Преподобне отче наш Антоние! Ты от юности твоея путем креста шествовати возлюбил еси, в молитвах и трудех, в пощениих и бдении и в безмолвии на всякий день и час неусыпно подвиза́яся и верный образ вруче́нней тебе от Господа братии бывая: темже и всего себе в жертву живу, святу и благоугодну Ему принес, толиких чудес дарования от Него сподобился еси, яко и стихиям повелева́ти, болезни телесныя и душевныя отгоня́ти, о Церкви и Отечестве нашем во благое призира́ти и промышля́ти. Егда же по кончине твоей и благоустроенное место сие врагов безбожных злодействием разорению и запустению предано бысть, храм же и обитель огнем сожже́ни, и братия мече́м посече́ни бы́ша, ты, велие дерзновение к Царю Небесному имея, паки хода́тайством твоим возсозда́тися храму сему, еще же и моще́м твоим святым, яко сокровищу многоценному, в нем положитися сотворил еси. Темже и мы, с верою стека́ющеся во храм сей и священную ра́ку твою любезно целующе, молим тя, известный наш хода́таю: не престай моляся ко Господу Богу нашему о совершающих память твою, да погасит он росою благодати Своея пламень страстей наших, да укрепит и препоя́шет ны̀ силою Своею свыше на видимыя и невидимыя враги нашя, от всяких недугов душевных и телесных нас избавляя и от всех зол сохраняя: паче же да укрепит и да возвысит благословенное царство помазаннаго Своего, благочести́вейшаго, самодержа́внейшаго императора Николая Александровича, верою и благочестием утверждая, истиною и правдою сие устрояя, изобилием благ и славою венчая, миром же и благостоянием ограждая: да тако мы вси, мирно и безмятежно пребывающе во всяком благочестии и чистоте, вкупе прославим пресвятое имя Отца и Сына и Святаго Духа, и твое милостивное о нас ходатайство, ныне и присно и во веки веков.