О великий уго́дниче Христов, добропроизво́льный страда́льче, новопросия́вый чудесы̀, отче наш Ирина́рше, Российстей земли удобрение, граду Ростову похвало̀, обители сей украшение и утверждение! Кто не удиви́тся твоему самопроизво́льному и долголе́тнему страда́льческому терпению? Три́десять бо лет в тесней и хла́дней хижине себе заключи́л еси, хла́д, а́лчбу и изнуре́ние плоти Царствия ради Небеснаго поне́сл еси, к сему же и изгнание из обители, по наваждению вражию, безро́потно претерпел еси. Ве́мы же, яко последѝ умоле́н быв от братии, яко незло́бивый а́гнец, па́ки во обитель твою возврати́лся еси, и в ту́южде тесную хижину всели́лся еси, яко адама́нт твердый, на невидимая бесовская по́лчища и видимыя враги твоя терпением себе вооружи́в. Егда̀ же попуще́нием Божиим наидо́ша на обитель сию По́льстии ра́тницы, сих не убоялся еси смертнаго преще́ния, но уцелому́дрив я̀ словом, во своя си возврати́тися сотворил еси. Сего ра́ди Всеблагий Бог, видя твою веру и страдальческое долготерпение, дар прозорли́вства и исцеления тебе дарова̀: бесны́м во исцеление, хромы́м доброхожде́ние, слепым прозрение подавал еси, и ина́я многая с верою к тебе приходя́щым во благо даже до дне́сь чудоде́йствуеши. Мы же недостойнии, такова́я чудеса̀ ви́дяще и радости исполня́ющеся, взыва́ем к тебе си́це: радуйся, до́блественный страдальче и бесо́в победителю: радуйся, скорый наш помощниче и к Богу теплый моли́твенниче. Услы́ши убо и нас грешных, моля́щихся тебе и прибега́ющих под кров твой: явѝ милостивное предста́тельство твое о нас ко Всевышнему, и исхода́тайствуй твоими богоприятными молитвами вся полезная ко спасению душ и теле́с наших: сохранѝ святую обитель сию, вся́кий град и весь и всякую страну христиа́нскую от всех наве́т вражиих: в ско́рбех же и болезнех наших подава́й нам руку помощи, да твоим хода́тайством и заступлением, благодатию же и милосердием Христа Бога нашего, изба́вимся и мы недостойнии, по отше́ствии от жития сего, шу́ияго стояния, и да сподобимся десна́го со всеми святыми во веки веков.