприсутствуеши, паче же и телом с нами пребываеши: се бо предлежат очесем нашым нетленныя и цельбоносныя твоя мощи, яже явлением многих чудес Господь прослави. Темже, предстояще нам, яко жи́ву тебѐ су́щу, припа́даем и смиренно молим: приими моления наша и вознеси я на жертвенник милосердия Божия, яко да низпослет нам всесильную благодать Свою, укрепляющую нас во благом житии, и благовременную и неоскудную в ну́ждах наших помощь: ума благопостояние, телесем здравие, житию благопотребная, мир во дне́х наших, возду́ха благорастворение, огнь любве и всякаго благочестия, в молитве чистоту сердечную, в злоключении терпение и упование, в надежде веселие, и время на покаяние, яко да и настоящих зол избе́гше, удостоимся пресели́тися во блаженныя обители небесныя, идеже ты ныне вселяешися со всеми Богу угодившими и прославляеши триипостаснаго Бога, Отца и Сына и Святаго Духа, ныне и присно и во веки веков.