О богоосвященный и равноапостольный святителю Христов Стефане, новый боговедения проповедниче и просветителю великопермских во идолопоклонстве живших людей, ко истинному Евангельскому свету путеводителю, пастырю добрый и учителю премудрый, Духа Святаго сосуде избранный, Христоподражательный к небесному Сиону наставниче и руководителю, образе благонравия всем благочестно жити желающым, благоискусный мысленнаго корабля, чрез море мiра сего к небесному пристанищу плавающаго, правителю, дивный во иерарсех, увенча́нный Божественною благодатию, всероссийский светильниче, великий чудотворче и молитвенниче теплый! К тебе, во умилении душ и сокрушении сердец наших, мы окаяннии и грешнии благонадежно притекаем, и пред чудотворным твоим гробом, в немже святыя мощи твоя почивают [или пред святым и чудотворным твоим образом], вопием, просяще смиреннии помощи твоея и теплаго ко Преблагому Богу ходатайства, да твоими благоприятными молитвами испро́сиши нам от Него человеколюбную милость, оставление многих наших согрешений, душа́м и телесе́м здравие со спасением: да благоволит же Господь твоими молитвами безбедно в мiре сем ходити нам до скончания жития нашего, во время же разлучения нашего от жизни сея дух наш Ангелы Своими святыми в покаянии и мире милостивно да прии́мет, яко да от мрачных и злоковарных и лютых духо́в демонских на возду́се прошедше невозбра́нно, к Нему непостыдно предста́нем, и поклони́мся, и безсмертныя и блаженныя жизни сподобимся со всеми святыми во веки веков.