О преподобне и богоносне отче наш Ио́но! Ты, куплю житейскую еще совершая и по вода́м е́зера Оне́га плавая бурею на луду водну́ю извержен был еси, и на бре́зех сих тихое пристанище от волнений житейских обрел еси. Темже и неленостно во трудех, молитвах и слезах Господа ради подвизаяся, ку́плю духовную добре совершил еси, и купец премудр Царствия Небеснаго явился еси, и ныне во дво́рех небесных весели́шися, ду́хом твоим неотсту́пен от оби́тели Кли́меницкия пребывая, идеже многотрудное твое тело почи́ет. Темже и плавающым по водам онежским путь указуеши и от потопления воднаго избавляеши многажды чудесне призывающым тя являяся, и всем скорый помощник и теплый молитвенник бываеши. И ныне к раце мощей твоих смиренно припа́дающе, прилежно молим тя, угодниче Божий: призри на ны окаянныя и непотребныя, морем грехов потопляемыя, и бурею душетленных страстей волнуемыя, и с кораблем душетленным на луде злых обычаев сокрушаемыя. Буди о нас хода́тай ко Господу, к Немуже дерзновение доброе стяжал еси: пролей к Нему теплую молитву твою, да ути́шит бурю страстей наших, и хла́дная сердца наша огнем Божественныя любве Своея да согреет, и тако да сподобит нас теплое покаяние ему приносити, оста́нок же дней наших благоугодне пред Ним пожити, труды же и скорби жития сего терпеливно, безро́потне и со благодарением понестѝ: егда̀ же приспе́ет страшный час исхода нашего от сего жития, да поможет нам грозная мытарства воздушная неудержа́нно миновати, нижѐ рыка́ющым мысленным львом душы нашя поглоти́ти да попустит, но бездну грехов наших в мо́ри милосердия Своего да погрузит, и ради Своея неизрече́нныя любвѐ и милости в роду человеческому нас да помилует, причастники Своего Царствия соде́лав, и да сподобит тамо наслаждатися Его Божественною любовию, купно с тобою и со всеми святыми, во веки веков.