О святый страстотерпче, священномучениче Ку́кше, подвиги апостольския совершивый посреде обитания соплеменник твоих, отец наших, ихже ты светом истиннаго богопознания просвещал еси, и по данней ти благодати Духа Святаго бесы прогнавый, дождь с небесѐ своди́вый, е́зеро изсуши́вый и сотвори́вый и́на многа чудеса̀, многострадальный же твой подвиг мученическою кончиною увенча́вый! Приимѝ от нас умиленныя и усердныя молитвы и вознеси я̀ ко престолу Святыя Троицы, идеже ты в ли́це святых предстои́ши, яко да твоим хода́тайством Милостивый Господь утвердит в мире и славе державу благочестивейшаго государя нашего, императора Николая Александровича, в чадех же святыя Православныя Церкве да укрепит дух веры и благочестия, в пастырех ея ревность к назиданию пасомых да умножит и да при́зрит милостивым оком на люди предстоящыя и прибегающыя ко твоей помощи. Ей, святый угодниче Божий! вемы, яко, ве́лиих ради страданий твоих, много может молитва твоя ко благосердию Владыки. Сего ради, яко чада твоя по вере, к ра́це честны́х и многоцеле́бных моще́й твоих припа́дающе, мо́лим тя духом сокрушенным и смиренным сердцем: не пре́зри молений наших, пред тобою излива́емых, но вознесѝ я̀ ко Всещедрому Богу, я́ко кади́ло благовонное, да твоим хода́тайством при́сно почи́ет благодать Его на граде сем, в немже чтится преславное имя твое, и люди живущии в нем да сохраня́тся от глада, огня, смертоносныя язвы и внезапныя смерти, от всяких бед и напастей. Споспе́шествуй, священномучениче Ку́кше, святыми твоими молитвами честно́му братству святаго храма твоего, да приумножится сие и процветает во славу Триединаго Бога, в похвалу твоего и́мене и во благо святыя Православныя Церкве, да тако всѝ, охраня́еми твоим предстательством, мирно и благочестно по́прище жития̀ сего пре́йдем, сла́вяще и благодаря́ще Единаго Истиннаго Бога, во Святей Троице славимаго, Отца и Сына и Святаго Духа, во веки веков.