Хотя́й долготерпѣли́вый Всеви́децъ Госпо́дь яви́ти Своего́ человѣколю́бія неизслѣ́димую щедро́тъ бе́здну, избра́ Тебе́ еди́ну въ Ма́терь Себѣ́, и сотвори́ Тя лю́демъ непреодолѣ́нное защище́ніе: да а́ще кто́ отъ ни́хъ и пра́веднымъ судо́мъ Бо́жіимъ осужде́нія досто́инъ яви́тся, Твои́мъ оба́че держа́внымъ покро́вомъ сохраня́ется на покая́ніе, зовы́й: Аллилу́ія.
Ди́вная показа́лъ еси́ дѣла́ Твоя́ въ Пречи́стѣй Ма́тери Твое́й, Го́споди, егда́ пречу́дный омофо́ръ въ руцѣ́ Ея́ свѣтя́щійся па́че лу́чь со́лнечныхъ яви́ся, и́мже покрыва́ше лю́ди, су́щія въ це́ркви Влахе́рнстѣй. О таковѣ́мъ у́бо зна́меніи милосе́рднаго Ея́ заступле́нія услы́шавше, у́жасомъ и ра́достію одержи́ми, вси́ глаго́лаху:
Ра́дуйся, нерукотворе́нный омофо́ръ, а́ки о́блакъ, надъ всѣ́мъ мíромъ распросте́ршая;
Ра́дуйся, Превѣ́чнаго Архіере́я, Сы́на Своего́, зна́меніе на руцѣ́ Свое́й держа́щая.
Ра́дуйся, но́вую ми́лость и но́вую благода́ть си́мъ въ Це́ркви Правосла́внѣй явля́ющая;
Ра́дуйся, сто́лпе о́блачный, отъ искуше́ній и собла́зновъ мíра всѣ́хъ на́съ покрыва́ющій.
Ра́дуйся, сто́лпе о́гненный, среди́ мглы́ грѣха́ всѣ́мъ на́мъ пу́ть спасе́нія показу́ющій;
Ра́дуйся, я́вныхъ благоче́стія подви́жниковъ я́вное укрѣпле́ніе.
Ра́дуйся, та́йныхъ среди́ мíра рабо́въ Бо́жіихъ та́йное вразумле́ніе;
Ра́дуйся, и мене́, обнаже́ннаго до́брыхъ дѣ́лъ, не оставля́ющая Свои́мъ покро́вомъ и благода́тію.
Ра́дуйся, Ра́досте на́ша, покры́й на́съ отъ вся́каго зла́ честны́мъ Твои́мъ омофо́ромъ.
Ди́вно Тя́ отъ небе́съ во Влахе́рнстѣй це́ркви я́вльшуюся, а́нгели воспѣ́ша, апо́столи просла́виша, ли́къ святи́телей и преподо́бныхъ, и же́нъ святы́хъ сосло́віе восхвали́ша, Предте́ча съ Богосло́вомъ поклони́шася, лю́діе же, су́щіи въ це́ркви, съ весе́ліемъ вопія́ху: Аллилу́ія.
Всѣ́ми вы́шними и ни́жними влады́чествуя Госпо́дь, узрѣ́въ Тя́ въ це́ркви Ма́терь Свою́ стоя́щу и со умиле́ніемъ къ Нему́ моля́щуся, рече́: «проси́, Ма́ти Моя́, зане́ не отвращу́ся Тебе́, но испо́лню вся́ проше́нія Твоя́ и благода́рственная си́це Тебѣ́ всѣ́хъ пѣ́ти научу́»:
Ра́дуйся, ковче́же завѣ́та, въ не́мже храни́тся освяще́ніе всего́ ро́да человѣ́ческаго;
Ра́дуйся, ста́мно пресвята́я, въ не́йже а́лчущимъ пра́вды блюде́тся Хлѣ́бъ жи́зни вѣ́чныя.
Ра́дуйся, сосу́де всезлаты́й, въ не́мже угото́вася на́съ ра́ди пло́ть и кро́вь Боже́ственнаго Агнца;
Ра́дуйся, оста́вленныхъ врача́ми на Свои́ всемо́щныя ру́цѣ пріе́млющая.
Ра́дуйся, разсла́бленныхъ тѣ́ломъ, но не ду́хомъ и вѣ́рою, со одра́ болѣ́зни воздвига́ющая;
Ра́дуйся, погубля́ющимъ отъ неду́га у́мъ, но́вый и лу́чшій смы́слъ подаю́щая.
