К вам, святии безсребреницы и чудотворцы Космо̀ и Дамиа́не, яко к скорым помощником и теплым молитвеником о спасении нашем, мы недостойнии прибегаем, и припа́дающе усердно вопием: не пре́зрите моления нас грешных, немощны́х, во многая беззакония впа́дших и по вся дни и часы согреша́ющих. Умоли́те Господа, да проба́вит нам, недостойным рабом Своим, великия и богатыя Своя милости: изба́вите нас от всякия скорби и болезни, занѐ неоскудную благодать исцелений от Господа и Спаса нашего Иисуса Христа прияли естѐ, твердыя ради веры вашея и мученическия ради кончины. Услышите убо нас молящихся, и благоприятным хода́тайством вашим испросите у Христа Бога благочести́вейшему, самодержа́внейшему, вели́кому госуда́рю нашему, императору Николаю Александровичу здра́вие и спасение, на врагѝ побе́ду и одоле́ние, и всему царствующему дому Божие благословение. Таже и всем нам от Господа вся благополезная в житии нашем вре́меннем, наипа́че же ко спасению вечному належащая испроси́ти, да сподобимся молитвами вашими кончину христианскую безболезнену, непосты́дну и ми́рну улучи́ти и да избавимся от козней диавольских и вечныя муки, безконечнаго же и блаженнаго Царствия Небеснаго наследницы да будем. Ей, угодницы Божии! не преста́йте молящеся за ны, с верою к вам притекающыя: аще бо по множеству грехов наших и не́смы досто́йни милосердия вашего, оба́че, вернии подражателие человеколюбия Божия су́ще, сотворите молитвами вашими, да плоды̀ достойны покаяния принося́ще, в вечный покой дости́гнем, хваляще и благословяще дивнаго во святых Своих Господа Бога и Спаса нашего Иисуса Христа, и Пречистую Матерь Его, и ваше теплое заступление, всегда, ныне и присно и во веки веков.