Святии и праведнии Иоа́нне и Ло́ггине, угодницы Христовы и чудотворцы пресла́внии! Вы в постничестве и в де́лех благочестия на земли подвизавшеся, Богу угоди́сте, таже яко два свети́ла све́тлая по смерти в мiре просия́ли естѐ, и верныя вся чудесы вашими аки све́тлою луче́ю просвещаете. Темже заступницы наши теплии на небеси показастеся, и ныне многи в скорбех сущыя, и в бедах страждущыя, и поги́бнути имущыя, здра́вы сохраняете молитвами вашими. И якоже прежде, дерзостне мощей ваших коснувшыяся внеза́пу отри́нувши и разслабле́нием наказавше, прикосновением святых моще́й ты́я помиловасте, та́ко и до днесь предивная чудеса во всем мiре от места положения многоцелебных моще́й ваших соде́ловаете. Сего ради во святый храм ваш приходя́щии людие мо́лятся, ко святым мощем вашым со благоговением и страхом Божиим припа́дающе, и просят получити здравие душам и телесе́м своим. Ныне убо, о преблаже́ннии угодницы Христовы и чудотворцы преславнии Иоа́нне и Ло́ггине, услы́шите моление нас грешных, с верою вас призывающих: бу́дите нам помо́щницы ско́рии и покрови́телие тепле́йшии в путешествии и в мореплавании и в домо́внем пребывании: и вся православныя христианы молитвами вашими освяти́те, в мире и тишине соблюдите, изоби́лием всяцем снабдите, и во всем благом жизнь сию препроводи́ти предста́тельствы вашими к Богу сподо́бите: да та́ко, молитвами вашими грехом нашым прощение получи́вше, Царствия Небеснаго причастницы быти сподо́бимся, благодатию и человеколюбием Бога нашего, Емуже подобает всякая слава, честь и поклонение, ныне и присно и во веки веков.