Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Та́же, Сла́ва тебѣ̀ бж҃е на́шъ, сла́ва тебѣ̀.
Цр҃ю̀ нбⷭ҇ный, ѹ҆тѣ́шителю, дш҃е и҆́стины, и҆́же вездѣ̀ сы́й и҆ всѧ̑ и҆сполнѧ́ѧй, сокро́вище бл҃ги́хъ и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ сп҃сѝ бл҃же дꙋ́шы на́шѧ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Та́же, Гдⷭ҇и поми́лꙋй, в҃і.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
Та́же ѱалмы̀:
Ко́ль возлю́блєнна селє́нїѧ твоѧ̑, гдⷭ҇и си́лъ; Жела́етъ и҆ скончава́етсѧ дꙋша̀ моѧ̀ во дворы̀ гдⷭ҇ни. се́рдце моѐ и҆ пло́ть моѧ̀ возра́довастасѧ ѡ҆ бз҃ѣ жи́вѣ. и҆́бо пти́ца ѡ҆брѣ́те себѣ̀ хра́минꙋ, и҆ го́рлица гнѣздо̀ себѣ̀, и҆дѣ́же положи́тъ птенцы̀ своѧ̑: ѻ҆лтарѝ твоѧ̑ гдⷭ҇и си́лъ, цр҃ю̀ мо́й и҆ бж҃е мо́й. бл҃же́ни живꙋ́щїи въ домꙋ̀ твое́мъ, въ вѣ́ки вѣкѡ́въ восхва́лѧтъ тѧ̀. бл҃же́нъ мꙋ́жъ, є҆мꙋ́же є҆́сть застꙋпле́нїе є҆гѡ̀ ѹ҆ тебѐ, восхождє́нїѧ въ се́рдцѣ свое́мъ положѝ. во ю҆до́ль плаче́внꙋю, въ мѣ́сто є҆́же положѝ: и҆́бо бл҃гослове́нїе да́стъ законополага́ѧй. по́йдꙋтъ ѿ си́лы въ си́лꙋ, ꙗ҆ви́тсѧ бг҃ъ богѡ́въ въ сїѡ́нѣ. гдⷭ҇и бж҃е си́лъ, ѹ҆слы́ши мл҃твꙋ мою̀, внꙋшѝ бж҃е і҆а́кѡвль. защи́тниче на́шъ ви́ждь бж҃е, и҆ при́зри на лицѐ хрїста̀ твоегѡ̀. ꙗ҆́кѡ лꙋ́чше де́нь є҆ди́нъ во дво́рѣхъ твои́хъ па́че ты́сѧщъ. и҆зво́лихъ примета́тисѧ въ домꙋ̀ бг҃а моегѡ̀ па́че, не́же жи́ти мѝ въ селе́нїихъ грѣ́шничихъ. ꙗ҆́кѡ млⷭ҇ть и҆ и҆́стинꙋ лю́битъ гдⷭ҇ь, бг҃ъ бл҃года́ть и҆ сла́вꙋ да́стъ. гдⷭ҇ь не лиши́тъ бл҃ги́хъ, ходѧ́щихъ неѕло́бїемъ. гдⷭ҇и бж҃е си́лъ, бл҃же́нъ человѣ́къ ѹ҆пова́ѧй на тѧ̀.
Бл҃говоли́лъ є҆сѝ гдⷭ҇и землю̀ твою̀, возврати́лъ є҆сѝ плѣ́нъ і҆а́кѡвль. ѡ҆ста́вилъ є҆сѝ беззакѡ́нїѧ люде́й твои́хъ, покры́лъ є҆сѝ всѧ̑ грѣхѝ и҆́хъ. ѹ҆кроти́лъ є҆сѝ ве́сь гнѣ́въ тво́й, возврати́лсѧ є҆сѝ ѿ гнѣ́ва ꙗ҆́рости твоеѧ̀. возвратѝ на́съ бж҃е сп҃се́нїй на́шихъ, и҆ ѿвратѝ ꙗ҆́рость твою̀ ѿ на́съ. є҆да̀ во вѣ́ки прогнѣ́ваешисѧ на ны̀; и҆лѝ простре́ши гнѣ́въ тво́й ѿ ро́да въ ро́дъ; бж҃е, ты̀ ѡ҆бра́щьсѧ ѡ҆живи́ши ны̀, и҆ лю́дїе твоѝ возвеселѧ́тсѧ ѡ҆ тебѣ̀. ꙗ҆вѝ на́мъ гдⷭ҇и млⷭ҇ть твою̀, и҆ сп҃се́нїе твоѐ да́ждь на́мъ. ѹ҆слы́шꙋ, что̀ рече́тъ ѡ҆ мнѣ̀ гдⷭ҇ь бг҃ъ: ꙗ҆́кѡ рече́тъ ми́ръ на лю́ди своѧ̑, и҆ на прпⷣбныѧ своѧ̑, и҆ на ѡ҆браща́ющыѧ сердца̀ къ немꙋ̀. ѻ҆ба́че бли́зъ боѧ́щихсѧ є҆гѡ̀ сп҃се́нїе є҆гѡ̀, всели́ти сла́вꙋ въ зе́млю на́шꙋ. млⷭ҇ть и҆ и҆́стина срѣто́стѣсѧ, пра́вда и҆ ми́ръ ѡ҆блобыза́стасѧ. и҆́стина ѿ землѝ возсїѧ̀, и҆ пра́вда съ нб҃сѐ прини́че. и҆́бо гдⷭ҇ь да́стъ бл҃гость, и҆ землѧ̀ на́ша да́стъ пло́дъ сво́й. пра́вда пред̾ ни́мъ пред̾и́детъ, и҆ положи́тъ въ пꙋ́ть стѡпы̀ своѧ̑.
Приклонѝ гдⷭ҇и ѹ҆́хо твоѐ, и҆ ѹ҆слы́ши мѧ̀, ꙗ҆́кѡ ни́щъ и҆ ѹ҆бо́гъ є҆́смь а҆́зъ. сохранѝ дꙋ́шꙋ мою̀, ꙗ҆́кѡ прпⷣбенъ є҆́смь: сп҃сѝ раба̀ твоего̀ бж҃е мо́й, ѹ҆пова́ющаго на тѧ̀. поми́лꙋй мѧ̀ гдⷭ҇и, ꙗ҆́кѡ къ тебѣ̀ воззовꙋ̀ ве́сь де́нь. возвеселѝ дꙋ́шꙋ раба̀ твоегѡ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. ꙗ҆́кѡ ты̀ гдⷭ҇и, бл҃гъ и҆ кро́токъ, и҆ многомлⷭ҇тивъ всѣ̑мъ призыва́ющымъ тѧ̀. внꙋшѝ гдⷭ҇и мл҃твꙋ мою̀, и҆ вонмѝ гла́сꙋ моле́нїѧ моегѡ̀. въ де́нь ско́рби моеѧ̀ воззва́хъ къ тебѣ̀, ꙗ҆́кѡ ѹ҆слы́шалъ мѧ̀ є҆сѝ. нѣ́сть подо́бенъ тебѣ̀ въ бозѣ́хъ гдⷭ҇и, и҆ нѣ́сть по дѣлѡ́мъ твои̑мъ. всѝ ꙗ҆зы́цы, є҆ли́ки сотвори́лъ є҆сѝ, прїи́дꙋтъ и҆ покло́нѧтсѧ пред̾ тобо́ю гдⷭ҇и, и҆ просла́вѧтъ и҆́мѧ твоѐ: ꙗ҆́кѡ ве́лїй є҆сѝ ты̀, и҆ творѧ́й чꙋдеса̀, ты̀ є҆сѝ бг҃ъ є҆ди́нъ. наста́ви мѧ̀ гдⷭ҇и, на пꙋ́ть тво́й, и҆ пойдꙋ̀ во и҆́стинѣ твое́й: да возвесели́тсѧ се́рдце моѐ, боѧ́тисѧ и҆́мене твоегѡ̀. и҆сповѣ́мсѧ тебѣ̀ гдⷭ҇и бж҃е мо́й, всѣ́мъ се́рдцемъ мои́мъ, и҆ просла́влю и҆́мѧ твоѐ въ вѣ́къ. ꙗ҆́кѡ млⷭ҇ть твоѧ̀ ве́лїѧ на мнѣ̀, и҆ и҆зба́вилъ є҆сѝ дꙋ́шꙋ мою̀ ѿ а҆́да преиспо́днѣйшагѡ. бж҃е законопрестꙋ̑пницы воста́ша на мѧ̀, и҆ со́нмъ держа́вныхъ взыска́ша дꙋ́шꙋ мою̀, и҆ не предложи́ша тебѐ пред̾ собо́ю. и҆ ты̀ гдⷭ҇и бж҃е мо́й ще́дрый и҆ млⷭ҇тивый долготерпѣли́вый и҆ многомлⷭ҇тивый, и҆ и҆́стинный: при́зри на мѧ̀, и҆ поми́лꙋй мѧ̀: да́ждь держа́вꙋ твою̀ ѻ҆́трокꙋ твоемꙋ̀, и҆ сп҃сѝ сы́на рабы̀ твоеѧ̀. сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ꙗ҆́кѡ ты̀ гдⷭ҇и помо́глъ мѝ, и҆ ѹ҆тѣ́шилъ мѧ̀ є҆сѝ.
И҆ па́ки: Сотворѝ со мно́ю зна́менїе во бл҃го: и҆ да ви́дѧтъ ненави́дѧщїи мѧ̀, и҆ постыдѧ́тсѧ, ꙗ҆́кѡ ты̀ гдⷭ҇и помо́глъ мѝ, и҆ ѹ҆тѣ́шилъ мѧ̀ є҆сѝ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Ґпⷭ҇ли, мч҃нцы и҆ прⷪ҇ро́цы, / ст҃и́телїе, прпⷣбнїи и҆ првⷣнїи, / до́брѣ по́двигъ соверши́вшїи, и҆ вѣ́рꙋ соблю́дшїи, / дерзнове́нїе и҆мꙋ́щїи ко сп҃сꙋ, / ѡ҆ на́съ того̀ ꙗ҆́кѡ бл҃га моли́те / сп҃сти́сѧ, мо́лимсѧ, дꙋша́мъ на́шымъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Помѧнѝ гдⷭ҇и ꙗ҆́кѡ бл҃гъ рабы̑ твоѧ̑, / и҆ є҆ли̑ка въ житїѝ согрѣши́ша простѝ: / никто́же бо безгрѣ́шенъ, то́кмѡ ты̀ / могі́й и ҆ преста́влєннымъ да́ти поко́й.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
И҆́же на́съ ра́ди рожде́йсѧ ѿ дв҃ы, и҆ распѧ́тїе претерпѣ́въ бл҃гі́й, и҆спрове́ргїй сме́ртїю сме́рть, и҆ воскрⷭ҇нїе ꙗ҆вле́й ꙗ҆́кѡ бг҃ъ, не пре́зри, ꙗ҆̀же созда́лъ є҆сѝ рꙋко́ю твое́ю: ꙗ҆вѝ чл҃вѣколю́бїе твоѐ млⷭ҇тиве, прїимѝ ро́ждшꙋю тѧ̀ бцⷣꙋ молѧ́щꙋюсѧ за ны̀, и҆ сп҃сѝ сп҃се на́шъ, лю́ди ѿча̑ѧнныѧ.
Не преда́ждь на́съ до конца̀, и҆́мене твоегѡ̀ ра́ди, и҆ не разорѝ завѣ́та твоегѡ̀, и҆ не ѿста́ви млⷭ҇ти твоеѧ̀ ѿ на́съ, а҆враа́ма ра́ди возлю́бленнагѡ ѿ тебѐ, и҆ за і҆саа́ка раба̀ твоего̀, и҆ і҆и҃лѧ ст҃а́го твоего̀.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Со ст҃ы́ми ѹ҆поко́й / хрⷭ҇тѐ, / дꙋ́шы ра̑бъ твои́хъ, / и҆дѣ́же нѣ́сть болѣ́знь, ни печа́ль, / ни воздыха́нїе, / но жи́знь безконе́чнаѧ.
Гдⷭ҇и поми́лꙋй, м҃.
И҆́же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю ѡ҆бѣща́нїѧ ра́ди бꙋ́дꙋщихъ бла̑гъ: са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ: дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней: ѡ҆градѝ на́съ ст҃ы́ми твои́ми а҆́гг҃лы: да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы, ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Чⷭ҇тнѣ́йшꙋю херꙋв‡мъ, и҆ сла́внѣйшꙋю без̾ сравне́нїѧ сераф‡мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
҆҆ И҆ мл҃твꙋ сїю̀ вели́кагѡ васі́лїа:
Влⷣко гдⷭ҇и, і҆и҃се хрⷭ҇тѐ бж҃е на́шъ, долготерпѣ́вый ѡ҆ на́шихъ согрѣше́нїихъ, и҆ да́же до ны́нѣшнѧгѡ часа̀ приведы́й на́съ, во́ньже на животворѧ́щемъ дре́вѣ ви́сѧ, бл҃горазꙋ́мномꙋ разбо́йникꙋ, и҆́же въ ра́й пꙋтесотвори́лъ є҆сѝ вхо́дъ, и҆ сме́ртїю сме́рть разрꙋши́лъ є҆сѝ, ѡ҆чи́сти на́съ грѣ́шныхъ и҆ недосто́йныхъ ра̑бъ твои́хъ. согрѣши́хомъ бо и҆ беззако́нновахомъ, и҆ нѣ́смы досто́йни возвестѝ ѻ҆чеса̀ на̑ша и҆ воззрѣ́ти на высотꙋ̀ нбⷭ҇нꙋю: занѐ ѡ҆ста́вихомъ пꙋ́ть пра́вды твоеѧ̀, и҆ ходи́хомъ въ во́лѧхъ серде́цъ на́шихъ. но мо́лимъ твою̀ безмѣ́рнꙋю бл҃гость, пощадѝ на́съ гдⷭ҇и, по мно́жествꙋ млⷭ҇ти твоеѧ̀, и҆ сп҃сѝ на́съ и҆́мене твоегѡ̀ ра́ди ст҃а́гѡ, ꙗ҆́кѡ и҆счезо́ша въ сꙋетѣ̀ дні́е на́ши, и҆змѝ на́съ и҆з̾ рꙋкѝ сопроти́внагѡ, и҆ ѡ҆ста́ви на́мъ грѣхѝ на́шѧ, и҆ ѹ҆мертвѝ плотско́е на́ше мꙋдрова́нїе, да ве́тхаго ѿложи́вше человѣ́ка, въ но́ваго ѡ҆блеце́мсѧ: и҆ тебѣ̀ поживе́мъ на́шемꙋ влⷣцѣ, и҆ бл҃годѣ́телю, и҆ та́кѡ твои̑мъ послѣ́дꙋюще повелѣ́нїємъ, въ вѣ́чный поко́й дости́гнемъ, и҆дѣ́же є҆́сть всѣ́хъ веселѧ́щихсѧ жили́ще, ты́ бо є҆сѝ вои́стиннꙋ и҆́стинное весе́лїе и҆ ра́дость лю́бѧщихъ тѧ̀ хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ, и҆ бл҃ги́мъ, и҆ животворѧ́щимъ твои́мъ д¦омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ начина́емъ вече́рню.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀ цр҃е́ви и҆ бг҃ꙋ на́шемꙋ.
