И҆́нъ мі́ръ тебѐ дꙋшѐ ѡ҆жида́етъ, и҆ сꙋдїѧ̀ хо́щетъ твоѧ̑ ѡ҆бличи́ти та̑йнаѧ и҆ лю̑таѧ. не пребꙋ́ди ѹ҆́бѡ въ здѣ́шнихъ, но предварѝ вопїю́щи сꙋдїѝ: бж҃е, ѡ҆чи́сти мѧ̀, и҆ сп҃си́ мѧ.
Сла́ва: Ꙗ҆́кѡ прегрѣше́ньми мно́гими, и҆ ꙗ҆́звами безмѣ́рными ѡ҆блежи́мь є҆́смь сп҃се, согрѣша́ѧй молю̀ твоѐ бл҃гоꙋтро́бїе хрⷭ҇тѐ: врачꙋ̀ недꙋ́гꙋющихъ посѣтѝ, и҆ и҆сцѣлѝ, и҆ сп҃си́ мѧ.
И҆ ны́нѣ: Дꙋшѐ моѧ̀, что̀ неради́вѡ живе́ши лѣнѧ́щисѧ; что̀ не пече́шисѧ ѡ҆ ѕлы́хъ, и҆̀хже содѣ́ѧла є҆сѝ въ житїѝ; потщи́сѧ и҆спра́витисѧ, пре́жде да́же две́рь не заключи́тъ тебѣ̀ гдⷭ҇ь. бцⷣѣ притецы̀, припадѝ и҆ возопі́й: ѹ҆пова́нїе ненадѣ́емыхъ,
сп҃си́ мѧ, мно́гѡ къ тебѣ̀ прегрѣши́вша, вLчце пречⷭ҇таѧ.
҆҆ Гдⷭ҇и поми́лꙋй, м҃. и҆ мл҃тва:
Гдⷭ҇и ст҃ы́й въ вы́шнихъ живы́й, и҆ всеви́дѧщимъ твои́мъ ѻ҆́комъ призира́ѧй на всю̀ тва́рь, тебѣ̀ приклонѧ́емъ вы́ю дꙋшѝ и҆ тѣлесѐ, и҆ тебѣ̀ мо́лимсѧ ст҃ы́й ст҃ы́хъ: прострѝ рꙋ́кꙋ твою̀ неви́димꙋю ѿ ст҃а́гѡ жили́ща твоегѡ̀, и҆ бл҃гословѝ всѧ̑ ны̀, и҆
простѝ на́мъ всѧ́кое согрѣше́нїе, во́льное же и҆ нево́льное, сло́вомъ, и҆лѝ дѣ́ломъ. да́рꙋй на́мъ гдⷭ҇и ѹ҆миле́нїе, да́рꙋй сле́зы дꙋхѡ́вныѧ ѿ дꙋшѝ, во ѡ҆чище́нїе мно́гихъ на́шихъ грѣхѡ́въ: да́рꙋй ве́лїю твою̀ млⷭ҇ть на мі́ръ тво́й, и҆ на ны̀ недостѡ́йныѧ рабы̑ твоѧ̑: ꙗ҆́кѡ бл҃гослове́нно
и҆ препросла́вленно є҆́сть и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ д¦а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.