О великий Христов угодниче, святителю отче Инноке́нтие! Услыши нас, тебе молящихся. Ты веси нашя скорби и недуги, слышиши воздыхания множества к тебе притекающих: сего ради к тебе, яко отцу нашему, скорому помощнику и теплому молитвеннику, зовем: не оста́ви нас твоим у Бога хода́тайством. Мы присно блужда́ем от пути спасения: руководѝ нас, милостивый наш наставниче. Мы не́мощни есмы̀ в вере: утвердѝ нас, правоверия учителю. Мы зело убози сотворихомся добрых дел: обогатѝ нас, благосердия сокровище. Мы присно наве́туеми есмы̀ от враг видимых и невидимых и озлобля́еми: помозѝ нам, безпомощных засту́пниче. Гнев Божий, праведно движимый на ны за беззакония наша, отврати от нас твоим хода́тайством у престола Судии Бога, Емуже ты предстои́ши на небеси, отче иера́рше, архиереев похвало̀. Услыши, молим тя, великий Христов угодниче, и зде с молением тебе предстоя́щыя, и вся, на всяком месте, тебе с верою призыва́ющыя: и испроси молитвами твоими у Отца Небеснаго всем нам прощение грехов наших и от бед избавление. Ты бо еси свиде́тельствованный безчи́сленными чудесы̀ помощник, заступник и молитвенник и о тебе славу возсылаем Отцу и Сыну и Святому Духу, ныне и присно и во веки веков.