Бл҃гословѝ дꙋшѐ моѧ̀ гдⷭ҇а: гдⷭ҇и бж҃е мо́й, возвели́чилсѧ є҆сѝ ѕѣлѡ̀, во и҆сповѣ́данїе и҆ въ велелѣ́потꙋ ѡ҆бле́клсѧ є҆сѝ. ѡ҆дѣѧ́йсѧ свѣ́томъ ꙗ҆́кѡ ри́зою, простира́ѧй нб҃о ꙗ҆́кѡ ко́жꙋ. покрыва́ѧй вода́ми превы́спрєннѧѧ своѧ̑, полага́ѧй ѻ҆́блаки на восхожде́нїе своѐ, ходѧ́й на крилꙋ̀ вѣ́трєню. творѧ́й а҆́гг҃лы своѧ̑ дꙋ́хи и҆ слꙋги̑ своѧ̑ пла́мень ѻ҆́гненный. ѡ҆снова́ѧй зе́млю на тве́рди є҆ѧ̀, не преклони́тсѧ въ вѣ́къ вѣ́ка. бе́здна, ꙗ҆́кѡ ри́за ѡ҆дѣѧ́нїе є҆ѧ̀, на гора́хъ ста́нꙋтъ во́ды. ѿ запреще́нїѧ твоегѡ̀ побѣ́гнꙋтъ, ѿ гла́са гро́ма твоегѡ̀ ѹ҆боѧ́тсѧ. восхо́дѧтъ го́ры, и҆ низхо́дѧтъ полѧ̀ въ мѣ́сто, є҆́же ѡ҆снова́лъ є҆сѝ и҆̀мъ. предѣ́лъ положи́лъ є҆сѝ, є҆гѡ́же не пре́йдꙋтъ, нижѐ ѡ҆братѧ́тсѧ покры́ти зе́млю. посыла́ѧй и҆сто́чники въ де́брѣхъ, посредѣ̀ го́ръ про́йдꙋтъ во́ды. напаѧ́ютъ всѧ̑ ѕвѣ́ри сє́льныѧ, ждꙋ́тъ ѻ҆на́гри въ жа́ждꙋ свою̀. на ты́хъ пти̑цы нбⷭ҇ныѧ привита́ютъ, ѿ среды̀ ка́менїѧ дадѧ́тъ гла́съ. напаѧ́ѧй го́ры ѿ превы́спреннихъ свои́хъ, ѿ плода̀ дѣ́лъ твои́хъ насы́титсѧ землѧ̀. прозѧба́ѧй травꙋ̀ скотѡ́мъ, и҆ ѕла́къ на слꙋ́жбꙋ человѣ́кѡмъ, и҆звестѝ хлѣ́бъ ѿ землѝ. и҆ вїно̀ весели́тъ се́рдце человѣ́ка, ѹ҆ма́стити лицѐ є҆ле́емъ, и҆ хлѣ́бъ се́рдце человѣ́ка ѹ҆крѣпи́тъ. насы́тѧтсѧ древа̀ польска̑ѧ, ке́дри лїва́нстїи, и҆̀хже є҆сѝ насади́лъ. та́мѡ пти̑цы вогнѣздѧ́тсѧ: є҆рѡді́ево жили́ще предводи́тельствꙋетъ и҆́ми. го́ры высѡ́кїѧ є҆ле́нємъ, ка́мень прибѣ́жище за́ѧцємъ. сотвори́лъ є҆́сть лꙋнꙋ̀ во времена̀, со́лнце позна̀ за́падъ сво́й. положи́лъ є҆сѝ тьмꙋ̀, и҆ бы́сть но́щь, въ не́йже про́йдꙋтъ всѝ ѕвѣ́рїе дꙋбра́внїи: скѵ́мни рыка́ющїи восхи́тити, и҆ взыска́ти ѿ бг҃а пи́щꙋ себѣ̀. возсїѧ̀ со́лнце, и҆ собра́шасѧ, и҆ въ ло́жахъ свои́хъ лѧ́гꙋтъ. и҆зы́детъ человѣ́къ на дѣ́ло своѐ, и҆ на дѣ́ланїе своѐ до ве́чера. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ: и҆спо́лнисѧ землѧ̀ тва́ри твоеѧ̀. сїѐ мо́ре вели́кое и҆ простра́нное, та́мѡ га́ди, и҆́хже нѣ́сть числа̀, живѡ́тнаѧ ма̑лаѧ съ вели́кими. та́мѡ кораблѝ препла́ваютъ, ѕмі́й се́й, є҆го́же созда́лъ є҆сѝ рꙋга́тисѧ є҆мꙋ̀. всѧ̑ къ тебѣ̀ ча́ютъ, да́ти пи́щꙋ и҆̀мъ во бл҃го вре́мѧ. да́вшꙋ тебѣ̀ и҆̀мъ, соберꙋ́тъ: ѿве́рзшꙋ тебѣ̀ рꙋ́кꙋ, всѧ́чєскаѧ и҆спо́лнѧтсѧ бл҃гости. ѿвра́щшꙋ же тебѣ̀ лицѐ возмѧтꙋ́тсѧ: ѿи́меши дꙋ́хъ и҆́хъ, и҆ и҆сче́знꙋтъ, и҆ въ пе́рсть свою̀ возвратѧ́тсѧ. по́слеши д¦а твоего̀, и҆ сози́ждꙋтсѧ, и҆ ѡ҆бнови́ши лицѐ землѝ. бꙋ́ди сла́ва гдⷭ҇нѧ во вѣ́ки, возвесели́тсѧ гдⷭ҇ь ѡ҆ дѣ́лѣхъ свои́хъ: призира́ѧй на зе́млю, и҆ творѧ́й ю҆̀ трѧсти́сѧ: прикаса́ѧйсѧ гора́мъ, и҆ дымѧ́тсѧ. воспою̀ гдⷭ҇еви въ животѣ̀ мое́мъ: пою̀ бг҃ꙋ моемꙋ̀, до́ндеже є҆́смь. да ѹ҆слади́тсѧ є҆мꙋ̀ бесѣ́да моѧ̀, а҆́зъ же возвеселю́сѧ ѡ҆ гдⷭ҇ѣ. да и҆сче́знꙋтъ грѣ̑шницы ѿ землѝ, и҆ беззакѡ́нницы, ꙗ҆́коже не бы́ти и҆̀мъ: бл҃гословѝ дꙋшѐ моѧ̀ гдⷭ҇а.
Со́лнце позна̀ за́падъ сво́й: положи́лъ є҆сѝ тьмꙋ̀ и҆ бы́сть но́щь. ꙗ҆́кѡ возвели́чишасѧ дѣла̀ твоѧ̑ гдⷭ҇и, всѧ̑ премꙋ́дростїю сотвори́лъ є҆сѝ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй, в҃і.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Та́же стїхосло́вимъ каѳї́смꙋ а҃ ѱалти́рѧ.
Бл҃же́нъ мꙋ́жъ, и҆́же не и҆́де на совѣ́тъ нечести́выхъ. Ґллилꙋ́їа. [Три́жды.] И҆ на пꙋтѝ грѣ́шныхъ не ста̀, и҆ на сѣда́лищи гꙋби́телей не сѣ́де: но въ зако́нѣ гдⷭ҇ни во́лѧ є҆гѡ̀, и҆ въ зако́нѣ є҆гѡ̀ поꙋчи́тсѧ де́нь и҆ но́щь. и҆ бꙋ́детъ ꙗ҆́кѡ дре́во насажде́ное при и҆схо́дищихъ во́дъ, є҆́же пло́дъ сво́й да́стъ во вре́мѧ своѐ, и҆ ли́стъ є҆гѡ̀ не ѿпаде́тъ: и҆ всѧ̑, є҆ли̑ка а҆́ще твори́тъ, ѹ҆спѣ́етъ. не та́кѡ нечести́вїи, не та́кѡ: но ꙗ҆́кѡ пра́хъ, є҆го́же возмета́етъ вѣ́тръ ѿ лица̀ землѝ. сегѡ̀ ра́ди не воскре́снꙋтъ нечести́вїи на сꙋ́дъ, нижѐ грѣ̑шницы въ совѣ́тъ првⷣныхъ. Ꙗ҆́кѡ вѣ́сть гдⷭ҇ь пꙋ́ть првⷣныхъ, и҆ пꙋ́ть нечести́выхъ поги́бнетъ. Ґллилꙋ́їа. [Три́жды.]
Вскꙋ́ю шата́шасѧ ꙗ҆зы́цы, и҆ лю́дїе поꙋчи́шасѧ тщє́тнымъ; предста́ша ца́рїе зе́мстїи, и҆ кнѧ̑зи собра́шасѧ вкꙋ́пѣ на гдⷭ҇а и҆ на хрⷭ҇та̀ є҆гѡ̀. расто́рггемъ ѹ҆́зы и҆́хъ и҆ ѿве́ржемъ ѿ на́съ и҆́го и҆́хъ. живы́й на нб҃сѣ́хъ посмѣе́тсѧ и҆̀мъ, и҆ гдⷭ҇ь порꙋга́етсѧ и҆̀мъ. тогда̀ возглаго́летъ къ ни̑мъ гнѣ́вомъ свои́мъ и҆ ꙗ҆́ростїю свое́ю смѧте́тъ ѧ҆̀: а҆́зъ же поста́вленъ є҆́смь цр҃ь ѿ негѡ̀ над̾ сїѡ́номъ, горо́ю ст҃о́ю є҆гѡ̀, возвѣща́ѧй повелѣ́нїе гдⷭ҇не. гдⷭ҇ь речѐ ко мнѣ̀: сн҃ъ мо́й є҆сѝ ты̀, а҆́зъ дне́сь роди́хъ тѧ̀: просѝ ѿ менѐ, и҆ да́мъ тѝ ꙗ҆зы́ки достоѧ́нїе твоѐ, и҆ ѡ҆держа́нїе твоѐ концы̀ землѝ: ѹ҆пасе́ши ѧ҆̀ жезло́мъ желѣ́знымъ, ꙗ҆́кѡ сосꙋ́ды скꙋдє́льничи сокрꙋши́ши ѧ҆̀. и҆ ны́нѣ, ца́рїе, разꙋмѣ́йте, накажи́тесѧ всѝ сꙋдѧ́щїи землѝ. Рабо́тайте гдⷭ҇еви со стра́хомъ, и҆ ра́дꙋйтесѧ є҆мꙋ̀ со тре́петомъ. Ґллилꙋ́їа. [Три́жды.] Прїими́те наказа́нїе, да не когда̀ прогнѣ́ваетсѧ гдⷭ҇ь, и҆ поги́бнете ѿ пꙋтѝ првⷣнагѡ, є҆гда̀ возгори́тсѧ вско́рѣ ꙗ҆́рость є҆гѡ̀: Бл҃же́ни всѝ надѣ́ющїисѧ на́нь. Ґллилꙋ́їа. [Три́жды.]
Гдⷭ҇и, что́ сѧ ѹ҆мно́жиша стꙋжа́ющїи мѝ; мно́зи востаю́тъ на мѧ̀, мно́зи глаго́лютъ дꙋшѝ мое́й: нѣ́сть сп҃се́нїѧ є҆мꙋ̀ въ бз҃ѣ є҆гѡ̀. ты́ же, гдⷭ҇и, застꙋ́пникъ мо́й є҆сѝ, сла́ва моѧ̀, и҆ возносѧ́й главꙋ̀ мою̀. гла́сомъ мои́мъ ко гдⷭ҇ꙋ воззва́хъ, и҆ ѹ҆слы́ша мѧ̀ ѿ горы̀ ст҃ы́ѧ своеѧ̀. а҆́зъ ѹ҆снꙋ́хъ, и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀. не ѹ҆бою́сѧ ѿ тє́мъ люде́й, ѡ҆́крестъ напа́дающихъ на мѧ̀. Воскрⷭ҇нѝ гдⷭ҇и, сп҃си́ мѧ, бж҃е мо́й. Ґллилꙋ́їа. [Три́жды.] Ꙗ҆́кѡ ты̀ порази́лъ є҆сѝ всѧ̑ враждꙋ́ющыѧ мѝ всꙋ́е, зꙋ́бы грѣ́шникѡвъ сокрꙋши́лъ є҆сѝ. Гдⷭ҇не є҆́сть сп҃се́нїе, и҆ на лю́дехъ твои́хъ бл҃гослове́нїе твоѐ. Ґллилꙋ́їа. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Внегда̀ призва́ти мѝ, ѹ҆слы́ша мѧ̀ бг҃ъ пра́вды моеѧ̀. Ґллилꙋ́їа. [Три́жды.] Въ ско́рби распространи́лъ мѧ̀ є҆сѝ: ѹ҆ще́дри мѧ̀ и҆ ѹ҆слы́ши моли́твꙋ мою̀. сы́нове человѣ́честїи, доко́лѣ тѧжкосе́рдїи; вскꙋ́ю лю́бите сꙋетꙋ̀ и҆ и҆́щете лжѝ; и҆ ѹ҆вѣ́дите, ꙗ҆́кѡ ѹ҆дивѝ гдⷭ҇ь прпⷣбнаго своего̀. гдⷭ҇ь ѹ҆слы́шитъ мѧ̀, внегда̀ воззва́ти мѝ къ немꙋ̀. гнѣ́вайтесѧ, и҆ не согрѣша́йте, ꙗ҆̀же глаго́лете въ сердца́хъ ва́шихъ, на ло́жахъ ва́шихъ ѹ҆мили́тесѧ: пожри́те же́ртвꙋ пра́вды и҆ ѹ҆пова́йте на гдⷭ҇а. мно́зи глаго́лютъ: кто̀ ꙗ҆ви́тъ на́мъ бл҃га̑ѧ; Зна́менасѧ на на́съ свѣ́тъ лица̀ твоегѡ̀, гдⷭ҇и. Ґллилꙋ́їа. [Три́жды.] Да́лъ є҆сѝ весе́лїе въ се́рдцы мое́мъ: ѿ плода̀ пшени́цы, вїна̀ и҆ є҆ле́а своегѡ̀ ѹ҆мно́жишасѧ: въ ми́рѣ вкꙋ́пѣ ѹ҆снꙋ̀ и҆ почі́ю, ꙗ҆́кѡ ты̀, гдⷭ҇и, є҆ди́наго на ѹ҆пова́нїи всели́лъ мѧ̀ є҆сѝ.
Глаго́лы моѧ̑ внꙋшѝ, гдⷭ҇и, разꙋмѣ́й зва́нїе моѐ. вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й: ꙗ҆́кѡ къ тебѣ̀ помолю́сѧ, гдⷭ҇и. заꙋ́тра ѹ҆слы́ши гла́съ мо́й: заꙋ́тра предста́нꙋ тѝ, и҆ ѹ҆́зриши мѧ̀: ꙗ҆́кѡ бг҃ъ не хотѧ́й беззако́нїѧ ты̀ є҆сѝ: не присели́тсѧ къ тебѣ̀ лꙋка́внꙋѧй, нижѐ пребꙋ́дꙋтъ беззакѡ́нницы пред̾ ѻ҆чи́ма твои́ма: возненави́дѣлъ є҆сѝ всѧ̑ дѣ́лающыѧ беззако́нїе, погꙋби́ши всѧ̑ глаго́лющыѧ лжꙋ̀: мꙋ́жа крове́й и҆ льсти́ва гнꙋша́етсѧ гдⷭ҇ь. а҆́зъ же мно́жествомъ млⷭ҇ти твоеѧ̀ вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀, въ стра́сѣ твое́мъ. гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й. ꙗ҆́кѡ нѣ́сть во ѹ҆стѣ́хъ и҆́хъ и҆́стины, се́рдце и҆́хъ сꙋ́етно, гро́бъ ѿве́рстъ горта́нь и҆́хъ, ѧ҆зы́ки свои́ми льща́хꙋ. сꙋдѝ и҆̀мъ, бж҃е, да ѿпадꙋ́тъ ѿ мы́слей свои́хъ: по мно́жествꙋ нече́стїѧ и҆́хъ и҆зри́ни ѧ҆̀, ꙗ҆́кѡ преѡгорчи́ша тѧ̀, гдⷭ҇и. И҆ да возвеселѧ́тсѧ всѝ ѹ҆пова́ющїи на тѧ̀. Ґллилꙋ́їа. [Три́жды.] Во вѣ́къ возра́дꙋютсѧ, и҆ всели́шисѧ въ ни́хъ: и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ. ꙗ҆́кѡ ты̀ бл҃гослови́ши првⷣника, гдⷭ҇и. Ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ. Ґллилꙋ́їа. [Три́жды.]
Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ. поми́лꙋй мѧ̀, гдⷭ҇и, ꙗ҆́кѡ не́мощенъ є҆́смь: и҆сцѣли́ мѧ, гдⷭ҇и, ꙗ҆́кѡ смѧто́шасѧ кѡ́сти моѧ̑, и҆ дꙋша̀ моѧ̀ смѧте́сѧ ѕѣлѡ̀: и҆ ты̀, гдⷭ҇и, доко́лѣ; Ѡ҆брати́сѧ гдⷭ҇и, и҆зба́ви дꙋ́шꙋ мою̀. Ґллилꙋ́їа. [Три́жды.] Сп҃си́ мѧ ра́ди млⷭ҇ти твоеѧ̀: ꙗ҆́кѡ нѣ́сть въ сме́рти помина́ѧй тебѐ, во а҆́дѣ же кто̀ и҆сповѣ́стсѧ тебѣ̀; ѹ҆трꙋди́хсѧ воздыха́нїемъ мои́мъ, и҆змы́ю на всѧ́кꙋ но́щь ло́же моѐ, слеза́ми мои́ми посте́лю мою̀ ѡ҆мочꙋ̀. смѧте́сѧ ѿ ꙗ҆́рости ѻ҆́ко моѐ, ѡ҆бетша́хъ во всѣ́хъ вразѣ́хъ мои́хъ. ѿстꙋпи́те ѿ менѐ, всѝ дѣ́лающїи беззако́нїе, ꙗ҆́кѡ ѹ҆слы́ша гдⷭ҇ь гла́съ пла́ча моегѡ̀, ѹ҆слы́ша гдⷭ҇ь моле́нїе моѐ, гдⷭ҇ь моли́твꙋ мою̀ прїѧ́тъ. да постыдѧ́тсѧ и҆ смѧтꙋ́тсѧ всѝ вразѝ моѝ. Да возвратѧ́тсѧ и҆ ѹ҆стыдѧ́тсѧ ѕѣлѡ̀ вско́рѣ. Ґллилꙋ́їа. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Гдⷭ҇и бж҃е мо́й, на тѧ̀ ѹ҆пова́хъ. Ґллилꙋ́їа. [Три́жды.] Сп҃си́ мѧ ѿ всѣ́хъ гонѧ́щихъ мѧ̀ и҆ и҆зба́ви мѧ̀: да не когда̀ похи́титъ ꙗ҆́кѡ ле́въ дꙋ́шꙋ мою̀, не сꙋ́щꙋ и҆збавлѧ́ющꙋ, нижѐ спаса́ющꙋ. гдⷭ҇и бж҃е мо́й, а҆́ще сотвори́хъ сїѐ, а҆́ще є҆́сть непра́вда въ рꙋкꙋ̀ моє́ю, а҆́ще возда́хъ воздаю́щымъ мѝ ѕла̑, да ѿпадꙋ̀ ѹ҆̀бо ѿ вра̑гъ мои́хъ то́щъ: да пожене́тъ ѹ҆́бѡ вра́гъ дꙋ́шꙋ мою̀, и҆ да пости́гнетъ, и҆ попере́тъ въ зе́млю живо́тъ мо́й, и҆ сла́вꙋ мою̀ въ пе́рсть всели́тъ. воскрⷭ҇нѝ, гдⷭ҇и, гнѣ́вомъ твои́мъ, вознеси́сѧ въ конца́хъ вра̑гъ твои́хъ. И҆ воста́ни, гдⷭ҇и бж҃е мо́й, повелѣ́нїемъ, и҆́мже заповѣ́далъ є҆сѝ. Ґллилꙋ́їа. [Три́жды.] И҆ со́нмъ люде́й ѡ҆бы́детъ тѧ̀: и҆ ѡ҆ то́мъ на высотꙋ̀ ѡ҆брати́сѧ. гдⷭ҇ь сꙋ́дитъ лю́демъ: сꙋди́ ми, гдⷭ҇и, по пра́вдѣ мое́й и҆ по неѕло́бѣ мое́й на мѧ̀. да сконча́етсѧ ѕло́ба грѣ́шныхъ, и҆ и҆спра́виши првⷣнаго, и҆спыта́ѧй сердца̀ и҆ ѹ҆трѡ́бы, бж҃е, првⷣнѡ. по́мощь моѧ̀ ѿ бг҃а, сп҃са́ющагѡ пра̑выѧ се́рдцемъ. бг҃ъ сꙋди́тель првⷣнъ, и҆ крѣ́покъ, и҆ долготерпѣли́въ, и҆ не гнѣ́въ наводѧ́й на всѧ́къ де́нь. а҆́ще не ѡ҆братите́сѧ, ѻ҆рꙋ́жїе своѐ ѡ҆чи́ститъ, лꙋ́къ сво́й напрѧжѐ, и҆ ѹ҆гото́ва и҆̀, и҆ въ не́мъ ѹ҆гото́ва сосꙋ́ды смє́ртныѧ, стрѣ́лы своѧ̑ сгара́ємымъ содѣ́ла. сѐ, болѣ̀ непра́вдою, зача́тъ болѣ́знь и҆ родѝ беззако́нїе: ро́въ и҆зры̀ и҆ и҆скопа̀ и҆̀, и҆ паде́тъ въ ꙗ҆́мꙋ, ю҆́же содѣ́ла. ѡ҆брати́тсѧ болѣ́знь є҆гѡ̀ на главꙋ̀ є҆гѡ̀, и҆ на ве́рхъ є҆гѡ̀ непра́вда є҆гѡ̀ сни́детъ. И҆сповѣ́мсѧ гдⷭ҇еви по пра́вдѣ є҆гѡ̀ и҆ пою̀ и҆́мени гдⷭ҇а вы́шнѧгѡ. Ґллилꙋ́їа. [Три́жды.]
Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ, ꙗ҆́кѡ взѧ́тсѧ великолѣ́пїе твоѐ превы́ше нб҃съ. И҆з̾ ѹ҆́стъ младе́нєцъ и҆ ссꙋ́щихъ соверши́лъ є҆сѝ хвалꙋ̀. Ґллилꙋ́їа. [Три́жды.] Вра̑гъ твои́хъ ра́ди, є҆́же разрꙋши́ти врага̀ и҆ ме́стника. ꙗ҆́кѡ ѹ҆зрю̀ небеса̀, дѣла̀ пє́рстъ твои́хъ, лꙋнꙋ̀ и҆ ѕвѣ́зды, ꙗ҆̀же ты̀ ѡ҆снова́лъ є҆сѝ: что̀ є҆́сть человѣ́къ, ꙗ҆́кѡ по́мниши є҆го̀; и҆лѝ сы́нъ человѣ́чь, ꙗ҆́кѡ посѣща́еши є҆го̀; ѹ҆ма́лилъ є҆сѝ є҆го̀ ма́лымъ чи́мъ ѿ а҆́гг҃лъ. Сла́вою и҆ че́стїю вѣнча́лъ є҆сѝ є҆го̀. Ґллилꙋ́їа. [Три́жды.] И҆ поста́вилъ є҆сѝ є҆го̀ над̾ дѣ́лы рꙋкꙋ̀ твоє́ю, всѧ̑ покори́лъ є҆сѝ под̾ но́зѣ є҆гѡ̀: ѻ҆́вцы и҆ волы̀ всѧ̑, є҆ще́ же и҆ скоты̀ пѡльскі́ѧ, пти̑цы небє́сныѧ и҆ ры̑бы морск‡ѧ, преходѧ́щыѧ стєзѝ морск‡ѧ. Гдⷭ҇и гдⷭ҇ь на́шъ, ꙗ҆́кѡ чꙋ́дно и҆́мѧ твоѐ по все́й землѝ. Ґллилꙋ́їа. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Гдⷭ҇и, воззва́хъ къ тебЁ, ᲂу҆слы́ши мѧ̀. / ᲂу҆слы́ши мѧ̀ гдⷭ҇и.
Гдⷭ҇и, воззва́хъ къ тебѣ̀, ѹ҆слы́ши мѧ̀: / вонмѝ гла́сꙋ моле́нїѧ моегѡ̀, / внегда̀ воззва́ти мѝ къ тебѣ̀. / ѹ҆слы́ши мѧ̀ гдⷭ҇и.
Да и҆спра́витсѧ мл҃тва моѧ̀, / ꙗ҆́кѡ кади́ло пред̾ тобо́ю, / воздѣѧ́нїе рꙋкꙋ̀ моє́ю, / же́ртва вече́рнѧѧ. / ѹ҆слы́ши мѧ̀ гдⷭ҇и.
И҆ по чи́нꙋ стїхѝ: Положѝ, гдⷭ҇и, хране́нїе ѹ҆стѡ́мъ мои̑мъ, и҆ две́рь ѡ҆гражде́нїѧ ѡ҆ ѹ҆стна́хъ мои́хъ. не ѹ҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ. съ человѣ́ки дѣ́лающими беззако́нїе, и҆ не сочтꙋ́сѧ со и҆збра́нными и҆́хъ. нака́жетъ мѧ̀ пра́ведникъ млⷭ҇тїю, и҆ ѡ҆бличи́тъ мѧ̀: є҆ле́й же грѣ́шнагѡ да не нама́ститъ главы̀ моеѧ̀. ꙗ҆́кѡ є҆щѐ и҆ мл҃тва моѧ̀ во бл҃говоле́нїихъ и҆́хъ, поже́рты бы́ша при ка́мени сꙋдїи̑ и҆́хъ. ѹ҆слы́шатсѧ глаго́ли моѝ, ꙗ҆́кѡ возмого́ша: ꙗ҆́кѡ то́лща землѝ просѣ́десѧ на землѝ, расточи́шасѧ кѡ́сти и҆́хъ при а҆́дѣ. ꙗ҆́кѡ къ тебѣ̀ гдⷭ҇и, гдⷭ҇и, ѻ҆́чи моѝ, на тѧ̀ ѹ҆пова́хъ, не ѿимѝ дꙋ́шꙋ мою̀. сохрани́ мѧ ѿ сѣ́ти, ю҆́же соста́виша мѝ, и҆ ѿ собла̑знъ дѣ́лающихъ беззако́нїе. падꙋ́тъ во мре́жꙋ свою̀ грѣ̑шницы: є҆ди́нъ є҆́смь а҆́зъ, до́ндеже прейдꙋ̀.
Гла́сомъ мои́мъ ко гдⷭ҇ꙋ воззва́хъ, гла́сомъ мои́мъ ко гдⷭ҇ꙋ помоли́хсѧ. пролїю̀ пред̾ ни́мъ моле́нїе моѐ, печа́ль мою̀ пред̾ ни́мъ возвѣщꙋ̀. внегда̀ и҆счеза́ти ѿ менє̀ дꙋ́хꙋ моемꙋ̀, и҆ ты̀ позна́лъ є҆сѝ стєзѝ моѧ̑. на пꙋтѝ се́мъ, по немꙋ́же хожда́хъ, скры́ша сѣ́ть мнѣ̀. смотрѧ́хъ ѡ҆деснꙋ́ю и҆ возглѧ́дахъ, и҆ не бѣ̀ зна́ѧй менє̀. поги́бе бѣ́гство ѿ менє̀, и҆ нѣ́сть взыска́ѧй дꙋ́шꙋ мою̀. воззва́хъ къ тебѣ̀ гдⷭ҇и, рѣ́хъ: ты̀ є҆сѝ ѹ҆пова́нїе моѐ, ча́сть моѧ̀ є҆сѝ на землѝ живы́хъ. вонмѝ моле́нїю моемꙋ̀, ꙗ҆́кѡ смири́хсѧ ѕѣлѡ̀: и҆зба́ви мѧ̀ ѿ гонѧ́щихъ мѧ̀, ꙗ҆́кѡ ѹ҆крѣпи́шасѧ па́че менє̀.
Сті́хъ: И҆зведѝ и҆з̾ темни́цы дꙋ́шꙋ мою̀, и҆сповѣ́датисѧ и҆́мени твоемꙋ̀.
Побѣ́дꙋ и҆мѣ́ѧ хрⷭ҇тѐ, ю҆́же на а҆́да, / на крⷭ҇тъ возше́лъ є҆сѝ: / да во тьмѣ̀ сме́рти сѣдѧ́щыѧ воскр҃си́ши съ собо́ю, / и҆́же въ ме́ртвыхъ свобо́дь, / и҆сточа́ѧй живо́тъ ѿ своегѡ̀ свѣ́та, / всеси́льне сп҃се, поми́лꙋй на́съ.
Сті́хъ: Менѐ ждꙋ́тъ првⷣницы, до́ндеже возда́си мнѣ̀.
Дне́сь хрⷭ҇то́съ сме́рть попра́въ, / ꙗ҆́коже речѐ, воскр҃се, / и҆ ра́дованїе мі́рови дарова̀, / да всѝ взыва́юще, пѣ́снь та́кѡ рце́мъ: / и҆сто́чниче жи́зни, непристꙋ́пный свѣ́те, / всеси́льне сп҃се, поми́лꙋй на́съ.
Сті́хъ: И҆з̾ глꙋбины̀ воззва́хъ къ тебѣ̀ гдⷭ҇и, гдⷭ҇и, ѹ҆слы́ши гла́съ мо́й.
Тебѐ гдⷭ҇и, сꙋ́щагѡ по все́й тва́ри, / грѣ́шнїи ка́мѡ бѣжи́мъ; / на нб҃сѝ са́мъ живе́ши, / во а҆́дѣ попра́лъ є҆сѝ сме́рть, / во глꙋбины̑ мѡрскі́ѧ; / та́мѡ рꙋка̀ твоѧ̀ влⷣко. / къ тебѣ̀ прибѣга́емъ, / тебѣ̀ припа́дающе мо́лимсѧ: / воскр҃сы́й и҆з̾ ме́ртвыхъ поми́лꙋй на́съ.
҆҆ И҆́ны стїхи̑ры а҆натѡ́лїевы, гла́съ то́йже.
Сті́хъ: Да бꙋ́дꙋтъ ѹ҆́ши твоѝ, вне́млющѣ гла́сꙋ моле́нїѧ моегѡ̀.
Крⷭ҇то́мъ твои́мъ хрⷭ҇тѐ хва́лимсѧ, / и҆ воскрⷭ҇нїе твоѐ пое́мъ и҆ сла́вимъ: / ты́ бо є҆сѝ бг҃ъ на́шъ. / ра́звѣ тебѐ и҆на́гѡ не вѣ́мы.
Сті́хъ: А҆́ще беззакѡ́нїѧ на́зриши гдⷭ҇и, гдⷭ҇и, кто̀ постои́тъ; ꙗ҆́кѡ ѹ҆ тебѐ ѡ҆чище́нїе є҆́сть.
Вы́нꙋ бл҃гословѧ́ще гдⷭ҇а, / пое́мъ воскрⷭ҇нїе є҆гѡ̀: / крⷭ҇тъ бо претерпѣ́въ, / сме́ртїю сме́рть погꙋбѝ.
Сті́хъ: И҆́мене ра́ди твоегѡ̀ потерпѣ́хъ тѧ̀ гдⷭ҇и, потерпѣ̀ дꙋша̀ моѧ̀ въ сло́во твоѐ, ѹ҆пова̀ дꙋша̀ моѧ̀ на гдⷭ҇а.
Сла́ва си́лѣ твое́й гдⷭ҇и, / ꙗ҆́кѡ ѹ҆праздни́лъ є҆сѝ держа́вꙋ и҆мꙋ́щагѡ сме́рти: / ѡ҆бнови́лъ є҆сѝ на́съ крⷭ҇то́мъ твои́мъ, / да́рꙋѧ на́мъ живо́тъ и҆ нетлѣ́нїе.
Сті́хъ: Ѿ стра́жи ѹ҆́треннїѧ до но́щи, ѿ стра́жи ѹ҆́треннїѧ, да ѹ҆пова́етъ і҆и҃ль на гдⷭ҇а.
Погребе́нїе твоѐ гдⷭ҇и, / ѹ҆́зы а҆́дѡвы сокрꙋши́вшее растерза̀: / є҆́же и҆з̾ ме́ртвыхъ воскрⷭ҇нїемъ мі́ръ просвѣтѝ, / гдⷭ҇и сла́ва тебѣ̀.
҆҆ И҆́ны стїхи̑ры бцⷣѣ, творе́нїе па́ѵла а҆морре́йскагѡ, гла́съ г҃:
Сті́хъ: Ꙗ҆́кѡ ѹ҆ гдⷭ҇а млⷭ҇ть, и҆ мно́гое ѹ҆ негѡ̀ и҆збавле́нїе, и҆ то́й и҆зба́витъ і҆и҃лѧ ѿ всѣ́хъ беззако́нїй є҆гѡ̀.
Ви́дѧщи не́мощь мою̀ тѣле́снꙋю, / и҆ дꙋше́вное страда́нїе, / и҆ серде́чное ѡ҆ѕлобле́нїе, / посѣще́нїѧ сподо́би мѧ̀ бж҃е́ственнагѡ, / всенепоро́чнаѧ дв҃о, сп҃си́ мѧ, молю́сѧ, / те́плыми твои́ми мл҃твами.
Сті́хъ: Хвали́те гдⷭ҇а всѝ ꙗ҆зы́цы, похвали́те є҆го̀ всѝ лю́дїе.
Всѣ́хъ преидо́хъ влⷣчце, согрѣше́ньми: / но мно́жєства си́хъ дв҃о ѡ҆чи́щши, / ми́лостей полꙋчи́ти мѝ чⷭ҇таѧ, сподо́би, / въ бꙋ́дꙋщемъ сꙋдѣ̀ сн҃а и҆ бг҃а твоегѡ̀.
Сті́хъ: Ꙗ҆́кѡ ѹ҆тверди́сѧ млⷭ҇ть є҆гѡ̀ на на́съ, и҆ и҆́стина гдⷭ҇нѧ пребыва́етъ во вѣ́къ.
Мно́жество согрѣше́нїй мои́хъ, зовꙋ́щагѡ / ѡ҆чи́сти чи́стаѧ, / и҆ чꙋ́вствїй мои́хъ неꙋста̑внаѧ движє́нїѧ, / моли́твеннымъ мече́мъ ссѣцы̀: / ꙗ҆́кѡ да вѣ́рою и҆ любо́вїю пою̀ / твоѐ безсѣ́менное ржⷭ҇тво̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ, гла́съ ѕ҃: Кто̀ тебѐ не ѹ҆бл҃жи́тъ прест҃а́ѧ дв҃о; / кто́ ли не воспое́тъ твоегѡ̀ пречⷭ҇тагѡ ржⷭ҇тва̀; / безлѣ́тнѡ бо ѿ ѻ҆ц҃а̀ возсїѧ́вый сн҃ъ є҆диноро́дный, / то́йже ѿ тебѐ чⷭ҇тыѧ про́йде, / неизрече́ннѡ вопло́щьсѧ, / є҆стество́мъ бг҃ъ сы́й, / и҆ є҆стество́мъ бы́въ чл҃вѣ́къ на́съ ра́ди, / не во двою̀ лицꙋ̑ раздѣлѧ́емый, / но во двою̀ є҆стєствꙋ̀ несли́тнѡ познава́емый. / того̀ молѝ чⷭ҇таѧ, всебл҃же́ннаѧ, / поми́ловатисѧ дꙋша́мъ на́шымъ.
҆҆ Творе́нїе сѡфро́нїа, патрїа́рха і҆ерⷭ҇ли́мскагѡ.
Свѣ́те ти́хїй ст҃ы́ѧ сла́вы, / безсме́ртнагѡ, ѻ҆ц҃а̀ нбⷭ҇нагѡ, / ст҃а́гѡ бл҃же́ннагѡ, і҆и҃се хрⷭ҇тѐ, / прише́дше на за́падъ со́лнца, / ви́дѣвше свѣ́тъ вече́рнїй, / пое́мъ ѻ҆ц҃а̀, сн҃а, и҆ ст҃а́го д¦а, бг҃а. / досто́инъ є҆сѝ во всѧ̑ времена̀ / пѣ́тъ бы́ти гла́сы преподо́бными, / сн҃е бж҃їй, живо́тъ даѧ́й: / тѣ́мже мі́ръ тѧ̀ сла́витъ.
Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Сті́хъ: Ѡ҆блече́сѧ гдⷭ҇ь въ си́лꙋ, и҆ препоѧ́сасѧ.
Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Сті́хъ: И҆́бо ѹ҆твердѝ вселе́ннꙋю, ꙗ҆̀же не подви́житсѧ.
Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Гдⷭ҇ь воцр҃и́сѧ.
Въ лёпоту ѡ҆блече́сѧ.
