О великий угодниче Божий, святителю отче Арсе́ние! Се приносим тебе хвалебное пение мы грешнии и недостойнии, чада твоя, и величаем подвиги и добродетели твоя и многую милость твою ко всем, с верою притекающим ко отеческому твоему покрову. Приими милостивно молитву веры и любве нашея, и принеси ю Вседержителю Богу, от Негоже низходит всякое даяние благо и всякий дар совершенный: и якоже благодетельствовал еси в земнем житии твоем всем искавшым твоея помощи, тако и ныне не лиши нас, отче благосердый, твоего пред Богом многомощнаго заступления. Се бо нетленныя и многоцелебныя мощи твоя дарова нам Господь во уверение, яко велие дерзновение имаши к нему и яко много может предстательство твое пред престолом благости Его. Темже не остави нас сирых и безпомощных, но присно поминай нас во святых твоих молитвах. Укрепи нашя стопы твердо и непоколебимо ходити путем заповедей Господних: утверди руки нашя к воздеянию молитвенному и к совершению добрых дел: согрей сердца наша любовию ко Господу и к жизни вечней. Испроси у Царя Небеснаго благочести́вейшему госуда́рю нашему, императору Николаю Александровичу, всея России, и всему царствующему дому долгоденственное и мирное житие, здравие и спасение, граду Тфери и святей обители твоей благостояние и всей стране Российстей милость Божию и сохранение от всякаго зла. Испроси, святителю Божий, и всем, с верою прибегающым к раце святых мощей твоих и имя твое благоговейно призывающым, коемуждо дар благопотребен: недугующым исцеление, бедствующым избавление, печальным утешение, заблуждающым истины познание, грешным исправление, подвизающымся преспеяние и всем вся к жизни временней и вечней потребная, во славу дивнаго во святых Своих Бога, в Троице славимаго и покланяемаго, Отца и Сына и Святаго Духа, ныне и присно и во веки веков.