О преподо́бне и преблаже́нне отче наш Михаиле! Ты, возжеле́в усердно ше́ствовати во след Господа нашего Иисуса Христа, вся плотска́я мудрования отри́нул еси: ты, отечество твое, род и временное благоро́дствие и земнаго царствия наследие оста́вив, монашества и юро́дства путь ко спасению и к наследию Царствия Небеснаго предъизбра́л еси: пришед же дивне во обитель сию Пресвятыя Троицы, в ней трудолю́бно и богоугодно подвиза́яся, по премно́гу ко устроению ея̀ споспешествова́л еси: и от всех бед, от гла́да, вра́жия нахожде́ния и о́гненнаго запале́ния и вся́каго зла о́ную сохраня́я, и защища́я живущыя в ней и к ней притека́ющыя, пути Господню поуча́л еси. Ты и ныне Прествятей Троице со всеми святыми предстоя̀ и непреста́нно насыща́яся зрения Божества Трисветлаго, помина́й чтущыя святую память твою: не премолчѝ, угодниче Христов, ко Господу моля́ся, да благода́тию Свое́ю святую обитель сию, в ней живу́щыя и тружда́ющыяся, ку́пно же и им благодею́щыя при́сно приосеня́ет, та́кожде и вся притека́ющыя ко священней ра́це твоей и мо́щи твоя усты̀ и сердцем лобыза́ющыя здра́вы и невреди́мы сохраняет и от всякия напа́сти свобожда́ет, путешествующым в пути благопоспе́шество подава́я, боля́щым же здравие и печальным утешение, си́рым и вдови́цам и всем напа́ствуемым скорое заступление и вспоможе́ние, и от вражиих наве́тов твердое ограждение и защищение: не преста́й же моляся и о христоименитей державе благочести́вейшаго, самодержа́внейшаго, великаго государя нашего, императора Николая Александровича, яко да твоим предстательством и молитвами сохраня́еми, возмо́жем по́двиг течения неблазненно соверши́ти, славяще святую Троицу, Отца и Сына и Святаго Духа, и твое заступление, ныне и присно и во веки веков.