Го́споди, просвети́ у́м и се́рдце раба́ Твоего́ сего́ к позна́нию вели́ких, безчи́сленных и неизследимых даро́в Твои́х, и́хже прия́т от неисче́тных щедро́т Твои́х, во ослепле́нии бо стра́сти своея́ забы́ Тебе́ и да́ры Твои́ бога́тыя, и ни́ща себя́ бы́ти вмени́, бога́т сы́й бла́гами Твои́ми, и сего́ ра́ди зри́т преле́стне на блага́я рабо́в Твои́х, и́миже, о пренеизглаголанная Благосты́ня, уще́дриши все́х, коего́ждо проти́ву си́лы его́ и по наме́рению во́ли Твоея́. Отъими́, всеблаги́й Влады́ко, покрыва́ло диа́вола от о́чию се́рдца раба́ Твоего́ и да́руй ему́ серде́чное сокруше́ние и сле́зу покая́ния и благодаре́ния, да не возра́дуется вра́г о не́м, за́живо уловленном от него́ в свою́ его́ во́лю и да не исто́ргнет его́ от руки́ Твоея́.
* * *