О великий страстотерпче Христов и чудотворче, великомучениче Никито! Припадающе ко святому и чудотворному образу твоему, подвиги же и чудеса твоя и многое сострадание твое к людем прославляюще, молим тя прилежно: яви нам смиренным и грешным святое и многомощное твое заступление. Се бо, грех ради наших, не имамы свободы чад Божиих, еже о потребах наших Господа и Владыку нашего дерзновенно просити: но тебе молитвенника к Нему благоприятнаго предлагаем и о твоем предстательстве взываем: испроси нам у Господа благопотребныя да́ры душам и телесем нашым: веру правую, надежду несомненную, любовь же ко всем нелицемерную, во искушениих мужество, в злостраданиих терпение, в молитвах постоянство, душ и телес здравие, земли плодоносие, возду́ха благорастворе́ние, житейских потреб довольство, мирное и благочестное на земли житие, христианскую жития кончину и добрый ответ на Страшнем Суде Христове. Еще же, о страстотерпче Христов, у Царя Небеснаго испроси благочестивейшему царю нашему мир, здравие и спасение и на враги победу и одоление, всему же богохранимому царству его благоустроение, тишину и благоденствие. Христолюбивому воинству его буди сора́тай и помощник на враги, и всем людем православным яви твое святое заступление: болящыя исцели, скорбящыя уте́ши, бедствующым помозѝ. Ей, угодниче Божий и мучениче долготерпеливе! Не забуди святую обитель твою и вся живущыя в ней и подвизающыяся инокини же и мiрския, но поспеши им во смирении и терпении носити иго Христово, и от всяких бед и искушений милостивне избави. Всех убо нас приведи в тихое пристанище спасения, и наследники сподоби быти Пресветлаго Царствия Христова святыми твоими молитвами: да славим и поем великия щедроты Отца и Сына и Святаго Духа, в Троице славимаго и покланяемаго Бога, и твое святое заступление, во веки веков.