Но́вый Сио́н яви́ся Свята́я Гора́ Афо́нская, в не́йже от восто́ка, се́вера и ю́га приидо́ша ча́да духо́вная, благословля́ющая в ней Го́спода в пе́снех хвале́бных: се бо собо́р богосве́тлый преподо́бных оте́ц, во Афо́не свя́то пожи́вших, созыва́ет нас днесь че́ствовати их по́двиги и труды́ и вопи́ти к ним си́це:
Ра́дуйтеся, вели́ции уго́дницы Бо́жии, вели́чием по́двигов ва́ших А́нгелов удиви́вшии.
Ра́дуйтеся, пресла́внии чудотво́рцы, в беда́х и ско́рбех челове́ком помога́ющии.
Ра́дуйтеся, пусты́ни Афо́на благода́тная прозябе́ния.
Ра́дуйтеся, святы́я Правосла́вныя Це́ркве духо́вная красото́ и ра́дование.
Ра́дуйтеся, ра́дости нам и сла́вы ве́чныя усе́рднии хода́таи.
Ра́дуйтеся, во благи́х жела́ний на́ших ско́рии исполни́телие.
Ра́дуйтеся, преподо́бнии отцы́ Афо́нстии, усе́рднии о душа́х на́ших моли́твенницы.