Смире́ннꙋю мою̀ дꙋ́шꙋ посѣтѝ гдⷭ҇и, во грѣсѣ́хъ всѐ житїѐ и҆ждившꙋю: и҆́мже ѡ҆́бразомъ блꙋдни́цꙋ, прїимѝ и҆ менѐ, и҆ сп҃си́ мѧ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Всѐ житїѐ моѐ сра́мнѡ и҆жди́хъ, гдⷭ҇и, со блꙋдни́цами ѻ҆каѧ́нный, ꙗ҆́коже блꙋ́дный ѹ҆миле́нїемъ зовꙋ̀: ѻ҆́ч҃е небе́сный, согрѣши́хъ, ѡ҆чи́сти и҆ сп҃си́ мѧ, и҆ не ѿри́ни менѐ, сама́го себѐ ѿ тебѐ ѹ҆дали́вшаго, и҆ безпло́дныхъ ра́ди дѣ́лъ ны́нѣ ѡ҆бнища́вшаго.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Къ бцⷣе прилѣ́жно ны́нѣ притеце́мъ, грѣ́шнїи и҆ смире́ннїи, и҆ припаде́мъ въ покаѧ́нїи зовꙋ́ще и҆з̾ глꙋбины̀ дꙋшѝ: влⷣчце, помозѝ, на ны̀ милосе́рдовавши, потщи́сѧ, погиба́емъ ѿ мно́жества прегрѣше́нїй, не ѿвратѝ твоѧ̀ рабы̑ тщы̀, тѧ̀ бо и҆ є҆ди́нꙋ наде́ждꙋ и҆́мамы. Посе́мъ, Гдⷭ҇и поми́лꙋй, л҃.
Та́же, Прїиди́те, поклони́мсѧ цр҃е́ви на́шемꙋ бг҃ꙋ. [Покло́нъ.]
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ. [Покло́нъ.]
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ. [Покло́нъ.]