И҆ а҆́бїе, Гдⷭ҇и поми́лꙋй, м҃.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Сподо́би гдⷭ҇и въ ве́черъ се́й без̾ грѣха̀ сохрани́тисѧ на́мъ. / бл҃гослове́нъ є҆сѝ гдⷭ҇и бж҃е ѻ҆тє́цъ на́шихъ, / и҆ хва́льно и҆ просла́влено и҆́мѧ твоѐ во вѣ́ки, а҆ми́нь. / бꙋ́ди гдⷭ҇и, млⷭ҇ть твоѧ̀ на на́съ, ꙗ҆́коже ѹ҆пова́хомъ на тѧ̀. / бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. / бл҃гослове́нъ є҆сѝ влⷣко, вразꙋми́ мѧ ѡ҆правда́нїємъ твои̑мъ. / бл҃гослове́нъ є҆сѝ ст҃ы́й, просвѣти́ мѧ ѡ҆правда́нїи твои́ми. / гдⷭ҇и, млⷭ҇ть твоѧ̀ во вѣ́къ, дѣ́лъ рꙋкꙋ̀ твоє́ю не пре́зри: / тебѣ̀ подоба́етъ хвала̀, тебѣ̀ подоба́етъ пѣ́нїе, / тебѣ̀ сла́ва подоба́етъ, ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, / ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Та́же, Гдⷭ҇и поми́лꙋй, в҃і.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
И҆ пое́мъ стїхи̑ры стїхо́вны, въ ни́хже глаго́лемъ настоѧ́щыѧ стїхѝ.
Воскрⷭ҇нїе твоѐ хрⷭ҇тѐ сп҃се, / а҆́гг҃ли пою́тъ на нб҃сѣ́хъ, / и҆ на́съ на землѝ сподо́би, / чⷭ҇тымъ се́рдцемъ / тебѐ сла́вити.
Сті́хъ: Гдⷭ҇ь воцр҃и́сѧ, въ лѣ́потꙋ ѡ҆блече́сѧ.
Врата̀ сокрꙋши́въ мѣ̑днаѧ, / и҆ верєѝ а҆́дѡвы сотры́й, / ꙗ҆́кѡ бг҃ъ всеси́ленъ, / ро́дъ человѣ́ческїй па́дшїй воскр҃си́лъ є҆сѝ. / сегѡ̀ ра́ди и҆ мы̀ согла́снѡ вопїе́мъ: / воскр҃сы́й и҆з̾ ме́ртвыхъ, гдⷭ҇и сла́ва тебѣ̀.
Сті́хъ: И҆́бо ѹ҆твердѝ вселе́ннꙋю, ꙗ҆́же не подви́житсѧ.
Тлѣ́нїѧ на́съ дре́внѧгѡ хрⷭ҇то́съ и҆спра́вити хотѧ̀, / на крⷭ҇тѣ̀ пригвожда́етсѧ, / и҆ во гро́бѣ полага́етсѧ, / є҆го́же мѷронѡ́сицы жєны̀ со слеза́ми и҆ска́хꙋ, пла́чꙋщѧ глаго́лахꙋ: / ѹ҆вы̀ на́мъ сп҃се всѣ́хъ, / ка́кѡ и҆зво́лилъ є҆сѝ во гро́бѣ всели́тисѧ; / всели́выйсѧ же хотѧ̀, ка́кѡ ѹ҆кра́денъ бы́лъ є҆сѝ; / ка́кѡ преложи́лсѧ є҆сѝ; / ко́е же мѣ́сто твоѐ живоно́сное сокры̀ тѣ́ло; / но влⷣко, ꙗ҆́кѡ ѡ҆бѣща́лсѧ є҆сѝ на́мъ ꙗ҆ви́сѧ, / и҆ ѹ҆толѝ ѿ на́съ рыда́нїе сле́зъ. / пла́чꙋщымсѧ же и҆̀мъ, а҆́гг҃лъ къ ни̑мъ возопѝ: / ѿ пла́ча преста́вшѧ а҆пⷭ҇лѡмъ рцы́те, ꙗ҆́кѡ воскр҃се гдⷭ҇ь, / мі́рови да́рꙋѧ ѡ҆чище́нїе, и҆ ве́лїю млⷭ҇ть.
Сті́хъ: До́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.
Распны́йсѧ ꙗ҆́кѡ восхотѣ́лъ є҆сѝ хрⷭ҇тѐ, / и҆ сме́рть погребе́нїемъ твои́мъ плѣни́вый, / тридне́венъ воскрⷭ҇лъ є҆сѝ, ꙗ҆́кѡ бг҃ъ со сла́вою, / мі́рови да́рꙋѧ безконе́чнꙋю жи́знь, / и҆ ве́лїю млⷭ҇ть.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Творе́цъ и҆ и҆зба́витель мо́й пречⷭ҇таѧ, / хрⷭ҇то́съ гдⷭ҇ь и҆з̾ твои́хъ ложе́снъ проше́дъ, / въ мѧ̀ ѡ҆болкі́йсѧ, / пе́рвыѧ клѧ́твы а҆да́ма свободѝ. / тѣ́мже тѝ всечⷭ҇таѧ, / ꙗ҆́кѡ бж҃їи мт҃ри же и҆ дв҃ѣ, / вои́стиннꙋ вопїе́мъ немо́лчнѡ: / ра́дꙋйсѧ а҆́гг҃льски, ра́дꙋйсѧ влⷣчце, / предста́тельство и҆ покро́ве, / и҆ сп҃се́нїе дꙋ́шъ на́шихъ.
҆҆ Мл҃тва ст҃а́гѡ сѷмеѡ́на бг҃опрїи́мца:
Ны́нѣ ѿпꙋща́еши раба̀ твоего̀, влⷣко, / по глаго́лꙋ твоемꙋ̀, съ ми́ромъ: / ꙗ҆́кѡ ви́дѣста ѻ҆́чи моѝ сп҃се́нїе твоѐ, / є҆́же є҆сѝ ѹ҆гото́валъ пред̾ лице́мъ всѣ́хъ люде́й, / свѣ́тъ во ѿкрове́нїе ꙗ҆зы́кѡвъ, / и҆ сла́вꙋ люде́й твои́хъ і҆и҃лѧ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Бцⷣе дв҃о ра́дꙋйсѧ, / бл҃года́тнаѧ мр҃і́е, гдⷭ҇ь съ тобо́ю: / бл҃гослове́на ты̀ въ жена́хъ, и҆ бл҃гослове́нъ пло́дъ чре́ва твоегѡ̀, / ꙗ҆́кѡ сп҃са родила̀ є҆сѝ дꙋ́шъ на́шихъ. [Три́жды.]
Бꙋ́ди и҆́мѧ гдⷭ҇не блгⷭ҇ве́но ѿ ны́нѣ и҆ до вѣ́ка. [Три́жды.]
Бл҃гословлю̀ гдⷭ҇а на всѧ́кое вре́мѧ, / вы́нꙋ хвала̀ є҆гѡ̀ во ѹ҆стѣ́хъ мои́хъ. / ѡ҆ гдⷭ҇ѣ похва́литсѧ дꙋша̀ моѧ̀, / да ѹ҆слы́шатъ кро́тцыи, и҆ возвеселѧ́тсѧ. / возвели́чите гдⷭ҇а со мно́ю, / и҆ вознесе́мъ и҆́мѧ є҆гѡ̀ вкꙋ́пѣ. / взыска́хъ гдⷭ҇а, и҆ ѹ҆слы́ша мѧ̀, / и҆ ѿ всѣ́хъ скорбе́й мои́хъ и҆зба́ви мѧ̀. / пристꙋпи́те къ немꙋ̀, и҆ просвѣти́тесѧ, / и҆ ли́ца ва̑ша не постыдѧ́тсѧ. / се́й ни́щїй воззва̀, и҆ гдⷭ҇ь ѹ҆слы́ша и҆̀, / и҆ ѿ всѣ́хъ скорбе́й є҆гѡ̀ сп҃сѐ и҆̀. / ѡ҆полчи́тсѧ а҆́гг҃лъ гдⷭ҇нь ѡ҆́крестъ боѧ́щихсѧ є҆гѡ̀, / и҆ и҆зба́витъ и҆̀хъ. / вкꙋси́те и҆ ви́дите, ꙗ҆́кѡ бл҃гъ гдⷭ҇ь: / бл҃же́нъ мꙋ́жъ, и҆́же ѹ҆пова́етъ на́нь. / бо́йтесѧ гдⷭ҇а всѝ ст҃і́и є҆гѡ̀, / ꙗ҆́кѡ нѣ́сть лише́нїѧ боѧ́щымсѧ є҆гѡ̀. / бога́тїи ѡ҆бнища́ша и҆ взалка́ша, / взыска́ющїи же гдⷭ҇а не лиша́тсѧ всѧ́кагѡ бл҃га.
И҆ начина́емъ шестоѱа́лмїе.
Начина́емъ шестоѱа́лмїе, со всѧ́кимъ молча́нїемъ и҆ ѹ҆миле́нїемъ слꙋ́шающе: ѹ҆чине́нный же бра́тъ со бл҃гоговѣ́нїемъ и҆ стра́хомъ бж҃їимъ глаго́летъ:
Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. [Три́жды.]
Гдⷭ҇и, ѹ҆стнѣ̀ моѝ ѿве́рзеши, и҆ ѹ҆ста̀ моѧ̑ возвѣстѧ́тъ хвалꙋ̀ твою̀. [Два́жды.]
Гдⷭ҇и, что́ сѧ ѹ҆мно́жиша стꙋжа́ющїи мѝ; мно́зи востаю́тъ на мѧ̀, мно́зи глаго́лютъ дꙋшѝ мое́й: нѣ́сть спⷭ҇нїѧ є҆мꙋ̀ въ бз҃ѣ є҆гѡ̀. ты́ же, гдⷭ҇и, застꙋ́пникъ мо́й є҆сѝ, сла́ва моѧ̀, и҆ возносѧ́й главꙋ̀ мою̀. гла́сомъ мои́мъ ко гдⷭ҇ꙋ воззва́хъ, и҆ ѹ҆слы́ша мѧ̀ ѿ горы̀ ст҃ы́ѧ своеѧ̀. а҆́зъ ѹ҆снꙋ́хъ, и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀. не ѹ҆бою́сѧ ѿ тє́мъ люде́й, ѡ҆́крестъ напа́дающихъ на мѧ̀. воскрⷭ҇нѝ, гдⷭ҇и, сп҃си́ мѧ, бж҃е мо́й: ꙗ҆́кѡ ты̀ порази́лъ є҆сѝ всѧ̑ враждꙋ́ющыѧ мѝ всꙋ́е, зꙋ́бы грѣ́шникѡвъ сокрꙋши́лъ є҆сѝ. гдⷭ҇не є҆́сть спⷭ҇нїе, и҆ на лю́дехъ твои́хъ блгⷭ҇ве́нїе твоѐ.
А҆́зъ ѹ҆снꙋ́хъ и҆ спа́хъ, воста́хъ, ꙗ҆́кѡ гдⷭ҇ь застꙋ́питъ мѧ̀.
Гдⷭ҇и, да не ꙗ҆́ростїю твое́ю ѡ҆бличи́ши менѐ, нижѐ гнѣ́вомъ твои́мъ нака́жеши менѐ. ꙗ҆́кѡ стрѣ́лы твоѧ̑ ѹ҆нзо́ша во мнѣ̀, и҆ ѹ҆тверди́лъ є҆сѝ на мнѣ̀ рꙋ́кꙋ твою̀. нѣ́сть и҆сцѣле́нїѧ въ пло́ти мое́й ѿ лица̀ гнѣ́ва твоегѡ̀, нѣ́сть ми́ра въ костѣ́хъ мои́хъ, ѿ лица̀ грѣ̑хъ мои́хъ. ꙗ҆́кѡ беззакѡ́нїѧ моѧ̑ превзыдо́ша главꙋ̀ мою̀, ꙗ҆́кѡ бре́мѧ тѧ́жкое ѡ҆тѧготѣ́ша на мнѣ̀. возсмердѣ́ша и҆ согни́ша ра̑ны моѧ̑ ѿ лица̀ безꙋ́мїѧ моегѡ̀. пострада́хъ и҆ слѧко́хсѧ до конца̀, ве́сь де́нь сѣ́тꙋѧ хожда́хъ. ꙗ҆́кѡ лѧ̑двїѧ моѧ̑ напо́лнишасѧ порꙋга́нїй, и҆ нѣ́сть и҆сцѣле́нїѧ въ пло́ти мое́й. ѡ҆ѕло́бленъ бы́хъ, и҆ смири́хсѧ до ѕѣла̀: рыка́хъ ѿ воздыха́нїѧ се́рдца моегѡ̀. гдⷭ҇и, пред̾ тобо́ю всѐ жела́нїе моѐ, и҆ воздыха́нїе моѐ ѿ тебѐ не ѹ҆таи́сѧ. се́рдце моѐ смѧте́сѧ, ѡ҆ста́ви мѧ̀ си́ла моѧ̀, и҆ свѣ́тъ ѻ҆́чїю моє́ю, и҆ то́й нѣ́сть со мно́ю. дрꙋ́зи моѝ и҆ и҆́скреннїи моѝ, прѧ́мѡ мнѣ̀ прибли́жишасѧ и҆ ста́ша. и҆ бли́жнїи моѝ ѿдале́че менѐ ста́ша, и҆ нꙋжда́хꙋсѧ и҆́щꙋщїи дꙋ́шꙋ мою̀, и҆ и҆́щꙋщїи ѕла̑ѧ мнѣ̀, глаго́лахꙋ сꙋ́єтнаѧ, и҆ льсти̑внымъ ве́сь де́нь поꙋча́хꙋсѧ. а҆́зъ же ꙗ҆́кѡ глꙋ́хъ не слы́шахъ, и҆ ꙗ҆́кѡ нѣ́мъ не ѿверза́ѧй ѹ҆́стъ свои́хъ. и҆ бы́хъ ꙗ҆́кѡ человѣ́къ не слы́шай, и҆ не и҆мы́й во ѹ҆стѣ́хъ свои́хъ ѡ҆бличе́нїѧ. ꙗ҆́кѡ на тѧ̀ гдⷭ҇и, ѹ҆пова́хъ, ты̀ ѹ҆слы́шиши гдⷭ҇и бж҃е мо́й. ꙗ҆́кѡ рѣ́хъ: да не когда̀ пора́дꙋютъ ми́ сѧ вразѝ моѝ, и҆ внегда̀ подвижа́тисѧ нога́мъ мои̑мъ, на мѧ̀ велерѣ́чеваша. ꙗ҆́кѡ а҆́зъ на ра̑ны гото́въ, и҆ болѣ́знь моѧ̀ предо мно́ю є҆́сть вы́нꙋ. ꙗ҆́кѡ беззако́нїе моѐ а҆́зъ возвѣщꙋ̀, и҆ попекꙋ́сѧ ѡ҆ грѣсѣ̀ мое́мъ. врази́ же моѝ живꙋ́тъ, и҆ ѹ҆крѣпи́шасѧ па́че менѐ, и҆ ѹ҆мно́жишасѧ ненави́дѧщїи мѧ̀ без̾ пра́вды. воздаю́щїи мѝ ѕла̑ѧ воз̾ блага̑ѧ, ѡ҆болга́хꙋ мѧ̀, занѐ гонѧ́хъ бл҃госты́ню. не ѡ҆ста́ви менѐ, гдⷭ҇и бж҃е мо́й, не ѿстꙋпѝ ѿ менѐ. вонмѝ въ по́мощь мою̀, гдⷭ҇и сп҃се́нїѧ моегѡ̀.
Не ѡ҆ста́ви менѐ, гдⷭ҇и бж҃е мо́й, не ѿстꙋпѝ ѿ менѐ. вонмѝ въ по́мощь мою̀, гдⷭ҇и сп҃се́нїѧ моегѡ̀.
Бж҃е бж҃е мо́й, къ тебѣ̀ ѹ҆́треннюю: возжада̀ тебѐ дꙋша̀ моѧ̀, ко́ль мно́жицею тебѣ̀ пло́ть моѧ̀, въ землѝ пꙋ́стѣ, и҆ непрохо́днѣ, и҆ безво́днѣ. та́кѡ во ст҃ѣ́мъ ꙗ҆ви́хсѧ тебѣ̀, ви́дѣти си́лꙋ твою̀ и҆ сла́вꙋ твою̀. ꙗ҆́кѡ лꙋ́чши ми́лость твоѧ̀ па́че живѡ́тъ, ѹ҆стнѣ̀ моѝ похвали́тѣ тѧ̀. та́кѡ бл҃гословлю́ тѧ въ животѣ̀ мое́мъ, ѡ҆ и҆́мени твое́мъ воздѣжꙋ̀ рꙋ́цѣ моѝ. ꙗ҆́кѡ ѿ тꙋ́ка и҆ ма́сти да и҆спо́лнитсѧ дꙋша̀ моѧ̀, и҆ ѹ҆стна́ма ра́дости восхва́лѧтъ тѧ̀ ѹ҆ста̀ моѧ̑. а҆́ще помина́хъ тѧ̀ на посте́ли мое́й, на ѹ҆́треннихъ поꙋча́хꙋсѧ въ тѧ̀. ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̀ твоє́ю возра́дꙋюсѧ. прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀. ті́и же всꙋ́е и҆ска́ша дꙋ́шꙋ мою̀, вни́дꙋтъ въ преиспѡ́днѧѧ землѝ: предадѧ́тсѧ въ рꙋ́ки ѻ҆рꙋ́жїѧ, ча̑сти ли́совѡмъ бꙋ́дꙋтъ. ца́рь же возвесели́тсѧ ѡ҆ бз҃ѣ, похва́литсѧ всѧ́къ клены́йсѧ и҆́мъ: ꙗ҆́кѡ загради́шасѧ ѹ҆ста̀ глаго́лющихъ непра́вєднаѧ.
