Аллилу́иа.
Хвали́те, о́троцы, Го́спода, хвали́те и́мя Госпо́дне. Бу́ди и́мя Госпо́дне благослове́нно отны́не и до ве́ка. От восто́к со́лнца до за́пад хва́льно и́мя Госпо́дне. Высо́к над все́ми язы́ки Госпо́дь: над небесы́ сла́ва Его́. Кто я́ко Госпо́дь Бог наш? На высо́ких живы́й и на смире́нныя призира́яй на небеси́ и на земли́, воздвиза́яй от земли́ ни́ща и от гно́ища возвыша́яй убо́га, посади́ти его́ с кня́зи, с кня́зи люде́й свои́х, вселя́я непло́довь в дом ма́терь о ча́дех веселя́щуся.