О священная главо̀, преподобне и богоносне отче наш Се́ргие, молитвою твоею, и верою и любовию яже к Богу, и чистотою сердца, еще на земли во обитель Пресвятыя Троицы душу твою устро́ивый, и ангельскаго общения и Пресвятыя Богородицы посещения сподо́бивыйся, и дар чудодейственныя благодати прие́мый, по отшествии же твоем от земных наипаче к Богу прибли́живыйся и небесныя силы приобщи́выйся, но и от нас духом любвѐ твоея̀ не отступивый, и честны́я твоя мощи, яко сосуд благодати полный и преизлива́ющийся, нам оставивый! Велие имея дерзновение ко Всемилостивому Владыце, моли спасти рабы Его, сущей в тебе благодати Его верующыя и к тебе с любовию притекающыя. Помози благочести́вейшему, самодержа́внейшему, великому государю нашему, императору Николаю Александровичу всея России, да благоуправля́емо будет царство его в мире и благостоя́нии, и да покоря́тся под ноги его вси сопроти́внии. Испроси нам от Великодаровитаго Бога нашего всякий дар, всем и коему́ждо благопотре́бен, веры непоро́чны соблюдение, градов наших утверждение, мiра умирение, от глада и пагубы избавление, от нашествия иноплеменных сохранение, скорбящым утешение, неду́гующым исцеление, падшым возставление, заблужда́ющым на путь истины и спасения возвращение, подвизающымся укрепление, благоде́лающым в де́лех благих преспеяние и благословение, младенцем воспитание, юным наставление, неведующым вразумление, сирота́м и вдови́цам заступление, отходящым от сего временнаго жития к вечному благое уготовле́ние и напутствие, отшедшым блаженное упокоение, и вся ны споспешеству́ющими твоими молитвами сподо́би в день Страшнаго Суда шуия части изба́витися, десны́я же страны̀ о́бщники быти и блаженный о́ный глас Владыки Христа услы́шати: прииди́те, благослове́ннии Отца Моего, наследуйте угото́ванное вам Царствие от сложения мiра.