О пастырю добрый, наставниче наш, преподобне отче Мартирие! Услыши ныне к тебе приносимое моление наше: ве́мы бо, яко духом с нами пребываеши. Ты убо, преподобне, яко име́яй дерзновение ко Владыце Иисусу Христу, Богу нашему, и ко Пречи́стей Богоматери, буди ходатай и молитвенник теплый о обители сей, ю́же возградил еси, и о нас недостойных рабе́х, живущих в ней, ея́же ты просветитель еси и начальник, богособра́нному же твоему братству помощник и заступник присно являешися: яко да твоим предстательством и молитвами невреди́ми на месте сем пребудем, от бесо́в же и злых человек не наве́товани и от всех бед и напастей свободни сохранимся. Всем же отвсюду приходящым во святую обитель твою и молящымся тебе с верою и покланяющымся ра́це моще́й твоих, во еже изба́витися от всякия скорби, болезни и напасти, милостивне поспешѝ, даровати же православным мир, тишину, благоденствие и изобилие плодов земных: и о всех нас теплый предстатель ко Господу и помощник душа́м нашым буди, еже отпусти́тися нам согрешением нашым и молитвами твоими, святе, изба́витися нам от вечнаго мучения и сподобитися Небеснаго Царствия со всеми святыми, да славу, благодарение и поклонение возсылаем Единому Богу, в Троице славимому, Отцу и Сыну и Святому Духу, ныне и присно и во веки веков.