О священная главо̀, преподобне и достоблаженне отче Тихоне! Ты воистину муж желаний духовных и вторы́й Даниил показался еси. якоже бо оный древний пророк, высокою добродетелию и святостию жития своего, небесных видений и дивных откровений сподобися: сице и ты, преподобне, восхождения в сердце своем полагая, в добродетелех преспевал еси, и яко добрый и верный раб, в радость Господа твоего вшел еси. Темже и мы, яко духовная чада твоя, любовию побужда́еми, похвальная песнопения в честней памяти твоей тебе восписуем, и молитвенно на помощь нашей немощи призываем. К сим же смиренно молим тя, преподобне и преславне отче наш Тихоне: твоими благоприятными ко Господу молитвами заступѝ возлюбленную тобою пусты́ню сию̀, град же и весь: и вся, верою чтущыя святую память твою, от всякаго навета сопротивнаго, от всяких бед и напастей и всякаго зла сохрани. Молися, преподобне, о благочести́вейшем, самодержа́внейшем, вели́ком госуда́ре нашем, императоре Николае Александровиче всея России, о Христолюбивом его воинстве и о всей державе его. Умоли Милостиваго Бога и о нас смиренных и недостойных, да отпустит нам вся прегрешения наша, да спасет нас благодатию своею и сподобит радости вечныя наслаждатися в горнем оном Иерусалиме, иже есть ма́ти всем нам, купно с тобою и со всеми святыми, от века ему благоугодившими, в нихже в Троице славимый Бог благословен есть всегда, ныне и присно и во веки веков.