Ѡ҆б̾ѧ̑тїѧ ѻ҆́ч҃а ѿве́рсти мѝ потощи́сѧ, блꙋ́дно моѐ и҆жди́хъ житїѐ, на бога́тство неиждива́емое взира́ѧй щедро́тъ твои́хъ, сп҃се: ны́нѣ ѡ҆бнища́вшее моѐ да не пре́зриши се́рдце. тебѣ̀ бо, гдⷭ҇и, ѹ҆миле́нїемъ зовꙋ̀: согрѣши́хъ на не́бо и҆ пред̾ тобо́ю.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Є҆гда̀ прїи́деши бж҃е, на зе́млю со сла́ваю, и҆ трепе́щꙋтъ всѧ́чєскаѧ, рѣка́ же ѻ҆́гненнаѧ пред̾ сꙋди́щемъ влече́тъ, кни̑ги разгиба́ютсѧ, и҆ та̑йнаѧ ꙗ҆влѧ́ютсѧ: тогда̀ и҆зба́ви мѧ̀ ѿ ѻ҆гнѧ̀ неꙋгаси́магѡ, и҆ сподо́би мѧ̀ ѡ҆деснꙋ́ю тебѐ ста́ти, сꙋдїѐ пра́веднейшїй.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ма́терь тѧ̀ бж҃їю вѣ́мы всѝ дѣ́вꙋ вои́стиннꙋ и҆ по рождествѣ̀ ꙗ҆́вльшꙋюсѧ, любо́вїю прибѣга́ющїи къ твое́й бл҃гости: тебѐ бо и҆́мамы грѣ́шнїи предста́тельство, тебѐ стѧжа́хомъ въ напа́стехъ сп҃се́нїе, є҆ди́нꙋ всенепоро́чнꙋю. Посе́мъ, Гдⷭ҇и поми́лꙋй, л҃.
Та́же, Прїиди́те, поклони́мсѧ цр҃е́ви на́шемꙋ бг҃ꙋ. [Покло́нъ.]
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ. [Покло́нъ.]
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ. [Покло́нъ.]