На ѹ҆́треннихъ поꙋча́хсѧ въ тѧ̀, ꙗ҆́кѡ бы́лъ є҆сѝ помо́щникъ мо́й, и҆ въ кро́вѣ крилꙋ̀ твоє́ю возра́дꙋюсѧ.
Прильпѐ дꙋша̀ моѧ̀ по тебѣ̀, мене́ же прїѧ́тъ десни́ца твоѧ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды, без̾ покло́нѡвъ.]
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю: да вни́детъ пред̾ тѧ̀ мл҃тва моѧ̀, приклонѝ ѹ҆́хо твоѐ къ моле́нїю моемꙋ̀, ꙗ҆́кѡ и҆спо́лнисѧ ѕѡ́лъ дꙋша̀ моѧ̀, и҆ живо́тъ мо́й а҆́дꙋ прибли́жисѧ. привмѣне́нъ бы́хъ съ низходѧ́щими въ ро́въ, бы́хъ ꙗ҆́кѡ человѣ́къ без̾ по́мощи, въ ме́ртвыхъ свобо́дь: ꙗ҆́кѡ ꙗ҆́звеннїи спѧ́щїи во гро́бѣ, и҆́хже не помѧнꙋ́лъ є҆сѝ ктомꙋ̀, и҆ ті́и ѿ рꙋкѝ твоеѧ̀ ѿринове́ни бы́ша. положи́ша мѧ̀ въ ро́вѣ преиспо́днѣмъ, въ те́мныхъ и҆ сѣ́ни сме́ртнѣй. на мнѣ̀ ѹ҆тверди́сѧ ꙗ҆́рость твоѧ̑, и҆ всѧ̑ во́лны твоѧ̑ наве́лъ є҆сѝ на мѧ̀. ѹ҆да́лилъ є҆сѝ зна́емыхъ мои́хъ ѿ менѐ, положи́ша мѧ̀ ме́рзость себѣ̀, пре́данъ бы́хъ, и҆ не и҆схожда́хъ. ѻ҆́чи моѝ и҆знемого́стѣ ѿ нищеты̀, воззва́хъ къ тебѣ̀ гдⷭ҇и, ве́сь де́нь: воздѣ́хъ къ тебѣ̀ рꙋ́цѣ моѝ. є҆да̀ ме́ртвыми твори́ши чꙋдеса̀; и҆лѝ вра́чеве воскресѧ́тъ и҆ и҆сповѣ́дѧтсѧ тебѣ̀; є҆да̀ повѣ́сть кто̀ во гро́бѣ ми́лость твою̀, и҆ и҆́стинꙋ твою̀ въ поги́бели; є҆да̀ позна̑на бꙋ́дꙋтъ во тьмѣ̀ чꙋдеса̀ твоѧ̑, и҆ пра́вда твоѧ̀ въ землѝ забве́ннѣй; и҆ а҆́зъ къ тебѣ̀ гдⷭ҇и, воззва́хъ, и҆ ѹ҆́трѡ мл҃тва моѧ̀ предвари́тъ тѧ̀. вскꙋ́ю гдⷭ҇и, ѿрѣ́еши дꙋ́шꙋ мою̀; ѿвраща́еши лицѐ твоѐ ѿ менѐ; Ни́щъ є҆́смь а҆́зъ, и҆ въ трꙋдѣ́хъ ѿ ю҆́ности моеѧ̀, возне́съ же сѧ, смири́хсѧ, и҆ и҆знемого́хъ. на мнѣ̀ преидо́ша гнѣ́ви твоѝ, ѹ҆страшє́нїѧ твоѧ̑ возмꙋти́ша мѧ̀. ѡ҆быдо́ша мѧ̀ ꙗ҆́кѡ вода̀ ве́сь де́нь. ѡ҆держа́ша мѧ̀ вкꙋ́пѣ. ѹ҆да́лилъ є҆сѝ ѿ менѐ дрꙋ́га и҆ и҆́скреннѧго, и҆ зна́емыхъ мои́хъ ѿ страсте́й.
Гдⷭ҇и бж҃е сп҃се́нїѧ моегѡ̀, во днѝ воззва́хъ, и҆ въ нощѝ пред̾ тобо́ю.
Да вни́детъ пред̾ тѧ̀ мл҃тва моѧ̀, приклонѝ ѹ҆́хо твоѐ къ моле́нїю моемꙋ̀.
Бл҃гословѝ дꙋшѐ моѧ̀ гдⷭ҇а и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀. бл҃гословѝ дꙋшѐ моѧ̀ гдⷭ҇а, и҆ не забыва́й всѣ́хъ воздаѧ́нїй є҆гѡ̀: ѡ҆чища́ющаго всѧ̑ беззакѡ́нїѧ твоѧ̑, и҆сцѣлѧ́ющаго всѧ̑ недꙋ́ги твоѧ̑: и҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ млⷭ҇тїю и҆ щедро́тами: и҆сполнѧ́ющаго во бл҃ги́хъ жела́нїе твоѐ: ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀. творѧ́й млⷭ҇тыни гдⷭ҇ь, и҆ сꙋдьбꙋ̀ всѣ̑мъ ѡ҆би̑димымъ. сказа̀ пꙋти̑ своѧ̑ мѡѷсе́ови, сыновѡ́мъ і҆и҃лєвымъ хотѣ̑нїѧ своѧ̑. ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ. не до конца̀ прогнѣ́ваетсѧ, нижѐ въ вѣ́къ враждꙋ́етъ. не по беззако́нїємъ на́шымъ сотвори́лъ є҆́сть на́мъ, нижѐ по грѣхѡ́мъ на́шымъ возда́лъ є҆́сть на́мъ. ꙗ҆́кѡ по высотѣ̀ нбⷭ҇нѣй ѿ землѝ, ѹ҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀. є҆ли́кѡ ѿстоѧ́тъ восто́цы ѿ за̑падъ, ѹ҆да́лилъ є҆́сть ѿ на́съ беззакѡ́нїѧ на̑ша. ꙗ҆́коже ще́дритъ ѻ҆те́цъ сы́ны, ѹ҆ще́дри гдⷭ҇ь боѧ́щихсѧ є҆гѡ̀. ꙗ҆́кѡ то́й позна̀ созда́нїе на́ше, помѧнꙋ̀, ꙗ҆́кѡ пе́рсть є҆смы̀. человѣ́къ, ꙗ҆́кѡ трава̀ дні́е є҆гѡ̀, ꙗ҆́кѡ цвѣ́тъ се́льный, та́кѡ ѡ҆цвѣте́тъ: ꙗ҆́кѡ дꙋ́хъ про́йде въ не́мъ, и҆ не бꙋ́детъ, и҆ не позна́етъ ктомꙋ̀ мѣ́ста своегѡ̀. млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀, и҆ пра́вда є҆гѡ̀ на сынѣ́хъ сынѡ́въ, хранѧ́щихъ завѣ́тъ є҆гѡ̀, и҆ по́мнѧщихъ за́пѡвѣди є҆гѡ̀, твори́ти ѧ҆̀. гдⷭ҇ь на нб҃сѝ ѹ҆гото́ва прⷭ҇то́лъ сво́й, и҆ црⷭ҇тво є҆гѡ̀ всѣ́ми ѡ҆блада́етъ. бл҃гослови́те гдⷭ҇а всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ѹ҆слы́шати гла́съ слове́съ є҆гѡ̀. бл҃гослови́те гдⷭ҇а всѧ̑ си̑лы є҆гѡ̀, слꙋги̑ є҆гѡ̀, творѧ́щїи во́лю є҆гѡ̀. бл҃гослови́те гдⷭ҇а всѧ̑ дѣла̀ є҆гѡ̀. на всѧ́комъ мѣ́стѣ влⷣчестві҆ѧ є҆гѡ̀, бл҃гословѝ дꙋшѐ моѧ̀ гдⷭ҇а.
На всѧ́комъ мѣ́стѣ влⷣчестві҆ѧ є҆гѡ̀, бл҃гословѝ дꙋшѐ моѧ̀ гдⷭ҇а.
Гдⷭ҇и, ѹ҆слы́ши мл҃твꙋ мою̀, внꙋшѝ моле́нїе моѐ во и҆́стинѣ твое́й, ѹ҆слы́ши мѧ̀ въ пра́вдѣ твое́й: и҆ не вни́ди въ сꙋ́дъ съ рабо́мъ твои́мъ, ꙗ҆́кѡ не ѡ҆правди́тсѧ пред̾ тобо́ю всѧ́къ живы́й. ꙗ҆́кѡ погна̀ вра́гъ дꙋ́шꙋ мою̀, смири́лъ є҆́сть въ зе́млю живо́тъ мо́й: посади́лъ мѧ̀ є҆́сть въ те́мныхъ, ꙗ҆́кѡ мє́ртвыѧ вѣ́ка. и҆ ѹ҆ны̀ во мнѣ̀ дꙋ́хъ мо́й, во мнѣ̀ смѧте́сѧ се́рдце моѐ. помѧнꙋ́хъ дни̑ дрє́внїѧ, поꙋчи́хсѧ во всѣ́хъ дѣ́лѣхъ твои́хъ, въ творе́нїихъ рꙋкꙋ̀ твоє́ю поꙋча́хсѧ. воздѣ́хъ къ тебѣ̀ рꙋ́цѣ моѝ, дꙋша̀ моѧ̀ ꙗ҆́кѡ землѧ̀ безво́днаѧ тебѣ̀. ско́рѡ ѹ҆слы́ши мѧ̀ гдⷭ҇и, и҆счезѐ дꙋ́хъ мо́й: не ѿвратѝ лица̀ твоегѡ̀ ѿ менѐ, и҆ ѹ҆подо́блюсѧ низходѧ́щымъ въ ро́въ. слы́шанꙋ сотворѝ мнѣ̀ заꙋ́тра млⷭ҇ть твою̀, ꙗ҆́кѡ на тѧ̀ ѹ҆пова́хъ. скажѝ мнѣ̀ гдⷭ҇и, пꙋ́ть, во́ньже пойдꙋ̀, ꙗ҆́кѡ къ тебѣ̀ взѧ́хъ дꙋ́шꙋ мою̀. и҆зми́ мѧ ѿ вра̑гъ мои́хъ, гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й. д¦ъ тво́й бл҃гі́й наста́витъ мѧ̀ на зе́млю пра́вꙋ. и҆́мене твоегѡ̀ ра́ди гдⷭ҇и, живи́ши мѧ̀, пра́вдою твое́ю и҆зведе́ши ѿ печа́ли дꙋ́шꙋ мою̀: и҆ млⷭ҇тїю твое́ю потреби́ши врагѝ моѧ̑, и҆ погꙋби́ши всѧ̑ стꙋжа́ющыѧ дꙋшѝ мое́й, ꙗ҆́кѡ а҆́зъ ра́бъ тво́й є҆́смь.
Ѹ҆слы́ши мѧ̀ гдⷭ҇и, въ пра́вдѣ твое́й, и҆ не вни́ди въ сꙋ́дъ съ рабо́мъ твои́мъ.
Ѹ҆слы́ши мѧ̀ гдⷭ҇и, въ пра́вдѣ твое́й, и҆ не вни́ди въ сꙋ́дъ съ рабо́мъ твои́мъ.
Д¦ъ тво́й бл҃гі́й наста́витъ мѧ̀ на зе́млю пра́вꙋ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй, в҃i.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Сті́хъ а҃: И҆сповѣ́дайтесѧ гдⷭ҇еви. ꙗ҆́кѡ бл҃гъ, ꙗ҆́кѡ въ вѣ́къ млⷭ҇ть є҆гѡ̀.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Сті́хъ в҃: Ѡ҆быше́дше ѡ҆быдо́ша мѧ̀, и҆ и҆́менемъ гдⷭ҇нимъ противлѧ́хсѧ и҆̀мъ.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Сті́хъ г҃: Не ѹ҆мрꙋ̀, но жи́въ бꙋ́дꙋ, и҆ повѣ́мъ дѣла̀ гдⷭ҇нѧ.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Сті́хъ д҃: Ка́мень, є҆го́же небрего́ша зи́ждꙋщїи, се́й бы́сть во главꙋ̀ ѹ҆́гла: ѿ гдⷭ҇а бы́сть се́й, и҆ є҆́сть ди́венъ во ѻ҆чесѣ́хъ на́шихъ.
Бг҃ъ гдⷭ҇ь, и҆ ꙗ҆ви́сѧ на́мъ, бл҃гослове́нъ грѧды́й во и҆́мѧ гдⷭ҇не.
Та́же глаго́лемъ тропа́рь воскрⷭ҇ный шеста́гѡ гла́са два́жды, и҆ бг҃оро́диченъ въ то́йже гла́съ.
А҆́гг҃льскїѧ си̑лы на гро́бѣ твое́мъ, / и҆ стрегꙋ́щїи ѡ҆мертвѣ́ша: / и҆ стоѧ́ше мр҃і́а во гро́бѣ, / и҆́щꙋщи пречⷭ҇тагѡ тѣ́ла твоегѡ̀. / плѣни́лъ є҆сѝ а҆́дъ, не и҆скꙋси́всѧ ѿ негѡ̀: / срѣ́тилъ є҆сѝ дв҃ꙋ да́рꙋѧй живо́тъ. / воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Бл҃гослове́ннꙋю нарекі́й твою̀ мт҃рь, / прише́лъ є҆сѝ на стрⷭ҇ть во́льнымъ хотѣ́нїемъ, / возсїѧ́въ на крⷭ҇тѣ̀, взыска́ти хотѧ̀ а҆да́ма, / глаго́лѧ а҆́гг҃лѡмъ: сра́дꙋйтесѧ мнѣ̀, / ꙗ҆́кѡ ѡ҆брѣ́тесѧ поги́бшаѧ дра́хма, / всѧ̑ мꙋ́дрѣ ѹ҆стро́ивый бж҃е на́шъ, сла́ва тебѣ̀.
Та́же стїхосло́вимъ каѳї́смꙋ в҃ и҆ г҃ ѱалти́рѧ, и҆ сѣда́льны по чи́нꙋ и҆́хъ: и҆ пѧтьдесѧ́тый ѱало́мъ.
