Христа́ ра́ди юро́дством возду́шная мыта́рства на рука́х а́нгельских неприкоснове́нно преше́д, ца́рскаго дости́гл еси́ престо́ла и от Царя́ всех Христа́ Бо́га дар прие́м благода́ть исцеле́ний, мно́гими бо чудесы́ твои́ми и зна́мением стра́шным удиви́л еси́ град твой Вели́кий У́стюг: лю́дем твои́м ми́лость испроси́в, ми́ро от честна́го о́браза Пресвяты́я Богоро́дицы моли́твою изве́л еси́ и неду́жным по́дал еси́ цельбы́. Те́м же мо́лим тя, чудоно́сче Проко́пие: моли́ Христа́ Бо́га непреста́нно пода́ти грехо́в на́ших проще́ние.