Богосве́тлою звездо́ю на небе́си церко́внем яви́лся еси, пресла́вне о́тче Силуа́не, доброде́тельми сия́я а́ки луча́ми светоза́рными, мра́к уны́ния и отча́яния си́лою моли́твы отгоня́я и злы́х духо́в благода́тию бо́жиею низлага́я. Ты́ бо ду́шу свою слеза́ми вели́кими омы́вый, восприя́л еси свы́ше благода́ть хода́тайствовати о все́х лю́дех, взыва́я: Го́споди, посли ми́лость свою на де́ти земли, ихже лю́биши, и все́м им да́ждь разуме́ти любо́вь твою и позна́ти сла́ву твою Ду́хом Святы́м. и ны́не, предстоя престо́лу Бо́жию, преподо́бне о́тче Силуа́не, да́ждь на́м утеше́ние в ско́рбех, да согре́ются ра́достию печальная сердца люде́й и да позна́ют они любо́вь Бо́жию, воспева́юще ему пе́снь: аллилу́иа.