О святая мироно́сице, равноапостольная Магдали́но Марие! Ты теплою любовию твоею ко Христу Богу злыя козни вражия попра́ла еси, и безценный бисер Христа обре́тши, Царства Небеснаго достигла еси. Сего ради к тебе припа́даю умиленною душею, и сокрушенным сердцем вопию ти: при́зри с высоты небесныя на мя, греховными искушеньми бори́маго: виждь, коль многими грехѝ и бедами на всяк день враг мя̀ запина́ет, погибели моей иски́й. Темже, о славная и всехвальная ученице Христова Марие, умоли Возлюбленнаго тобою и Возлюбившаго тя Христа Бога, да подаст ми оставление многих моих прегрешений, да укрепит мя благодатию Своею тре́звенно и бо́дренно ше́ствовати путе́м святых Его заповедей и храм Духа Святаго мя да соделает: да тако многотрудное житие мое на земли скончав, во светлыя и блаженныя обители рая небеснаго всели́тися сподоблюся, идеже ты со всеми святыми радостно славосло́виши Единосущную Троицу, Отца и Сына и Духа Всесвятаго, во веки веков.