Свѣти́сѧ, свѣти́сѧ но́вый і҆ерꙋсали́ме: сла́ва бо гдⷭ҇нѧ на тебѣ̀ возсїѧ̀. ликꙋ́й ны́нѣ, и҆ весели́сѧ сїѡ́не. ты́ же чи́стаѧ красꙋ́йсѧ бцⷣе, ѡ҆ воста́нїи рождества̀ твоегѡ̀. Та́же: Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ. Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь. Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ. [Три́жды.]
И҆ на́мъ дарова̀ живо́тъ вѣ́чный, покланѧ́емсѧ є҆гѡ̀ тридне́вномꙋ воскрⷭ҇нїю. И҆ глаго́лемъ ко ѹ҆со́пшемꙋ: Хрⷭ҇то́съ воскре́се.
҆҆ ЧИ́НЪ, ка́кѡ подоба́етъ пѣ́ти двана́десѧть ѱалмѡ́въ ѻ҆со́бь, и҆́хже поѧ́хꙋ преподо́бнїи ѻ҆тцы̀ пꙋсты́ннїи во днѝ, и҆ въ нощѝ: ѡ҆ ни́хже воспомина́етсѧ въ кни́гахъ ѻ҆те́ческихъ, и҆ въ житїѧ́хъ и҆ мꙋче́нїѧхъ свѧты́хъ мно́гихъ.
Се́й же чи́нъ принесѐ ѿ свѧты́ѧ горы̀ прпⷣбный досі҆ѳе́й, а҆рхїмандрі́тъ пече́рскїй. Є҆гѡ́же нача́ло:
А҆́ще і҆ере́й: Бл҃гослове́нъ бг҃ъ на́шъ, всегда̀, ны́нѣ и҆ при́снѡ, и҆ во вѣ́ки вѣкѡ́въ. И҆ ѹ҆чине́нный чте́цъ глаго́летъ: Ґми́нь.