Слы́ша госпо́дь твоя воздыха́ния от тя́жких искуше́ний диа́вольских, дарова́ ти разуме́ти, ка́ко противоста́ти лю́тым ко́знем вра́жиим: мно́зи бо бе́си напо́лниша ке́лию твою, не терпя́ще твоея ре́вности о непреста́нней моли́тве и богомы́слии, и страхова́ньми хотя́ху в ми́р тя возврати́ти. тогда са́м госпо́дь откры тебе та́йну жи́зни в ду́се, глаго́ля: держи у́м тво́й во а́де и не отча́явайся. Сие́ бо е́сть ору́жие на диа́вола непобеди́мое, стра́сти попаля́ющее и све́том смире́ния Христо́ва озаря́ющее. те́мже и мы, сие пра́вило прии́мше, бла́года́рно вопие́м си́це:
Ра́дуйся, зла́то, о́гнем искуше́ний очище́нное:
ра́дуйся, кади́ло, покая́нным пла́менем возжже́нное.
Ра́дуйся, я́ко в богооста́вленности ду́шу твою сугу́бо испыта́л еси:
ра́дуйся, я́ко ве́рою и пла́чем та́йным отча́яние души твоея победи́л еси.
Ра́дуйся, посто́м и моли́твою стрелы лука́ваго до конца отрази́вый:
ра́дуйся, му́жество ве́лие в борьбе с духа́ми зло́бы яви́вый.
Ра́дуйся, вся ко́зни диа́вола смиренному́дренно попра́вый:
ра́дуйся, злоухищре́ния его побежда́ти и на́с научи́вый.
Ра́дуйся, бла́го́е и́го Христо́во в по́двизе твое́м с любо́вию носи́вый:
ра́дуйся, я́ко за все́х нераска́янных гре́шников во а́д сни́ти жела́л еси.
Ра́дуйся, у́м тво́й, се́рдце и во́лю в Бо́зе моли́твенно утверди́вый:
ра́дуйся, таи́нниче Бо́жий, еще на земли небе́сных вкуси́вый.
Ра́дуйся, преподо́бне Силуа́не, пропове́дниче любви ко враго́м и наста́вниче смире́нию и моли́тве.