О, всепѣ́тая Ма́ти, пречи́стая Госпоже́, Дѣ́во Богоро́дице! Къ Тебѣ́ возвожду́ душе́вныя и тѣле́сныя о́чи, къ Тебѣ́ простира́ю разсла́бленныя ру́цѣ и изъ глубины́ се́рдца вопію́: при́зри на вѣ́ру и смире́ніе души́ моея́, покры́й мя́ всемо́щнымъ омофо́ромъ Твои́мъ, да изба́влюся отъ всѣ́хъ бѣ́дъ и напа́стей, и въ ча́съ кончи́ны моея́, о Всеблага́я, предста́ни мнѣ́ и угото́ваннаго ра́ди грѣхо́въ мои́хъ изба́ви муче́нія, да вы́ну покланя́яся зову́: Аллилу́ія.
[Се́й конда́къ глаго́лется три́жды. Та́же и́косъ 1-й: Арха́нгелъ и а́нгелъ мно́жество... И конда́къ 1-й: Избра́нной предвѣ́чнымъ Царе́мъ...]
О, Пресвята́я Дѣ́во, Ма́ти Го́спода вы́шнихъ си́лъ, небесе́ и земли́ Цари́це, гра́да и страны́ на́шея всемо́щная Засту́пнице! Пріими́ хвале́бно-благода́рственное пѣ́ніе сіе́ отъ на́съ, недосто́йныхъ ра́бъ Твои́хъ, и вознеси́ моли́твы на́ши ко престо́лу Бо́га, Сы́на Твоего́, да ми́лостивъ бу́детъ непра́вдамъ на́шимъ и проба́витъ благода́ть Свою́ чту́щимъ всечестно́е и́мя Твое́ и съ вѣ́рою и любо́вію покланя́ющимся чудотво́рному о́бразу Твоему́. Нѣ́смы бо досто́йни отъ Него́ поми́ловани бы́ти, а́ще не Ты́ уми́лостивиши Его́ о на́съ, Влады́чице, я́ко вся́ Тебѣ́ отъ Него́ возмо́жна су́ть. Сего́ ра́ди къ Тебѣ́ прибѣга́емъ, я́ко къ несомнѣ́ннѣй и ско́рой Засту́пницѣ на́шей: услы́ши на́съ, моля́щихся Тебѣ́, осѣни́ на́съ вседержа́внымъ покро́вомъ Твои́мъ и испроси́ у Бо́га, Сы́на Твоего́, па́стыремъ на́шимъ — ре́вность и бдѣ́ніе о душа́хъ, градоправи́телямъ — му́дрость и си́лу, судія́мъ — пра́вду и нелицепрія́тіе, наста́вникомъ — ра́зумъ и смиренному́дріе, супру́гамъ — любо́вь и согла́сіе, ча́дамъ — послуша́ніе, оби́димымъ — терпѣ́ніе, оби́дящимъ — стра́хъ Бо́жій, скорбя́щимъ — благоду́шіе, ра́дующимся — воздержа́ніе, всѣ́мъ же на́мъ — ду́хъ ра́зума и благоче́стія, ду́хъ милосе́рдія и кро́тости, ду́хъ чистоты́ и пра́вды. Ей, Госпоже́ Пресвята́я, умилосе́рдися на немощны́я лю́ди Твоя́: разсѣ́янныя собери́, заблу́ждшія на пу́ть пра́вый наста́ви, ста́рость поддержи́, ю́ныя уцѣлому́дри, младе́нцы воспита́й, и при́зри на всѣ́хъ на́съ призрѣ́ніемъ ми́лостиваго Твоего́ заступле́нія, воздви́гни на́съ изъ глубины́ грѣхо́вныя и просвѣти́ серде́чныя о́чи на́ша къ зрѣ́нію спасе́нія. Ми́лостива на́мъ бу́ди здѣ́ и та́мо, въ странѣ́ земна́го прише́льствія и на стра́шномъ судѣ́ Сы́на Твоего́. Преста́вльшіяся же въ вѣ́рѣ и покая́ніи отъ житія́ сего́ отцы́ и бра́тію на́шу въ вѣ́чной жи́зни со а́нгелы и со всѣ́ми святы́ми жи́ти сотвори́. Ты́ бо еси́, Госпоже́, сла́ва небе́сныхъ и упова́ніе земны́хъ, Ты́ по Бо́зѣ на́ша Наде́жда и Засту́пница всѣ́хъ, притека́ющихъ къ Тебѣ́ съ вѣ́рою. Къ Тебѣ́ у́бо мо́лимся и Тебѣ́, я́ко всемогу́щей Помо́щнице, са́ми себе́ и дру́гъ дру́га и ве́сь живо́тъ на́шъ предае́мъ, ны́нѣ и при́сно и во вѣ́ки вѣко́въ. Ами́нь.
Цари́це моя́ Преблага́я, наде́ждо моя́ Пресвята́я, прія́телище си́рымъ и стра́ннымъ засту́пнице, бѣ́дствующихъ по́моще и озлобля́емыхъ покро́ве, зри́ши мою́ напа́сть, зри́ши мою́ ско́рбь: отвсю́ду искуше́ніемъ одержи́мь е́смь, а заступа́ющаго нѣ́сть. Ты́ у́бо Сама́ помози́ ми, я́ко не́мощну, окорми́ мя, я́ко стра́нна, наста́ви, я́ко заблу́ждша, уврачу́й и спаси́, я́ко безнаде́жна. Не и́мамъ бо ины́я по́мощи, ни ина́го предста́тельства, ни утѣше́нія, то́кмо Тебе́, о Ма́ти всѣ́хъ скорбя́щихъ и обремене́нныхъ! При́зри у́бо на мя́, грѣ́шнаго и во озлобле́ніи су́щаго, и покры́й мя́ пресвяты́мъ омофо́ромъ Твои́мъ, да изба́вленъ бу́ду отъ зо́лъ, мя́ обыше́дшихъ, и восхвалю́ вы́ну препѣ́тое и́мя Твое́. Ами́нь.
Дне́сь благовѣ́рніи лю́діе свѣ́тло пра́зднуемъ, осѣня́еми Твои́мъ, Богома́ти, прише́ствіемъ, и къ Твоему́ взира́юще пречи́стому о́бразу, уми́льно глаго́лемъ: покры́й на́съ честны́мъ Твои́мъ Покро́вомъ, и изба́ви на́съ отъ вся́каго зла́, моля́щи Сы́на Твоего́, Христа́ Бо́га на́шего, спасти́ ду́ши на́ша.
Дѣ́ва дне́сь предстои́тъ въ це́ркви, и съ ли́ки святы́хъ неви́димо за ны́ мо́лится Бо́гу, а́нгели со архіере́и покланя́ются, апо́столи же со проро́ки ликовству́ютъ: на́съ бо ра́ди мо́литъ Богоро́дица Превѣ́чнаго Бо́га.
Велича́емъ Тя́, Пресвята́я Дѣ́во, и чте́мъ Покро́въ Тво́й честны́й: Тя́ бо святы́й Андре́й ви́дѣ на возду́сѣ, за ны́ Христу́ моля́щуюся.
Ака́ѳистъ Покрову́ Пресвяты́я Богоро́дицы. — Кíевъ: Въ тѵпогра́фіи Кíево-Пече́рскія Ла́вры, 1860. — Л. 10 – 35 об, 40 – 42 об. [http://osanna.russportal.ru/index.php?id=selected.akathists.october_a0101]