О великий угодниче Божий, святый праведный Артемие, святыя обители, твоим именем красу́ющияся, покровителю, сильный о нас ко Господу хода́таю, зде живущих и́ноков твоея обители благодетелю, и всех с верою и любовию притекающих к ра́це чудотво́рных моще́й твоих добрый слы́шателю! Призри милостивно на убогую молитву нас грешных и непотребных, и твоим всемо́щным предстательством испроси нам у Господа прощение грехов, в вере и благочестии преспе́яние и от козней супостата, ищущаго нас погубити, ограждение. Даруй братству твоея обители смирение и кротость, любовь и послушание вседу́шное, служение и житие благоговейное и иноческаго общежития доброе соблюдение, да Го́сподеви непостыдно рабо́тающе, духом же горя́ще, и в непрестанней молитве о благотвори́телех на́ших живых и усопших преспева́юще, ве́рнии рабѝ Господа яви́мся. Моли Господа, да Церковь православная, яко вертоград благонасажденный, утверждается и множится, и богатны плоды веры и благочестия да сотворит. моли Господа, да хранит во здравии, душевнем спасении и во всем благопоспешении благочестивейшаго госуда́ря нашего, императора Николая Александровича и весь царствующий дом, нам благодеющий. Моли Господа о милости и благодатных щедротах святейшему правительствующему Синоду, и преосвященнейшему нашему [Архангелогоро́дскому епископу имярек], и всему священному причту, и всем православным христиа́ном, да хода́тайством и заступле́нием Преблагослове́нныя Владычицы нашея Богородицы мирное и богоугодное житие зде поживем, и по мирней христианстей кончине в преславнем Царствии милости Царя небесе и земли сподобимся, славити Отца и Сына и Святаго Духа, ныне и присно и во веки веков.