И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑. возвеселю́сѧ и҆ возра́дꙋюсѧ ѡ҆ тебѣ̀, пою̀ и҆́мени твоемꙋ̀, вы́шнїй. внегда̀ возврати́тисѧ врагꙋ̀ моемꙋ̀ вспѧ́ть, и҆знемо́гꙋтъ и҆ поги́бнꙋтъ ѿ лица̀ твоегѡ̀. ꙗ҆́кѡ сотвори́лъ є҆сѝ сꙋ́дъ мо́й и҆ прю̀ мою̀: сѣ́лъ є҆сѝ на прⷭ҇то́лѣ, сꙋдѧ́й пра́вдꙋ. запрети́лъ є҆сѝ ꙗ҆зы́кѡмъ, и҆ поги́бе нечести́вый: и҆́мѧ є҆гѡ̀ потреби́лъ є҆сѝ въ вѣ́къ и҆ въ вѣ́къ вѣ́ка. врагꙋ̀ ѡ҆скꙋдѣ́ша ѻ҆рꙋ̑жїѧ въ коне́цъ, и҆ гра́ды разрꙋши́лъ є҆сѝ: поги́бе па́мѧть є҆гѡ̀ съ шꙋ́момъ. и҆ гдⷭ҇ь во вѣ́къ пребыва́етъ, ѹ҆гото́ва на сꙋ́дъ прⷭ҇то́лъ сво́й: и҆ то́й сꙋди́ти и҆́мать вселе́ннѣй въ пра́вдꙋ, сꙋди́ти и҆́мать лю́демъ въ правотѣ̀. и҆ бы́сть гдⷭ҇ь прибѣ́жище ѹ҆бо́гомꙋ, помо́щникъ во бл҃говре́менїихъ, въ ско́рбехъ. и҆ да ѹ҆пова́ютъ на тѧ̀ зна́ющїи и҆́мѧ твоѐ, ꙗ҆́кѡ не ѡ҆ста́вилъ є҆сѝ взыска́ющихъ тѧ̀, гдⷭ҇и. по́йте гдⷭ҇еви, живꙋ́щемꙋ въ сїѡ́нѣ, возвѣсти́те во ꙗ҆зы́цѣхъ начина̑нїѧ є҆гѡ̀: ꙗ҆́кѡ взыска́ѧй крѡ́ви и҆́хъ помѧнꙋ̀, не забы̀ зва́нїѧ ѹ҆бо́гихъ. поми́лꙋй мѧ̀, гдⷭ҇и, ви́ждь смире́нїе моѐ ѿ вра̑гъ мои́хъ, возносѧ́й мѧ̀ ѿ вра́тъ сме́ртныхъ: ꙗ҆́кѡ да возвѣщꙋ̀ всѧ̑ хвалы̑ твоѧ̑ во вратѣ́хъ дще́ре сїѡ́ни: возра́дꙋемсѧ ѡ҆ сп҃се́нїи твое́мъ. ѹ҆глѣбо́ша ꙗ҆зы́цы въ па́гꙋбѣ, ю҆́же сотвори́ша: въ сѣ́ти се́й, ю҆́же скры́ша, ѹ҆вѧзѐ нога̀ и҆́хъ. зна́емь є҆́сть гдⷭ҇ь сꙋдьбы̑ творѧ́й: въ дѣ́лѣхъ рꙋкꙋ̀ своє́ю ѹ҆вѧзѐ грѣ́шникъ. да возвратѧ́тсѧ грѣ̑шницы во а҆́дъ, всѝ ꙗ҆зы́цы забыва́ющїи бг҃а. ꙗ҆́кѡ не до конца̀ забве́нъ бꙋ́детъ ни́щїй, терпѣ́нїе ѹ҆бо́гихъ не поги́бнетъ до конца̀. воскрⷭ҇нѝ, гдⷭ҇и, да не крѣпи́тсѧ человѣ́къ, да сꙋ́дѧтсѧ ꙗ҆зы́цы пред̾ тобо́ю. поста́ви, гдⷭ҇и, законоположи́телѧ над̾ ни́ми, да разꙋмѣ́ютъ ꙗ҆зы́цы, ꙗ҆́кѡ человѣ́цы сꙋ́ть. вскꙋ́ю, гдⷭ҇и, ѿстоѧ̀ дале́че, презира́еши во бл҃говре́менїихъ, въ ско́рбехъ; внегда̀ горди́тисѧ нечести́вомꙋ, возгара́етсѧ ни́щїй: ѹ҆вѧза́ютъ въ совѣ́тѣхъ, ꙗ҆̀же помышлѧ́ютъ. ꙗ҆́кѡ хвали́мь є҆́сть грѣ́шный въ по́хотехъ дꙋшѝ своеѧ̀, и҆ ѡ҆би́дѧй бл҃гослови́мь є҆́сть. раздражѝ гдⷭ҇а грѣ́шный: по мно́жествꙋ гнѣ́ва своегѡ̀ не взы́щетъ: нѣ́сть бг҃а пред̾ ни́мъ. ѡ҆сквернѧ́ютсѧ пꙋтїѐ є҆гѡ̀ на всѧ́ко вре́мѧ: ѿе́млютсѧ сꙋдьбы̑ твоѧ̑ ѿ лица̀ є҆гѡ̀: всѣ́ми врагѝ свои́ми ѡ҆блада́етъ. рече́ бо въ се́рдцы свое́мъ: не подви́жꙋсѧ ѿ ро́да въ ро́дъ без̾ ѕла̀: є҆гѡ́же клѧ́твы ѹ҆ста̀ є҆гѡ̀ пѡ́лна сꙋ́ть, и҆ го́рести и҆ льстѝ: под̾ ѧ҆зы́комъ є҆гѡ̀ трꙋ́дъ и҆ болѣ́знь. присѣди́тъ въ лови́тельствѣ съ бога́тыми въ та́йныхъ, є҆́же ѹ҆би́ти непови́ннаго: ѻ҆́чи є҆гѡ̀ на ни́щаго призира́етѣ. лови́тъ въ та́йнѣ ꙗ҆́кѡ ле́въ во ѡ҆гра́дѣ свое́й, лови́тъ є҆́же восхи́тити ни́щаго, восхи́тити ни́щаго, внегда̀ привлещѝ и҆̀ въ сѣ́ти свое́й. смири́тъ є҆го̀: преклони́тсѧ и҆ паде́тъ, внегда̀ є҆мꙋ̀ ѡ҆блада́ти ѹ҆бо́гими. рече́ бо въ се́рдцы свое́мъ: забы̀ бг҃ъ, ѿвратѝ лицѐ своѐ, да не ви́дитъ до конца̀. воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ѹ҆бо́гихъ твои́хъ до конца̀. чесѡ̀ ра́ди прогнѣ́ва нечести́вый бг҃а; рече́ бо въ се́рдцы свое́мъ: не взы́щетъ. ви́диши, ꙗ҆́кѡ ты̀ болѣ́знь и҆ ꙗ҆́рость смотрѧ́еши, да пре́данъ бꙋ́детъ въ рꙋ́цѣ твоѝ: тебѣ̀ ѡ҆ста́вленъ є҆́сть ни́щїй, си́рꙋ ты̀ бꙋ́ди помо́щникъ. сокрꙋшѝ мы́шцꙋ грѣ́шномꙋ и҆ лꙋка́вомꙋ: взы́щетсѧ грѣ́хъ є҆гѡ̀ и҆ не ѡ҆брѧ́щетсѧ. гдⷭ҇ь цр҃ь во вѣ́къ и҆ въ вѣ́къ вѣ́ка: поги́бнете, ꙗ҆зы́цы, ѿ землѝ є҆гѡ̀. жела́нїе ѹ҆бо́гихъ ѹ҆слы́шалъ є҆сѝ, гдⷭ҇и, ѹ҆гото́ванїю се́рдца и҆́хъ внѧ́тъ ѹ҆́хо твоѐ. сꙋдѝ си́рꙋ и҆ смире́нꙋ, да не приложи́тъ ктомꙋ̀ велича́тисѧ человѣ́къ на землѝ.
На гдⷭ҇а ѹ҆пова́хъ, ка́кѡ рече́те дꙋшѝ мое́й: превита́й по гора́мъ, ꙗ҆́кѡ пти́ца; ꙗ҆́кѡ сѐ, грѣ̑шницы налѧко́ша лꙋ́къ, ѹ҆гото́ваша стрѣ́лы въ тꙋ́лѣ, сострѣлѧ́ти во мра́цѣ пра̑выѧ се́рдцемъ. занѐ ꙗ҆̀же ты̀ соверши́лъ є҆сѝ, ѻ҆нѝ разрꙋши́ша: првⷣникъ же что̀ сотворѝ; гдⷭ҇ь во хра́мѣ ст҃ѣ́мъ свое́мъ. гдⷭ҇ь, на нб҃сѝ прⷭ҇то́лъ є҆гѡ̀: ѻ҆́чи є҆гѡ̀ на ни́щаго призира́етѣ, вѣ́жди є҆гѡ̀ и҆спыта́етѣ сы́ны человѣ́чєскїѧ. гдⷭ҇ь и҆спыта́етъ првⷣнаго и҆ нечести́ваго: любѧ́й же непра́вдꙋ ненави́дитъ свою̀ дꙋ́шꙋ. ѡ҆дожди́тъ на грѣ́шники сѣ̑ти: ѻ҆́гнь и҆ жꙋ́пелъ, и҆ дꙋ́хъ бꙋ́ренъ ча́сть ча́ши и҆́хъ. ꙗ҆́кѡ првⷣнъ гдⷭ҇ь и҆ пра̑вды возлюбѝ: правѡты̀ ви́дѣ лицѐ є҆гѡ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Сп҃си́ мѧ, гдⷭ҇и, ꙗ҆́кѡ ѡ҆скꙋдѣ̀ прпⷣбный: ꙗ҆́кѡ ѹ҆ма́лишасѧ и҆́стины ѿ сынѡ́въ человѣ́ческихъ. сꙋ́єтнаѧ глаго́ла кі́йждо ко и҆́скреннемꙋ своемꙋ̀: ѹ҆стнѣ̀ льсти̑выѧ въ се́рдцы, и҆ въ се́рдцы глаго́лаша ѕла̑ѧ. потреби́тъ гдⷭ҇ь всѧ̑ ѹ҆стны̀ льсти̑выѧ, ѧ҆зы́къ велерѣ́чивый, ре́кшыѧ: ѧ҆зы́къ на́шъ возвели́чимъ, ѹ҆стны̀ на̑ша при на́съ сꙋ́ть: кто̀ на́мъ гдⷭ҇ь є҆́сть; стра́сти ра́ди ни́щихъ и҆ воздыха́нїѧ ѹ҆бо́гихъ ны́нѣ воскрⷭ҇нꙋ̀, гл҃етъ гдⷭ҇ь: положꙋ́сѧ во сп҃се́нїе, не ѡ҆биню́сѧ ѡ҆ не́мъ. словеса̀ гдⷭ҇нѧ словеса̀ чи̑ста, сребро̀ разжже́но, и҆скꙋше́но землѝ, ѡ҆чище́но седмери́цею. ты̀, гдⷭ҇и, сохрани́ши ны̀ и҆ соблюде́ши ны̀ ѿ ро́да сегѡ̀ и҆ во вѣ́къ. ѡ҆́крестъ нечести́вїи хо́дѧтъ: по высотѣ̀ твое́й ѹ҆мно́жилъ є҆сѝ сы́ны человѣ́чєскїѧ.
Доко́лѣ, гдⷭ҇и, забꙋ́деши мѧ̀ до конца̀; доко́лѣ ѿвраща́еши лицѐ твоѐ ѿ менѐ; доко́лѣ положꙋ̀ совѣ́ты въ дꙋшѝ мое́й, бѡлѣ́зни въ се́рдцы мое́мъ де́нь и҆ но́щь; доко́лѣ вознесе́тсѧ вра́гъ мо́й на мѧ̀; при́зри, ѹ҆слы́ши мѧ̀, гдⷭ҇и бж҃е мо́й: просвѣтѝ ѻ҆́чи моѝ, да не когда̀ ѹ҆снꙋ̀ въ сме́рть: да не когда̀ рече́тъ вра́гъ мо́й: ѹ҆крѣпи́хсѧ на него̀. стꙋжа́ющїи мѝ возра́дꙋютсѧ, а҆́ще подви́жꙋсѧ. а҆́зъ же на млⷭ҇ть твою̀ ѹ҆пова́хъ: возра́дꙋетсѧ се́рдце моѐ ѡ҆ сп҃се́нїи твое́мъ: воспою̀ гдⷭ҇еви бл҃годѣ́ѧвшемꙋ мнѣ̀ и҆ пою̀ и҆́мени гдⷭ҇а вы́шнѧгѡ.
Речѐ безꙋ́менъ въ се́рдцы свое́мъ: нѣ́сть бг҃ъ. растлѣ́ша и҆ ѡ҆мерзи́шасѧ въ начина́нїихъ: нѣ́сть творѧ́й бл҃госты́ню. гдⷭ҇ь съ нб҃сѐ прини́че на сы́ны человѣ́чєскїѧ, ви́дѣти, а҆́ще є҆́сть разꙋмѣва́ѧй, и҆лѝ взыска́ѧй бг҃а. всѝ ѹ҆клони́шасѧ, вкꙋ́пѣ неключи́ми бы́ша: нѣ́сть творѧ́й бл҃госты́ню, нѣ́сть до є҆ди́нагѡ. ни лѝ ѹ҆разꙋмѣ́ютъ всѝ дѣ́лающїи беззако́нїе, снѣда́ющїи лю́ди моѧ̑ въ снѣ́дь хлѣ́ба; гдⷭ҇а не призва́ша. та́мѡ ѹ҆боѧ́шасѧ стра́ха, и҆дѣ́же не бѣ̀ стра́хъ: ꙗ҆́кѡ гдⷭ҇ь въ ро́дѣ првⷣныхъ. совѣ́тъ ни́щагѡ посрами́сте: гдⷭ҇ь же ѹ҆пова́нїе є҆гѡ̀ є҆́сть. кто̀ да́стъ ѿ сїѡ́на сп҃се́нїе і҆и҃лево; внегда̀ возврати́тъ гдⷭ҇ь плѣне́нїе люде́й свои́хъ, возра́дꙋетсѧ і҆а́кѡвъ, и҆ возвесели́тсѧ і҆и҃ль.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Гдⷭ҇и, кто̀ ѡ҆бита́етъ въ жили́щи твое́мъ; и҆лѝ кто̀ всели́тсѧ во ст҃ꙋ́ю го́рꙋ твою̀; ходѧ́й непоро́ченъ и҆ дѣ́лаѧй пра́вдꙋ, глаго́лѧй и҆́стинꙋ въ се́рдцы свое́мъ: и҆́же не ѹ҆льстѝ ѧ҆зы́комъ свои́мъ и҆ не сотворѝ и҆́скреннемꙋ своемꙋ̀ ѕла̀, и҆ поноше́нїѧ не прїѧ́тъ на бли̑жнїѧ своѧ̑: ѹ҆ничиже́нъ є҆́сть пред̾ ни́мъ лꙋка́внꙋѧй, боѧ́щыѧжесѧ гдⷭ҇а сла́витъ: клены́йсѧ и҆́скреннемꙋ своемꙋ̀ и҆ не ѿмета́ѧсѧ: сребра̀ своегѡ̀ не дадѐ въ ли́хвꙋ и҆ мзды̀ на непови́нныхъ не прїѧ́тъ. творѧ́й сїѧ̑ не подви́житсѧ во вѣ́къ.
Сохрани́ мѧ, гдⷭ҇и, ꙗ҆́кѡ на тѧ̀ ѹ҆пова́хъ. рѣ́хъ гдⷭ҇еви: гдⷭ҇ь мо́й є҆сѝ ты̀, ꙗ҆́кѡ благи́хъ мои́хъ не тре́бꙋеши. ст҃ы̑мъ, и҆̀же сꙋ́ть на землѝ є҆гѡ̀, ѹ҆дивѝ гдⷭ҇ь всѧ̑ хотѣ̑нїѧ своѧ̑ въ ни́хъ. ѹ҆мно́жишасѧ не́мѡщи и҆́хъ, по си́хъ ѹ҆скори́ша: не соберꙋ̀ собо́ры и҆́хъ ѿ крове́й, ни помѧнꙋ́ же и҆ме́нъ и҆́хъ ѹ҆стна́ма мои́ма. гдⷭ҇ь ча́сть достоѧ́нїѧ моегѡ̀ и҆ ча́ши моеѧ̀: ты̀ є҆сѝ ѹ҆строѧ́ѧй достоѧ́нїе моѐ мнѣ̀. ѹ҆́жѧ нападо́ша мѝ въ держа́вныхъ мои́хъ: и҆́бо достоѧ́нїе моѐ держа́вно є҆́сть мнѣ̀. бл҃гословлю̀ гдⷭ҇а вразꙋми́вшаго мѧ̀: є҆ще́ же и҆ до но́щи наказа́ша мѧ̀ ѹ҆трѡ́бы моѧ̑. предзрѣ́хъ гдⷭ҇а предо мно́ю вы́нꙋ, ꙗ҆́кѡ ѡ҆деснꙋ́ю менѐ є҆́сть, да не подви́жꙋсѧ. сегѡ̀ ра́ди возвесели́сѧ се́рдце моѐ, и҆ возра́довасѧ ѧ҆зы́къ мо́й: є҆ще́ же и҆ пло́ть моѧ̀ всели́тсѧ на ѹ҆пова́нїи. ꙗ҆́кѡ не ѡ҆ста́виши дꙋ́шꙋ мою̀ во а҆́дѣ, нижѐ да́си прпⷣбномꙋ твоемꙋ̀ ви́дѣти и҆стлѣ́нїѧ. сказа́лъ мѝ є҆сѝ пꙋти̑ живота̀: и҆спо́лниши мѧ̀ весе́лїѧ съ лице́мъ твои́мъ: красота̀ въ десни́цѣ твое́й въ коне́цъ.
Ѹ҆слы́ши, гдⷭ҇и, пра́вдꙋ мою̀, вонмѝ моле́нїю моемꙋ̀, внꙋшѝ моли́твꙋ мою̀ не во ѹ҆стна́хъ льсти́выхъ. ѿ лица̀ твоегѡ̀ сꙋдьба̀ моѧ̀ и҆зы́детъ: ѻ҆́чи моѝ да ви́дита правоты̑. и҆скꙋси́лъ є҆сѝ се́рдце моѐ, посѣти́лъ є҆сѝ но́щїю: и҆скꙋси́лъ мѧ̀ є҆сѝ, и҆ не ѡ҆брѣ́тесѧ во мнѣ̀ непра́вда. ꙗ҆́кѡ да не возглаго́лютъ ѹ҆ста̀ моѧ̑ дѣ́лъ человѣ́ческихъ, за словеса̀ ѹ҆сте́нъ твои́хъ а҆́зъ сохрани́хъ пꙋти̑ же́стѡки. совершѝ стѡпы̀ моѧ̑ во стезѧ́хъ твои́хъ, да не подви́жꙋтсѧ стѡпы̀ моѧ̑. а҆́зъ воззва́хъ, ꙗ҆́кѡ ѹ҆слы́шалъ мѧ̀ є҆сѝ, бж҃е: приклонѝ ѹ҆́хо твоѐ мнѣ̀ и҆ ѹ҆слы́ши глаго́лы моѧ̑. ѹ҆дивѝ млⷭ҇ти твоѧ̑, сп҃са́ѧй ѹ҆пова́ющыѧ на тѧ̀ ѿ проти́вѧщихсѧ десни́цѣ твое́й: сохрани́ мѧ, гдⷭ҇и, ꙗ҆́кѡ зѣ́ницꙋ ѻ҆́ка: въ кро́вѣ крилꙋ̑ твоє́ю покры́еши мѧ̀ ѿ лица̀ нечести́выхъ ѡ҆стра́стшихъ мѧ̀: вразѝ моѝ дꙋ́шꙋ мою̀ ѡ҆держа́ша тꙋ́къ сво́й затвори́ша, ѹ҆ста̀ и҆́хъ глаго́лаша горды́ню. и҆згонѧ́щїи мѧ̀ ны́нѣ ѡ҆быдо́ша мѧ̀, ѻ҆́чи своѝ возложи́ша ѹ҆клони́ти на зе́млю. ѡ҆б̾ѧ́ша мѧ̀ ꙗ҆́кѡ ле́въ гото́въ на ло́въ и҆ ꙗ҆́кѡ скѵ́менъ ѡ҆бита́ѧй въ та́йныхъ. воскрⷭ҇нѝ, гдⷭ҇и, предварѝ ѧ҆̀ и҆ запнѝ и҆̀мъ: и҆зба́ви дꙋ́шꙋ мою̀ ѿ нечести́вагѡ, ѻ҆рꙋ́жїе твоѐ ѿ вра̑гъ рꙋкѝ твоеѧ̀, гдⷭ҇и, ѿ ма́лыхъ ѿ землѝ: раздѣлѝ ѧ҆̀ въ животѣ̀ и҆́хъ, и҆ сокрове́нныхъ твои́хъ и҆спо́лнисѧ чре́во и҆́хъ: насы́тишасѧ сынѡ́въ, и҆ ѡ҆ста́виша ѡ҆ста́нки младе́нцємъ свои̑мъ. а҆́зъ же пра́вдою ꙗ҆влю́сѧ лицꙋ̀ твоемꙋ̀, насы́щꙋсѧ, внегда̀ ꙗ҆ви́тимисѧ сла́вѣ твое́й.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Гро́бꙋ ѿве́рстꙋ, а҆́дꙋ пла́чꙋщꙋсѧ, / мр҃і́а вопїѧ́ше ко скры́вшымсѧ а҆пⷭ҇лѡмъ: / и҆зыди́те вїногра́да дѣ́лателїе, / проповѣ́дите воскрⷭ҇нїѧ сло́во: / воскр҃се гдⷭ҇ь, подаѧ̀ мі́рови ве́лїю млⷭ҇ть.
