Угодниче Божий, молитвенниче наш теплый и скорый помощниче, блаженне Макси́ме! Припа́дающе к ра́це мощей твоих, прославляем многотру́дныя подвиги юро́дства твоего Христа ради. Возлюбив бо Единаго Бога от всея души твоея, мирски́ми красота́ми наслаждатися не восхотел еси, любвѐ сродников, богатства и славы временныя отре́клся еси, и безприютное житие возлюбил еси. Прилежав же о спасении души, плоть твою, наготою телесною, мра́зом и зноем, постом и бдением и на земли лежанием изнури́л еси, и вся страсти ея̀ ду́хови покорил еси, на земли небесно, во плоти же духовно пожил. Таже умом весь ко премiрным вземся, плотскую мудрость отри́нул еси, и быв мудр о Христе, юро́д мíрови показался, от неразумных многия обиды и биения благодушно претерпевая и многи нечестивыя на путь спасения наставляя. Темже по скончании твоих подвигов Всеправедный Судия нетлением честны́х твоих моще́й и многими чудесы̀ тя просла́ви, душу же твою святую в небесныя обители всели, иде́же предстоя̀ престолу неприступнаго Божественнаго Света, в Нем, якоже в зерцале, нашя ну́жды зриши, прошения слышиши, и якоже друг Христов, и́маши ве́лие к нему дерзновение молитися о нас. Сего ради усердно просим тя: помоли́ся Господу Богу о нас к земли приве́рженных, да и мы, в подражание твоему ангелоподо́бному на земли житию, в суетных житейских попечениих и в земных наслаждениих ника́коже погря́знем и душею ко тленным мiра сего бла́гом прилепля́тися не де́рзнем. Молися, угодниче Христов, да обратит Господь нашя мысли и желания в небесным и да укрепит будущих нетленных сокровищ жела́ти, да подаст нам силу к побежде́нию страстей, мыслей и желаний греховных, да плени́т наш ум в послуша́ние веры, да избавит от высокоумия, суемудрия, ложных пагубных учений, и мудрость духовную нам да́рует: таже окамене́нная сердца наша слезами умиления и о гресех сокрушения да растворит, и да согреет я̀ к нашему Создателю любовию и братолюбием ко ближним нашым. Молимся тебе, Максиме блаженне: испроси всем, во всякой нужде сущым и ко твоему заступлению прибегающым, всякий дар коемуждо благопотребен: больным исцеление, печальным утешение, бедствующым помощь, обиженным защищение. Принеси ко Господу святую молитву и о всех нас многогрешных, яко да не по грехам нашым возда́ст нам, нижѐ по беззаконием нашым нака́жет нас, но да отвратит всякий гнев, праведно движимый на ны̀, и да проба́вит милость Свою на нас, от всяких нужд, бед, напастей, скорбей и болезней избавляя, и и́миже весть судьбами да наста́вит нас на путь спасе́ния, и прочее время жития нашего в покаянии и благочестии прейтѝ нам да поможет, и да сподобит нас христианскую кончину неболе́знену, непосты́дну и мирну прия́ти и Небеснаго Царствия наследие получи́ти со всеми святыми во веки веков.