О священная главо̀, предивный чудотворче, преподобне и богоносне отче наш Дими́трие! Усердно припа́дающе к тебе, молимся: яви нам смиренным и грешным многомо́щное твое заступление. Се бо грех ради наших не и́мамы дерзновения ко Господу, проси́ти Его даро́в нам благопотре́бных, но тебе молитвенника к Нему благоприятнаго предлагаем, и просим: умолѝ нам от Его благости вся, яже на пользу душа́м и телесе́м нашым: веру праву, надежду несомне́нну, любовь нелицеме́рну, во искушениих мужество, в злострада́ниих терпение, в молитвах постоянство, во благочестии преуспея́ние, вожделенное здравие, земли плодоносие, возду́ха благорастворе́ние, дожди благовре́менны, житейских потре́б дово́льство, мир во днех наших и благословение свыше на вся благая дела и начинания наша, и да не во зло обрати́м да́ры Его, но во славу имени Его свята́го и в прославление твоего о нас хода́тайства. Испросѝ, угодниче Христов, у Царя царствующих и Господа господствующих, благочести́вейшему, самодержа́внейшему, вели́кому госуда́рю нашему, императору Николаю Александровичу всея Россиии здравие, долгоденствие, на врагѝ же победу и одоле́ние, и всему богохранимому царству его тишину и благострое́ние. Не забу́ди, чудотворче святы́й, милостивно присеща́ти град твой и обитель твою и вся гра́ды и ве́си страны̀ нашея православныя, сохраняя и соблюдая их молитвами твоими от всякаго зла. Помянѝ всех, веру и любовь к тебе иму́щих, имя твое милостивно призывающих и на поклонение моще́м твоим святым приходящих, и вся во благи́х прошения их милостивно испо́лни, осеняя их свы́ше святооте́ческим твоим благословением. Ей, святче Божий! не лишѝ и нас грешных твоего многомо́щнаго заступления, но сподо́би нас кончину жития благу́ю улучи́ти и Царствие Небесное унасле́довати, да воспое́м и прославим ди́внаго во святых Своих Бога нашего, Отца и Сына и Святаго Духа, во веки веков.