Ра́дуйся, на стро́потномъ пути́ грѣха́ и страсте́й на́съ прему́дрѣ запина́ющая;
Ра́дуйся, жесто́кость нераска́яннаго се́рдца на́шего умиля́ющая.
Ра́дуйся, Ра́досте на́ша, покры́й на́съ отъ вся́каго зла́ честны́мъ Твои́мъ омофо́ромъ.
Все́ естество́ а́нгельское похва́льная прино́ситъ Тебѣ́, и́стиннѣй Бо́жіей Ма́тери и Засту́пницѣ всѣ́хъ, притека́ющихъ къ Тебѣ́, вѣ́дуще, я́ко несокруши́мымъ покро́вомъ Твои́мъ пра́ведныхъ возвеселя́ещи, грѣ́шныхъ заступа́еши, бѣ́дствующихъ избавля́еши и мо́лишися о всѣ́хъ вѣ́рныхъ, зову́щихъ: Аллилу́ія.
Вѣтíи многовѣща́нныя, я́ко ры́бы безгла́сныя, недоумѣ́ютъ, ка́ко восхвали́ти по достоя́нію вели́кій всечестна́го Покро́ва Твоего́ пра́здникъ: вся́ бо о Тебѣ́ отъ ни́хъ глаго́лемая не су́ть дово́льна къ еди́ному изчисле́нію щедро́тъ Твои́хъ. Мы́ же, Твоя́ неисче́тныя благодѣя́нія ви́дяще, съ весе́ліемъ взыва́емъ:
Ра́дуйся, отъ я́звы и всегуби́тельства сме́ртнаго на́съ соблюда́ющая;
Ра́дуйся, отъ внеза́пнаго колеба́нія земли́ гра́ды и ве́си сохраня́ющая.
Ра́дуйся, отъ разлія́нія во́дъ и потопле́нія руко́ю крѣ́пкою возводя́щая;
Ра́дуйся, отъ запале́нія о́гненнаго росо́ю моли́твъ Твои́хъ избавля́ющая.
Ра́дуйся, отъ гла́да душе́внаго и тѣле́снаго Хлѣ́бомъ Жи́зни снабдѣва́ющая;
Ра́дуйся, уда́ры мо́лніи и гро́ма отъ главы́ на́шей отводя́щая.
Ра́дуйся, отъ наше́ствія иноплеме́нникъ и та́йныхъ убíйцъ спаса́ющая;
Ра́дуйся, отъ дома́шнія бра́ни и вражды́ единокро́вныхъ ми́ромъ и любо́вію огражда́ющая.
Ра́дуйся, Ра́досте на́ша, покры́й на́съ отъ вся́каго зла́ честны́мъ Твои́мъ омофо́ромъ.
Спасти́ хотя́ ро́дъ человѣ́ческій отъ пре́лести вра́жія человѣколю́бецъ Госпо́дь Тебе́, Ма́терь Свою́, дарова́ земны́мъ на́мъ въ по́мощь, покро́въ и защи́ту, да бу́деши печа́льнымъ утѣше́ніе, скорбя́щимъ ра́дованіе, оби́димымъ засту́пница, и да всѣ́хъ изъ глубины́ грѣхо́вныя воздви́гнеши, пою́щихъ: Аллилу́ія.
«Царю́ Небе́сный — глаго́лаше въ моли́твѣ на возду́сѣ со а́нгелы стоя́щая Всенепоро́чная Цари́ца, — пріими́ вся́каго человѣ́ка, моля́щаяся къ Тебѣ́ и призыва́юща и́мя Мое́ на по́мощь, да не оты́детъ отъ ли́ка Моего́ то́щь и неуслы́шанъ». Сію́ всеблагу́ю моли́тву слы́шавше, собо́ри святы́хъ благода́рнѣ возопи́ша:
Ра́дуйся, чи́стыхъ рука́ми и се́рдцемъ земледѣ́льцевъ благослове́нными плода́ми вѣнча́ющая;
Ра́дуйся, по́моще и пра́ведное мздовоздая́ніе всѣ́мъ пра́во ку́плю дѣ́ющимъ.
Ра́дуйся, клятвопреступле́ній и непра́ведныхъ стяжа́ній всенаро́дное обличе́ніе;
Ра́дуйся, бѣ́дствующимъ въ пути́, на су́шѣ и вода́хъ внеза́пное вспоможе́ніе.
Ра́дуйся, безча́дныхъ роди́телей плода́ми вѣ́ры и ду́ха веселя́щая;
Ра́дуйся, безма́тернихъ сиро́тъ незри́мая воспита́тельнице.
