О священная главо̀, великий чудотворче, преподобне отче наш Ти́хоне, угодниче Христов преблаженне и преславне, Духа Святаго исполнение постников похвало, монашествующих славо, пустыни украси́телю, теплый о нас грешных молитвенниче! Ныне со ангельскими во́инствы предстоя у престола всех Царя славы Господа, и наслаждаяся света Единосущныя Троицы, и с го́рними силами трисвятую песнь воспевая, молися Всемилостивому Владыце спастѝ вся верующыя во имя его: испросѝ мир и тишину святым це́рквам низпосла́ти, вере православней укрепление, благочести́вейшему, самодержа́внейшему, вели́кому госуда́рю нашему, императору Николаю Александровичу, и всему наследию его здравие дарова́ти, и покори́ти им вся противныя язы́ки, брани хотящыя, видимыя и невидимыя враги низложи́ти, гра́ды нашя утверди́ти, мiр весь умири́ти. Моли Милостиваго Бога, да избавит твоим благоприятным хода́тайством вся православныя христианы от глада, губительства, труса, потопа, огня, меча, от нашествия иноплеменников и междоусобныя брани, старыя да подкрепит, юныя да наставит, немудрыя да умудрит, болящыя исцелит, плененныя и узники да свободит, сироты̀ засту́пит, младенцы воспитает, и вся люди от всех бед и напастей и от нападения вражия да сохранит, и от смертоносныя язвы и тлетворных ветр и от всякаго зла да избавит. Днесь же с верою приходящыя рабы Божия имярек, со страхом и любовию припа́дающыя ко святому гробу многоцелебных мощей твоих и образ подобия любезно целующыя, яко теплый наш заступник, сохранѝ, и в скорбных обстояниих им предста́ни, от душевных же и телесных страстей свободи: таже в день Страшнаго Суда от шу́иаго стояния избави, и с десны́ми овца́ми молитвами твоими стати сподоби и слышати блаженный о́ный глас Владыки Христа, Бога нашего: прииди́те, благословеннии Отца моего, наследуйте уготованное вам Царство от сложения мiра. Емуже подобает всякая слава, честь и поклонение, со Безначальным Его Отцем, и со Пресвятым и Благим и Животворящим Его Духом, ныне и присно и во веки веков.