Святый мучениче Аврамие, доблий воине Христа Царя Небеснаго, в скорбех и напастех преславный наш помощниче и защитниче! Ничтоже возможе отлучити тя от любве ко Господу Иисусу: ни лестная обещания благ временных, ни прещения, ни муки от злых врагов святейшия Христовы веры: ты, яко лев, изшел еси на брань противу волков мысленых, духов злобы, подвигших на тя, ради добраго твоего исповедания, единоплеменный тебе народ болгарский, и, яко огненная стрела, тех поразил еси силою благодати Святаго Духа и крепкия, яко смерть, любве твоея к Богу. Аще и пролиял еси кровь твою за Христа Бога нашего, погубив временную жизнь: обаче безсмертною душею, яко орел, воспарил еси в горния обители Отца нашего, и тамо вечную жизнь, славу и блаженство неизреченное восприял еси, нам же нетленныя мощи твоя, яко крин многоценный и благоуханный, оставил еси. веруем, страстотерпче святый, яко, предстоя со Ангелы и всеми святыми престолу славы Триипостаснаго Бога, усердныя и богоприятныя возносишь молитвы не токмо о нас и о святей обители сей и о граде нашем, но и о всех святей Христовей Церкви, и о православнем царстве Российстем, и о благочестивейшем царе нашем. Веруем, преславный чудотворче, яко ты, силою Всемогущаго Господа, чрез святыя мощи твоя, источаеши обилныя да́ры благодатныя помощи во спасение всем с верою к тебе притекающым, наипаче же испрошаеши кончину с покаянием тебе чтущым, и благосердно помогаеши немощным младенцем, да вси единодушно прославляем неисповедимое величие благости Божия. Темже верою и любовию ко святым мощем твоим припадающе и благоговейно оныя лобызающе, молим тя, добрый на небеси наш молитвенниче и заступниче: помогай нам грешным и смиренным твоими молитвами во всех ско́рбех, ну́ждах и обстояниих наших, сохрани нас, святую обитель сию и град сей от всякаго зла и всякия напасти, наипаче же споспешествуй вечному спасению нашему и всех просящих от тебе помощи и заступления. Ей, смиренно молим тя, угодниче Божий: моли христа Бога нашего, да даст Он мир и тишину всем православным христианом и да отвратит от нас всякий гнев, на ны движимый, да избавит нас от сетей вражиих, томления во узах греха и мучений адовых, и да сподобит нас недостойных одесную Себе стати на Суде Своем праведнем и внити в вечный покой святых Его, идеже празднующих глас непрестанный и неизреченная сладость зрящих добро́ту лица Его: и тако возможем с тобою и всеми святыми прославляти Отца и Сына и Святаго Духа, Троицу Единосущную и Нераздельную, во веки веков.