Пою́ще твоя многострадальныя труды и по́двиги, нощная бдения и боре́ния, у́мное моле́ние и ду́хо́вное трезве́ние, я́же со все́ми избра́нниками Бо́жия Ма́тере и́ноками свя́того́рцами поне́сл еси, восхваля́ем тя, преподо́бне о́тче Силуа́не, и вку́пе с и́ноки афо́нскими сла́вим и́мя твое свя́то́е, тя́ бо увенча Госпо́дь в ца́рствии Небе́снем, иде́же угото́вано ме́сто все́м лю́бящим Христа́ Бо́га на́шего. Те́мже убла́жа́ем тя, небе́снаго засту́пника и предста́теля на́шего пе́сньми таковы́ми:
Ра́дуйся, цве́те бла́гоуха́нный, в вертогра́де Пресвя́ты́я Богоро́дицы процве́тший:
ра́дуйся, любо́вию кре́пкою с земле́ю е́ллинскою соедини́выйся.
Ра́дуйся, на горе афо́нстей Святы́я Руси посла́нниче:
ра́дуйся, о все́й земли росси́йстей неусы́пный моли́твенниче.
Ра́дуйся, за отчи́зну свою во времена смутная усе́рдный предста́телю:
ра́дуйся, росси́йския страны ду́хо́вное украше́ние.
Ра́дуйся, святы́нею свое́ю оби́тель Пантелеи́монову обогати́вый:
ра́дуйся, я́ко честна́я глава твоя исто́чник мно́гих исцеле́ний яви́ся.
Ра́дуйся, но́вое свети́ло горы афо́нския:
ра́дуйся, наста́вниче мона́хов и собесе́дниче а́нгелов.
Ра́дуйся, к ли́ку преподо́бных на небе́си сопричте́нный:
ра́дуйся, я́ко со все́ми святы́ми ны́не торжеству́еши.
Ра́дуйся, преподо́бне Силуа́не, пропове́дниче любви ко враго́м и наста́вниче смире́нию и моли́тве.