О священная главо, преславный чудотворче, первопастырю святыя Ростовския Церкве, святителю отче Леонтие! К тебе припа́даем и молимся мы смире́ннии и гре́шнии, и яко отца человеколюбиваго просим: вселѝ в сердца наша любовь твою, е́юже к Богу и ближним твоим в житии твоем преисполнен был еси, яко и душу твою за паству твою положил еси, мученически от идолослужителей пострадав. Научи нас, отче, тебе подражати верно, Бога и ближния нашя люби́ти искренно и заповеди Господни совершати непогреши́тельно: да и мы не и́менем токмо, но и всем житием нашим ча́да твоя яви́мся. Молися, угодниче Божий, ко Христу Богу о Святей Православней Церкви и державе Российстей, да пребудут в мире и благостоя́нии и процветают во благогчестии христианстем непоколебимы. Сохрани молитвами твоими императора нашего Николая Александровича всея России во здравии и долгоденствии, покоряя под но́зе его вся враги и супостаты. Соблюди царствующыя грады, град твой и вся грады и ве́си страны Российския невредимы от всякаго зла. При́зри благосердно на всяку душу христианскую, милости и помощи от тебѐ и́щущую: буди всем нам в болезнех цели́тель, в ско́рбех уте́шитель, в печа́лех изба́витель, в бедах помощник, в час смертный покровитель, да сподобимся и мы грешнии молитвами твоими спасение вечное получити и Царствие Христово унасле́довати. Ей, святителю Христов, не посрамѝ упова́ния нашего, еже по Бо́зе и Пресвятей Богородице на тя крепко возлагаем, но яви нам твое многомощное заступление, да хвалим, славим и величаем великое человеколюбие дивнаго во святых Своих Бога, Отца и Сына и Святаго Духа, во веки веков.