О преблаженный и великий угодниче Христов, святый праведный Иси́доре! Восхваляя равноа́нгельное житие твое и преславная от честны́х мощей твоих истека́ющая чудеса̀ прославляя, ко святому гробу твоему припа́даю смиренно и во умилении зову: радуйся, пресветлая звездо̀, от запада прите́кшая и на восто́це просия́вшая: радуйся, отри́нувый правове́рие, уставы же православия до конца соблюды́й: радуйся, бы́вый яко бу́ий пред очи́ма мiра греховнаго, Божия же премудрости некрадо́мое сокровище стяжавый: радуйся, су́етная и тле́нная поправый, да восприи́меши венец нетления: радуйся, терпением древнему Иову уподо́бивыйся: радуйся, воине Христов непобедимый, до́блестно диавола победи́вый и вся стрелы лукаваго разжже́нныя угаси́вый: радуйся, многия и дивныя цельбы от святаго гроба твоего источаяй: радуйся, смиренному́дрием богатеяй и чистоты сосуд избра́н яви́выйся: радуйся, с верою призыва́ющым тя скорый помощниче и заступниче: радуйся, яко течение до́бре скончал еси, и веру непорочну соблю́л еси, и враги безплотныя терпением твоим попра́л еси, и мiрская су́етства препобеди́л еси. Сего ради и святая твоя чистая душа на небеса востечѐ радующися, праведных же ли́цы срето́ша тя веселящеся, и небесная селения светло восприя́ша: блаженное же и честно́е тело твое на землѝ пребывает нетленно, верным исцеления подая̀. Темже молим тя, богомудре Исидоре, да хода́тайствуеши о нас у Христа Бога, еже пребы́ти граду сему непоколеби́му и безмяте́жну, правоверному же императору нашему Николаю Александровичу на супоста́ты победу и одоление дарова́ти, и всем православным христианом здравие и благопоспешение пода́ти, да сподобимся вси милости и благодати Господа нашего Иисуса Христа, Емуже подобает слава и держава, ку́пно со Безначальным Отцем и с Пресвятым и Благим и Животворящим Его Духом, ныне и присно и во веки веков.