Ра́дуйся, крѣ́пкая засту́пнице су́щихъ въ плѣну́ и изгна́ніи;
Ра́дуйся, неусыпа́ющая попечи́тельнице во у́захъ и темни́цѣ сѣдя́щихъ.
Ра́дуйся, Ра́досте на́ша, покры́й на́съ отъ вся́каго зла́ честны́мъ Твои́мъ омофо́ромъ.
Пѣ́ніе всеумиле́нное слы́шаше и те́плой Твое́й моли́твѣ о на́съ вне́млюще, про́симъ Тебе́, Дѣ́во Богоро́дице, не пре́зри гла́са рабо́въ Твои́хъ: къ Тебѣ́ бо въ напа́стехъ и ско́рбехъ прибѣга́емъ и предъ Тобо́ю въ бѣда́хъ на́шихъ сле́зы пролива́емъ, зову́ще: Аллилу́ія.
Яко свѣтопріе́мную свѣщу́, въ моли́твѣ горя́щую, ви́дящи Тя́ на возду́сѣ Влахе́рнская це́рковь, согла́сно со мно́жествомъ люде́й, въ не́й бы́вшихъ, возглаша́ше: «откуду́ мнѣ́ сіе́, да пріи́де Ма́ти Го́спода моего́ ко мнѣ́?» Святы́й же Андре́й со Епифа́ніемъ те́плѣ моля́хуся къ Тебѣ́, зову́ще:
Ра́дуйся, всѣ́хъ даро́въ духо́вныхъ и тѣле́сныхъ незави́стная пода́тельнице;
Ра́дуйся, полага́ющихъ нача́ло покая́нія грѣ́шниковъ вѣ́рная предста́тельнице.
Ра́дуйся, борю́щихся со страстьми́ и прило́гами вра́жіими всегда́шняя спобо́рнице;
Ра́дуйся, незри́мое укроще́ніе влады́къ жесто́кихъ и звѣронра́вныхъ.
Ра́дуйся, та́йный поко́е и отра́до рабо́въ кро́ткихъ и стра́ждущихъ;
Ра́дуйся, всежела́нное соверше́ніе благи́хъ супру́жествъ.
Ра́дуйся, ма́терей дѣтородя́щихъ ско́рое и безболѣ́зненное разрѣше́ніе;
Ра́дуйся, въ ча́съ кончи́ны еди́ная всѣ́мъ на́мъ помо́щнице.
Ра́дуйся, Ра́досте на́ша, покры́й на́съ отъ вся́каго зла́ честны́мъ Твои́мъ омофо́ромъ.
Благода́ть Боже́ственную испроси́ на́мъ у Сы́на Твоего́ и Бо́га, простри́ на́мъ ру́ку по́мощи, отжени́ отъ на́съ вся́каго врага́ и супоста́та, и умири́ на́шу жи́знь, да не поги́бнемъ лю́тѣ, безъ покая́нія, но пріими́ на́съ въ вѣ́чныя кро́вы, Покрови́тельнице на́ша, да ра́дующеся Тебѣ́ зове́мъ: Аллилу́ія.
Пою́ще Тво́й держа́вный покро́въ, хва́лимъ Тя́ вси́, я́ко тве́рдую предста́тельницу на́шу, и покланя́емся Тебѣ́, о на́съ моля́щейся: вѣ́руемъ бо и надѣ́емся, я́ко испро́сиши у Сы́на Твоего́ и Бо́га блага́я вѣ́чная и вре́менная, всѣ́мъ съ любо́вію вопію́щимъ Тебѣ́ си́це:
Ра́дуйся, все́й вселе́ннѣй крѣ́пкое заступле́ніе;
Ра́дуйся, всѣ́хъ стихíй земны́хъ и небе́сныхъ освяще́ніе.
Ра́дуйся, всѣ́хъ време́нъ го́да благослове́ніе;
Ра́дуйся, всѣ́хъ навѣ́товъ и искуше́ній отъ мíра, пло́ти и діа́вола находя́щихъ, попра́ніе.
Ра́дуйся, неча́емое примире́ніе ожесточе́нно вражду́ющихъ;
Ра́дуйся, недовѣ́домое исправле́ніе нераска́янныхъ грѣ́шниковъ.
Ра́дуйся, не отверга́ющая всѣ́ми презрѣ́нныхъ и отве́рженныхъ;
Ра́дуйся, сами́хъ отча́янныхъ отъ ро́ва поги́бели исхища́ющая.
Ра́дуйся, Ра́досте на́ша, покры́й на́съ отъ вся́каго зла́ честны́мъ Твои́мъ омофо́ромъ.