А҆́гг҃лъ предста́тель съ нб҃сѐ по́сланъ бы́сть, рещѝ бцⷣѣ: ра́дꙋйсѧ! и҆ со безпло́тнымъ гла́сомъ воплоща́ема тѧ̀ зрѧ̀ гдⷭ҇и, ѹ҆жаса́шесѧ и҆ стоѧ́ше, зовы́й къ не́й такѡва́ѧ:
Ра́дꙋйсѧ, є҆́юже ра́дость возсїѧ́етъ:
Ра́дꙋйсѧ, є҆́юже клѧ́тва и҆сче́знетъ.
Ра́дꙋйсѧ, па́дшагѡ а҆да́ма воззва́нїе:
Ра́дꙋйсѧ, сле́зъ є҆́ѵиныхъ и҆збавле́нїе.
Ра́дꙋйсѧ, высото̀ неꙋдобовосходи́маѧ человѣ́ческими по́мыслы:
Ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма.
Ра́дꙋйсѧ, ꙗ҆́кѡ є҆сѝ цр҃е́во сѣда́лище:
Ра́дꙋйсѧ, ꙗ҆́кѡ но́сиши носѧ́щаго всѧ̑.
Ра́дꙋйсѧ, ѕвѣздо̀ ꙗ҆влѧ́ющаѧ сл҃нце:
Ра́дꙋйсѧ, ѹ҆тро́бо бжⷭ҇твеннагѡ воплоще́нїѧ.
Ра́дꙋйсѧ, є҆́юже ѡ҆бновлѧ́етсѧ тва́рь:
Ра́дꙋйсѧ, є҆́юже покланѧ́емсѧ творцꙋ̀.
Ра́дꙋйсѧ, невёсто неневѣ́стнаѧ.