Сті́хъ: Воскрⷭ҇нѝ гдⷭ҇и бж҃е мо́й, да вознесе́тсѧ рꙋка̀ твоѧ̀, не забꙋ́ди ѹ҆бо́гихъ твои́хъ до конца̀.
Гдⷭ҇и, предстоѧ́ше гро́бꙋ твоемꙋ̀ мр҃і́а магдали́на, / и҆ пла́каше вопїю́щи, вертогра́дарѧ тѧ̀ мнѧ́щи, глаго́лаше: / гдѣ̀ сокры́лъ є҆сѝ вѣ́чный живо́тъ; / гдѣ̀ положи́лъ є҆сѝ, и҆́же на прⷭ҇то́лѣ херꙋві́мстѣмъ; / стрегꙋ́щїи бо сего̀, ѿ стра́ха ѡ҆мертвѣ́ша. / и҆лѝ гдⷭ҇а моего̀ дади́те мѝ, / и҆лѝ со мно́ю возопі́йте: / и҆́же въ ме́ртвыхъ бы́въ, и҆ мє́ртвыѧ воскр҃си́въ, сла́ва тебѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Преднаписꙋ́етъ гедеѡ́нъ зача́тїе, / и҆ сказꙋ́етъ дв҃дъ ржⷭ҇тво̀ твоѐ бцⷣе: / сни́де бо ꙗ҆́кѡ до́ждь на рꙋно̀, сло́во во чре́во твоѐ, / и҆ прозѧбла̀ є҆сѝ без̾ сѣ́мене, / землѐ ст҃а́ѧ, мі́рови сп҃се́нїе, / хрⷭ҇та̀ бг҃а на́шего, бл҃года́тнаѧ.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
҆҆ Каѳї́сма г҃. Ѱало́мъ з҃і.
Возлюблю́ тѧ, гдⷭ҇и, крѣ́посте моѧ̀: гдⷭ҇ь ѹ҆твержде́нїе моѐ, и҆ прибѣ́жище моѐ, и҆ и҆зба́витель мо́й, бг҃ъ мо́й, помо́щникъ мо́й, и҆ ѹ҆пова́ю на него̀: защи́титель мо́й, и҆ ро́гъ сп҃се́нїѧ моегѡ̀, и҆ застꙋ́пникъ мо́й. хвалѧ̀ призовꙋ̀ гдⷭ҇а и҆ ѿ вра̑гъ мои́хъ спасꙋ́сѧ. ѡ҆держа́ша мѧ̀ бѡлѣ́зни смє́ртныѧ, и҆ пото́цы беззако́нїѧ смѧто́ша мѧ̀: бѡлѣ́зни а҆́дѡвы ѡ҆быдо́ша мѧ̀, предвари́ша мѧ̀ сѣ̑ти смє́ртныѧ. и҆ внегда̀ скорбѣ́ти мѝ, призва́хъ гдⷭ҇а и҆ къ бг҃ꙋ моемꙋ̀ воззва́хъ: ѹ҆слы́ша ѿ хра́ма ст҃а́гѡ своегѡ̀ гла́съ мо́й, и҆ во́пль мо́й пред̾ ни́мъ вни́детъ во ѹ҆́шы є҆гѡ̀. и҆ подви́жесѧ и҆ тре́петна бы́сть землѧ̀, и҆ ѡ҆снова̑нїѧ го́ръ смѧто́шасѧ и҆ подвиго́шасѧ, ꙗ҆́кѡ прогнѣ́васѧ на нѧ̀ бг҃ъ. взы́де ды́мъ гнѣ́вомъ є҆гѡ̀, и҆ ѻ҆́гнь ѿ лица̀ є҆гѡ̀ воспла́менитсѧ: ѹ҆́глїе возгорѣ́сѧ ѿ негѡ̀. и҆ приклонѝ нб҃са̀ и҆ сни́де, и҆ мра́къ под̾ нога́ма є҆гѡ̀. и҆ взы́де на херꙋві́мы и҆ летѣ̀, летѣ̀ на крилꙋ̑ вѣ́трєню. и҆ положѝ тмꙋ̀ закро́въ сво́й: ѡ҆́крестъ є҆гѡ̀ селе́нїе є҆гѡ̀: темна̀ вода̀ во ѻ҆́блацѣхъ воздꙋ́шныхъ. ѿ ѡ҆блиста́нїѧ пред̾ ни́мъ ѻ҆́блацы проидо́ша, гра́дъ и҆ ѹ҆́глїе ѻ҆́гненное. и҆ возгремѣ̀ съ нб҃сѐ гдⷭ҇ь, и҆ вы́шнїй дадѐ гла́съ сво́й. низпосла̀ стрѣ́лы и҆ разгна̀ ѧ҆̀, и҆ мѡ́лнїи ѹ҆мно́жи и҆ смѧтѐ ѧ҆̀. и҆ ꙗ҆ви́шасѧ и҆сто́чницы водні́и, и҆ ѿкры́шасѧ ѡ҆снова̑нїѧ вселе́нныѧ ѿ запреще́нїѧ твоегѡ̀, гдⷭ҇и, ѿ дохнове́нїѧ дꙋ́ха гнѣ́ва твоегѡ̀. низпосла̀ съ высоты̀ и҆ прїѧ́тъ мѧ̀, воспрїѧ́тъ мѧ̀ ѿ во́дъ мно́гихъ. и҆зба́витъ мѧ̀ ѿ врагѡ́въ мои́хъ си́льныхъ и҆ ѿ ненави́дѧщихъ мѧ̀: ꙗ҆́кѡ ѹ҆тверди́шасѧ па́че менѐ. предвари́ша мѧ̀ въ де́нь ѡ҆ѕлобле́нїѧ моегѡ̀: и҆ бы́сть гдⷭ҇ь ѹ҆твержде́нїе моѐ. и҆ и҆зведе́ мѧ на широтꙋ̀: и҆зба́витъ мѧ̀, ꙗ҆́кѡ восхотѣ́ мѧ. и҆ возда́стъ мѝ гдⷭ҇ь по пра́вдѣ мое́й, и҆ по чистотѣ̀ рꙋкꙋ̀ моє́ю возда́стъ мѝ, ꙗ҆́кѡ сохрани́хъ пꙋти̑ гдⷭ҇ни и҆ не нече́ствовахъ ѿ бг҃а моегѡ̀. ꙗ҆́кѡ всѧ̑ сꙋдьбы̑ є҆гѡ̀ предо мно́ю, и҆ ѡ҆правда̑нїѧ є҆гѡ̀ не ѿстꙋпи́ша ѿ менѐ. и҆ бꙋ́дꙋ непоро́ченъ съ ни́мъ и҆ сохраню́сѧ ѿ беззако́нїѧ моегѡ̀. и҆ возда́стъ мѝ гдⷭ҇ь по пра́вдѣ мое́й и҆ по чистотѣ̀ рꙋкꙋ̀ моє́ю пред̾ ѻ҆чи́ма є҆гѡ̀. съ прпⷣбнымъ прпⷣбенъ бꙋ́деши, и҆ съ мꙋ́жемъ непови́ннымъ непови́ненъ бꙋ́деши, и҆ со и҆збра́ннымъ и҆збра́нъ бꙋ́деши, и҆ со стропти́вымъ разврати́шисѧ. ꙗ҆́кѡ ты̀ лю́ди смирє́нныѧ сп҃се́ши и҆ ѻ҆́чи го́рдыхъ смири́ши. ꙗ҆́кѡ ты̀ просвѣти́ши свѣти́льникъ мо́й, гдⷭ҇и: бж҃е мо́й, просвѣти́ши тмꙋ̀ мою̀. ꙗ҆́кѡ тобо́ю и҆зба́влюсѧ ѿ и҆скꙋше́нїѧ, и҆ бг҃омъ мои́мъ прейдꙋ̀ стѣ́нꙋ. бг҃ъ мо́й, непоро́ченъ пꙋ́ть є҆гѡ̀: словеса̀ гдⷭ҇нѧ разжжє́на. защи́титель є҆́сть всѣ́хъ ѹ҆пова́ющихъ на него̀. ꙗ҆́кѡ кто̀ бг҃ъ, ра́звѣ гдⷭ҇а; и҆лѝ кто̀ бг҃ъ, ра́звѣ бг҃а на́шегѡ; бг҃ъ препоѧсꙋ́ѧй мѧ̀ си́лою, и҆ положѝ непоро́ченъ пꙋ́ть мо́й: соверша́ѧй но́зѣ моѝ ꙗ҆́кѡ є҆ле́ни, и҆ на высо́кихъ поставлѧ́ѧй мѧ̀: наꙋча́ѧй рꙋ́цѣ моѝ на бра́нь, и҆ положи́лъ є҆сѝ лꙋ́къ мѣ́дѧнъ мы̑шца моѧ̑: и҆ да́лъ мѝ є҆сѝ защище́нїе сп҃се́нїѧ, и҆ десни́ца твоѧ̀ воспрїѧ́тъ мѧ̀: и҆ наказа́нїе твоѐ и҆спра́витъ мѧ̀ въ коне́цъ, и҆ наказа́нїе твоѐ то̀ мѧ̀ наꙋчи́тъ. ѹ҆шири́лъ є҆сѝ стѡпы̀ моѧ̑ подо мно́ю, и҆ не и҆знемого́стѣ плеснѣ̀ моѝ. поженꙋ̀ врагѝ моѧ̑, и҆ пости́гнꙋ ѧ҆̀, и҆ не возвращꙋ́сѧ, до́ндеже сконча́ютсѧ: ѡ҆скорблю̀ и҆̀хъ, и҆ не возмо́гꙋтъ ста́ти, падꙋ́тъ под̾ нога́ма мои́ма. и҆ препоѧ́салъ мѧ̀ є҆сѝ си́лою на бра́нь, спѧ́лъ є҆сѝ всѧ̑ востаю́щыѧ на мѧ̀ под̾ мѧ̀. и҆ врагѡ́въ мои́хъ да́лъ мѝ є҆сѝ хребе́тъ и҆ ненави́дѧщыѧ мѧ̀ потреби́лъ є҆сѝ. воззва́ша, и҆ не бѣ̀ спаса́ѧй: ко гдⷭ҇ꙋ, и҆ не ѹ҆слы́ша и҆́хъ. и҆ и҆стню̀ ѧ҆̀ ꙗ҆́кѡ пра́хъ пред̾ лице́мъ вѣ́тра, ꙗ҆́кѡ бре́нїе пꙋте́й погла́ждꙋ ѧ҆̀. и҆зба́виши мѧ̀ ѿ прерѣка́нїѧ люде́й: поста́виши мѧ̀ во главꙋ̀ ꙗ҆зы́кѡвъ: лю́дїе, и҆́хже не вѣ́дѣхъ, рабо́таша мѝ, въ слꙋ́хъ ѹ҆́ха послꙋ́шаша мѧ̀. сы́нове чꙋжді́и солга́ша мѝ, сы́нове чꙋжді́и ѡ҆бетша́ша и҆ ѡ҆хромо́ша ѿ сте́зь свои́хъ. жи́въ гдⷭ҇ь, и҆ бл҃гослове́нъ бг҃ъ, и҆ да вознесе́тсѧ бг҃ъ сп҃се́нїѧ моегѡ̀, бг҃ъ даѧ́й ѿмще́нїе мнѣ̀ и҆ покори́вый лю́ди под̾ мѧ̀, и҆зба́витель мо́й ѿ вра̑гъ мои́хъ гнѣвли́выхъ: ѿ востаю́щихъ на мѧ̀ вознесе́ши мѧ̀, ѿ мꙋ́жа непра́ведна и҆зба́виши мѧ̀. сегѡ̀ ра́ди и҆сповѣ́мсѧ тебѣ̀ во ꙗ҆зы́цѣхъ, гдⷭ҇и, и҆ и҆́мени твоемꙋ̀ пою̀: велича́ѧй спасє́нїѧ царє́ва и҆ творѧ́й млⷭ҇ть хрїстꙋ̀ своемꙋ̀ дв҃дꙋ и҆ сѣ́мени є҆гѡ̀ до вѣ́ка.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Небеса̀ повѣ́даютъ сла́вꙋ бж҃їю, творе́нїе же рꙋкꙋ̀ є҆гѡ̀ возвѣща́етъ тве́рдь. де́нь днѝ ѿрыга́етъ глаго́лъ, и҆ но́щь но́щи возвѣща́етъ ра́зꙋмъ. не сꙋ́ть рѣ̑чи, нижѐ словеса̀, и҆́хже не слы́шатсѧ гла́си и҆́хъ. во всю̀ зе́млю и҆зы́де вѣща́нїе и҆́хъ, и҆ въ концы̀ вселе́нныѧ глаго́лы и҆́хъ: въ со́лнцѣ положѝ селе́нїе своѐ: и҆ то́й ꙗ҆́кѡ жени́хъ и҆сходѧ́й ѿ черто́га своегѡ̀, возра́дꙋетсѧ ꙗ҆́кѡ и҆споли́нъ тещѝ пꙋ́ть. ѿ кра́ѧ небесѐ и҆схо́дъ є҆гѡ̀, и҆ срѣ́тенїе є҆гѡ̀ до кра́ѧ небесѐ: и҆ нѣ́сть, и҆́же ѹ҆кры́етсѧ теплоты̀ є҆гѡ̀. зако́нъ гдⷭ҇ень непоро́ченъ, ѡ҆браща́ѧй дꙋ́шы: свидѣ́тельство гдⷭ҇не вѣ́рно, ѹ҆мꙋдрѧ́ющее младе́нцы. ѡ҆правда̑нїѧ гдⷭ҇нѧ пра̑ва, веселѧ̑щаѧ се́рдце: за́повѣдь гдⷭ҇нѧ свѣтла̀, просвѣща́ющаѧ ѻ҆́чи. стра́хъ гдⷭ҇ень чи́стъ, пребыва́ѧй въ вѣ́къ вѣ́ка: сꙋдьбы̑ гдⷭ҇ни и҆́стинны, ѡ҆правда̑нны вкꙋ́пѣ, вожделѣ̑нны па́че зла́та и҆ ка́мене че́стна мно́га, и҆ сла́ждшѧ па́че ме́да и҆ со́та. и҆́бо ра́бъ тво́й храни́тъ ѧ҆̀: внегда̀ сохрани́ти ѧ҆̀, воздаѧ́нїе мно́го. грѣхопадє́нїѧ кто̀ разꙋмѣ́етъ; ѿ та́йныхъ мои́хъ ѡ҆чи́сти мѧ̀, и҆ ѿ чꙋжди́хъ пощадѝ раба̀ твоего̀: а҆́ще не ѡ҆блада́ютъ мно́ю, тогда̀ непоро́ченъ бꙋ́дꙋ, и҆ ѡ҆чи́щꙋсѧ ѿ грѣха̀ вели́ка. и҆ бꙋ́дꙋтъ во бл҃говоле́нїе словеса̀ ѹ҆́стъ мои́хъ, и҆ поꙋче́нїе се́рдца моегѡ̀ пред̾ тобо́ю вы́нꙋ, гдⷭ҇и, помо́щниче мо́й и҆ и҆зба́вителю мо́й.
Ѹ҆слы́шитъ тѧ̀ гдⷭ҇ь въ де́нь печа́ли, защи́титъ тѧ̀ и҆́мѧ бг҃а і҆а́кѡвлѧ. по́слетъ тѝ по́мощь ѿ ст҃а́гѡ, и҆ ѿ сїѡ́на застꙋ́питъ тѧ̀. помѧне́тъ всѧ́кꙋ же́ртвꙋ твою̀, и҆ всесожже́нїе твоѐ тꙋ́чно бꙋ́ди. да́стъ тѝ гдⷭ҇ь по се́рдцꙋ твоемꙋ̀, и҆ ве́сь совѣ́тъ тво́й и҆спо́лнитъ. возра́дꙋемсѧ ѡ҆ сп҃се́нїи твое́мъ, и҆ во и҆́мѧ гдⷭ҇а бг҃а на́шегѡ возвели́чимсѧ: и҆спо́лнитъ гдⷭ҇ь всѧ̑ прошє́нїѧ твоѧ̑. ны́нѣ позна́хъ, ꙗ҆́кѡ сп҃сѐ гдⷭ҇ь хрїста̀ своего̀: ѹ҆слы́шитъ є҆го̀ съ нб҃сѐ ст҃а́гѡ своегѡ̀: въ си́лахъ сп҃се́нїе десни́цы є҆гѡ̀. сі́и на колесни́цахъ, и҆ сі́и на ко́нехъ: мы́ же во и҆́мѧ гдⷭ҇а бг҃а на́шегѡ призове́мъ. ті́и спѧ́ти бы́ша и҆ падо́ша: мы́ же воста́хомъ и҆ и҆спра́вихомсѧ. гдⷭ҇и, спасѝ царѧ̀, и҆ ѹ҆слы́ши ны̀, во́ньже а҆́ще де́нь призове́мъ тѧ̀.
Гдⷭ҇и, си́лою твое́ю возвесели́тсѧ ца́рь, и҆ ѡ҆ сп҃се́нїи твое́мъ возра́дꙋетсѧ ѕѣлѡ̀. жела́нїе се́рдца є҆гѡ̀ да́лъ є҆сѝ є҆мꙋ̀, и҆ хотѣ́нїѧ ѹ҆стнꙋ̀ є҆гѡ̀ нѣ́си лиши́лъ є҆го̀. ꙗ҆́кѡ предвари́лъ є҆сѝ є҆го̀ бл҃гослове́нїемъ бл҃госты́ннымъ, положи́лъ є҆сѝ на главѣ̀ є҆гѡ̀ вѣне́цъ ѿ ка́мене че́стна. живота̀ проси́лъ є҆́сть ѹ҆ тебє̀, и҆ да́лъ є҆сѝ є҆мꙋ̀ долготꙋ̀ дні́й во вѣ́къ вѣ́ка. ве́лїѧ сла́ва є҆гѡ̀ сп҃се́нїемъ твои́мъ: сла́вꙋ и҆ велелѣ́пїе возложи́ши на него̀. ꙗ҆́кѡ да́си є҆мꙋ̀ бл҃гослове́нїе во вѣ́къ вѣ́ка: возвесели́ши є҆гѡ̀ ра́достїю съ лице́мъ твои́мъ. ꙗ҆́кѡ ца́рь ѹ҆пова́етъ на гдⷭ҇а, и҆ млⷭ҇тїю вы́шнѧгѡ не подви́житсѧ. да ѡ҆брѧ́щетсѧ рꙋка̀ твоѧ̀ всѣ̑мъ врагѡ́мъ твои̑мъ, десни́ца твоѧ̀ да ѡ҆брѧ́щетъ всѧ̑ ненави́дѧщыѧ тебѐ. ꙗ҆́кѡ положи́ши и҆̀хъ ꙗ҆́кѡ пе́щь ѻ҆́гненнꙋю во вре́мѧ лица̀ твоегѡ̀: гдⷭ҇ь гнѣ́вомъ свои́мъ смѧте́тъ ѧ҆̀, и҆ снѣ́сть и҆̀хъ ѻ҆́гнь. пло́дъ и҆́хъ ѿ землѝ погꙋби́ши, и҆ сѣ́мѧ и҆́хъ ѿ сынѡ́въ человѣ́ческихъ. ꙗ҆́кѡ ѹ҆клони́ша на тѧ̀ ѕла̑ѧ, помы́слиша совѣ́ты, и҆̀хже не возмо́гꙋтъ соста́вити. ꙗ҆́кѡ положи́ши ѧ҆̀ хребе́тъ: во и҆збы́тцѣхъ твои́хъ ѹ҆гото́виши лицѐ и҆́хъ. вознеси́сѧ, гдⷭ҇и, си́лою твое́ю: воспое́мъ и҆ пое́мъ си̑лы твоѧ̑.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бж҃е, бж҃е мо́й, вонми́ ми, вскꙋ́ю ѡ҆ста́вилъ мѧ̀ є҆сѝ; дале́че ѿ сп҃се́нїѧ моегѡ̀ словеса̀ грѣхопаде́нїй мои́хъ. бж҃е мо́й, воззовꙋ̀ во днѝ, и҆ не ѹ҆слы́шиши, и҆ въ нощѝ, и҆ не въ безꙋ́мїе мнѣ̀. ты́ же во ст҃ѣ́мъ живе́ши, хвало̀ і҆и҃лева. на тѧ̀ ѹ҆пова́ша ѻ҆тцы̀ на́ши: ѹ҆пова́ша, и҆ и҆зба́вилъ є҆сѝ ѧ҆̀: къ тебѣ̀ воззва́ша, и҆ спасо́шасѧ: на тѧ̀ ѹ҆пова́ша, и҆ не постыдѣ́шасѧ. а҆́зъ же є҆́смь че́рвь, а҆ не человѣ́къ, поноше́нїе человѣ́кѡвъ и҆ ѹ҆ничиже́нїе люде́й. всѝ ви́дѧщїи мѧ̀ порꙋга́шамисѧ, глаго́лаша ѹ҆стна́ми, покива́ша главо́ю: ѹ҆пова̀ на гдⷭ҇а, да и҆зба́витъ є҆го̀, да сп҃се́тъ є҆го̀, ꙗ҆́кѡ хо́щетъ є҆го̀. ꙗ҆́кѡ ты̀ є҆сѝ и҆сто́ргїй мѧ̀ и҆з̾ чре́ва, ѹ҆пова́нїе моѐ ѿ сѡсцꙋ̀ ма́тере моеѧ̀. къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀ бг҃ъ мо́й є҆сѝ ты̀. да не ѿстꙋ́пиши ѿ менѐ, ꙗ҆́кѡ ско́рбь бли́з̾, ꙗ҆́кѡ нѣ́сть помога́ѧй мѝ. ѡ҆быдо́ша мѧ̀ тельцы̀ мно́зи, ю҆нцы̀ тꙋ́чнїи ѡ҆держа́ша мѧ̀: ѿверзо́ша на мѧ̀ ѹ҆ста̀ своѧ̑, ꙗ҆́кѡ ле́въ восхища́ѧй и҆ рыка́ѧй. ꙗ҆́кѡ вода̀ и҆злїѧ́хсѧ, и҆ разсы́пашасѧ всѧ̑ кѡ́сти моѧ̑: бы́сть се́рдце моѐ ꙗ҆́кѡ во́скъ та́ѧй посредѣ̀ чре́ва моегѡ̀. и҆́зсше ꙗ҆́кѡ скꙋде́ль крѣ́пость моѧ̀, и҆ ѧ҆зы́къ мо́й прильпѐ горта́ни моемꙋ̀, и҆ въ пе́рсть сме́рти све́лъ мѧ̀ є҆сѝ. ꙗ҆́кѡ ѡ҆быдо́ша мѧ̀ псѝ мно́зи, со́нмъ лꙋка́выхъ ѡ҆держа́ша мѧ̀: и҆скопа́ша рꙋ́цѣ моѝ и҆ но́зѣ моѝ. и҆счето́ша всѧ̑ кѡ́сти моѧ̑: ті́и же смотри́ша и҆ презрѣ́ша мѧ̀. раздѣли́ша ри̑зы моѧ̑ себѣ̀, и҆ ѡ҆ ѻ҆де́жди мое́й мета́ша жре́бїй. ты́ же, гдⷭ҇и, не ѹ҆далѝ по́мощь твою̀ ѿ менѐ: на застꙋпле́нїе моѐ вонмѝ. и҆зба́ви ѿ ѻ҆рꙋ́жїѧ дꙋ́шꙋ мою̀, и҆ и҆з̾ рꙋкѝ пе́сїи є҆диноро́днꙋю мою̀. сп҃си́ мѧ ѿ ѹ҆́стъ льво́выхъ, и҆ ѿ рѡ́гъ є҆динорѡ́жъ смире́нїе моѐ. повѣ́мъ и҆́мѧ твоѐ бра́тїи мое́й, посредѣ̀ цр҃кве воспою̀ тѧ̀. боѧ́щїисѧ гдⷭ҇а, восхвали́те є҆го̀, всѐ сѣ́мѧ і҆а́кѡвле, просла́вите є҆го̀, да ѹ҆бои́тсѧ же ѿ негѡ̀ всѐ сѣ́мѧ і҆и҃лево: ꙗ҆́кѡ не ѹ҆ничижѝ, нижѐ негодова̀ моли́твы ни́щагѡ, нижѐ ѿвратѝ лицѐ своѐ ѿ менѐ, и҆ є҆гда̀ воззва́хъ къ немꙋ̀, ѹ҆слы́ша мѧ̀. ѿ тебє̀ похвала̀ моѧ̀, въ цр҃кви вели́цѣй и҆сповѣ́мсѧ тебѣ̀: моли̑твы моѧ̑ возда́мъ пред̾ боѧ́щимисѧ є҆гѡ̀. ꙗ҆дѧ́тъ ѹ҆бо́зїи, и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀: жива̑ бꙋ́дꙋтъ сердца̀ и҆́хъ въ вѣ́къ вѣ́ка. помѧнꙋ́тсѧ и҆ ѡ҆братѧ́тсѧ ко гдⷭ҇ꙋ всѝ концы̀ землѝ, и҆ покло́нѧтсѧ пред̾ ни́мъ всѧ̑ ѻ҆те́чєствїѧ ꙗ҆зы̑къ: ꙗ҆́кѡ гдⷭ҇не є҆́сть црⷭ҇твїе, и҆ то́й ѡ҆блада́етъ ꙗ҆зы́ки. ꙗ҆до́ша и҆ поклони́шасѧ всѝ тꙋ́чнїи землѝ: пред̾ ни́мъ припадꙋ́тъ всѝ низходѧ́щїи въ зе́млю: и҆ дꙋша̀ моѧ̀ томꙋ̀ живе́тъ. и҆ сѣ́мѧ моѐ порабо́таетъ є҆мꙋ̀: возвѣсти́тъ гдⷭ҇еви ро́дъ грѧдꙋ́щїй: и҆ возвѣстѧ́тъ пра́вдꙋ є҆гѡ̀ лю́демъ ро́ждшымсѧ, ꙗ҆̀же сотворѝ гдⷭ҇ь.
Гдⷭ҇ь пасе́тъ мѧ̀, и҆ ничто́же мѧ̀ лиши́тъ. на мѣ́сте ѕла́чнѣ, та́мѡ всели́ мѧ, на водѣ̀ поко́йнѣ воспита́ мѧ. дꙋ́шꙋ мою̀ ѡ҆братѝ, наста́ви мѧ̀ на стєзѝ пра́вды, и҆́мене ра́ди своегѡ̀. а҆́ще бо и҆ пойдꙋ̀ посредѣ̀ сѣ́ни сме́ртныѧ, не ѹ҆бою́сѧ ѕла̀, ꙗ҆́кѡ ты̀ со мно́ю є҆сѝ: же́злъ тво́й и҆ па́лица твоѧ̀, та̑ мѧ̀ ѹ҆тѣ́шиста. ѹ҆гото́валъ є҆сѝ предо мно́ю трапе́зꙋ сопроти́въ стꙋжа́ющымъ мнѣ̀: ѹ҆ма́стилъ є҆сѝ є҆ле́омъ главꙋ̀ мою̀, и҆ ча́ша твоѧ̀ ѹ҆поѧва́ющи мѧ̀, ꙗ҆́кѡ держа́вна. и҆ млⷭ҇ть твоѧ̀ пожене́тъ мѧ̀ всѧ̑ дни̑ живота̀ моегѡ̀, и҆ є҆́же всели́тимисѧ въ до́мъ гдⷭ҇ень въ долготꙋ̀ дні́й.
Гдⷭ҇нѧ землѧ̀, и҆ и҆сполне́нїе є҆ѧ̀, вселе́ннаѧ и҆ всѝ живꙋ́щїи на не́й. то́й на морѧ́хъ ѡ҆снова́лъ ю҆̀ є҆́сть и҆ на рѣка́хъ ѹ҆гото́валъ ю҆̀ є҆́сть. кто̀ взы́детъ на го́рꙋ гдⷭ҇ню; и҆лѝ кто̀ ста́нетъ на мѣ́стѣ ст҃ѣ́мъ є҆гѡ̀; непови́ненъ рꙋка́ма и҆ чи́стъ се́рдцемъ, и҆́же не прїѧ́тъ всꙋ́е дꙋ́шꙋ свою̀ и҆ не клѧ́тсѧ ле́стїю и҆́скреннемꙋ своемꙋ̀: се́й прїи́метъ бл҃гослове́нїе ѿ гдⷭ҇а и҆ млⷭ҇тыню ѿ бг҃а сп҃са своегѡ̀. се́й ро́дъ и҆́щꙋщихъ гдⷭ҇а, и҆́щꙋщихъ лицѐ бг҃а і҆а́кѡвлѧ. возми́те врата̀ кнѧ̑зи ва̑ша, и҆ возми́тесѧ врата̀ вѣ̑чнаѧ: и҆ вни́детъ цр҃ь сла́вы. кто́ є҆сть се́й цр҃ь сла́вы; гдⷭ҇ь крѣ́покъ и҆ си́ленъ, гдⷭ҇ь си́ленъ въ бра́ни. возми́те врата̀ кнѧ̑зи ва̑ша, и҆ возми́тесѧ врата̀ вѣ̑чнаѧ: и҆ вни́детъ цр҃ь сла́вы. кто́ є҆сть се́й цр҃ь сла́вы; гдⷭ҇ь си́лъ, то́й є҆́сть цр҃ь сла́вы.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Живо́тъ во гро́бѣ возлежа́ше, и҆ печа́ть на ка́мени надлежа́ше: / ꙗ҆́кѡ цр҃ѧ̀ спѧ́ща во́ини стрежа́хꙋ хрⷭ҇та̀, / и҆ врагѝ своѧ̑ неви́димѡ порази́вый, воскр҃се гдⷭ҇ь.
Сті́хъ: И҆сповѣ́мсѧ тебѣ̀ гдⷭ҇и, всѣ́мъ се́рдцемъ мои́мъ, повѣ́мъ всѧ̑ чꙋдеса̀ твоѧ̑.
Преднаписꙋ́етъ і҆ѡ́на гро́бъ тво́й, / и҆ сказꙋ́етъ сѷмеѡ́нъ воста́нїе бж҃е́ственное, безсме́ртне гдⷭ҇и: / соше́лъ бо є҆сѝ ꙗ҆́кѡ ме́ртвъ во гро́бъ, разрꙋши́вый а҆́дѡва врата̀. / воскрⷭ҇лъ же є҆сѝ кромѣ̀ тлѣ́нїѧ ꙗ҆́кѡ влⷣка, / во сп҃се́нїе мі́ра, хрⷭ҇тѐ бж҃е на́шъ, / просвѣти́вый сꙋ́щыѧ во тьмѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Бцⷣе дв҃о, молѝ сн҃а твоего̀, / во́лею пригвожде́ннаго на крⷭ҇тѣ̀, / и҆ воскрⷭ҇шаго и҆з̾ ме́ртвыхъ хрⷭ҇та̀ бг҃а на́шего, / сп҃сти́сѧ дꙋша́мъ на́шымъ.
Гдⷭ҇и поми́лꙋй, в҃і.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
И҆ пое́мъ полѷеле́й: ѱалмы̀ рл҃д и҆ рл҃є.
Хвали́те и҆́мѧ гдⷭ҇не, хвали́те, рабѝ гдⷭ҇а. Ґллилꙋ́їа. [Три́жды.] Стоѧ́щїи во хра́мѣ гдⷭ҇ни, во дво́рѣхъ до́мꙋ бг҃а на́шегѡ. хвали́те гдⷭ҇а, ꙗ҆́кѡ бла́гъ гдⷭ҇ь: по́йте и҆́мени є҆гѡ̀, ꙗ҆́кѡ добро̀: ꙗ҆́кѡ і҆а́кѡва и҆збра̀ себѣ̀ гдⷭ҇ь, і҆и҃лѧ въ достоѧ́нїе себѣ̀: ꙗ҆́кѡ а҆́зъ позна́хъ, ꙗ҆́кѡ ве́лїй гдⷭ҇ь, и҆ гдⷭ҇ь на́шъ над̾ всѣ́ми бо́ги: всѧ̑, є҆ли̑ка восхотѣ̀ гдⷭ҇ь, сотворѝ на нб҃сѝ и҆ на землѝ, въ морѧ́хъ и҆ во всѣ́хъ бе́зднахъ. возводѧ̀ ѻ҆́блаки ѿ послѣ́днихъ землѝ, мѡ́лнїи въ до́ждь сотворѝ, и҆зводѧ́й вѣ́тры ѿ сокро́вищъ свои́хъ. и҆́же поразѝ пе́рвенцы є҆гѵ́пєтскїѧ ѿ человѣ́ка до скота̀: посла̀ зна́мєнїѧ и҆ чꙋдеса̀ посредѣ̀ тебє̀, є҆гѵ́пте, на фараѡ́на и҆ на всѧ̑ рабы̑ є҆гѡ̀. и҆́же поразѝ ꙗ҆зы́ки мнѡ́ги и҆ и҆збѝ царѝ крѣ́пки: сиѡ́на царѧ̀ а҆морре́йска и҆ ѡ҆́га царѧ̀ васа́нска, и҆ всѧ̑ ца̑рствїѧ ханаа̑нска: и҆ дадