Прежде отвержением мiра, яко морска́го треволнения, избего́сте, отцы преподобнии: по́слежде же изволением Божиим в вода́х морских кончину блаженную прия́сте, и к неболезненному поко́ю преста́вистеся от земли ра́дующеся. Тем и по кончине от Христа Бога просла́вистеся чудесы обильно, те́плии в беда́х верным помощницы [помощники] показа́стеся. И ныне на небесех предстояще престолу Христову, Вассиа́не преблаженне и Ио́но преславне, моли́теся при́сно о душа́х наших.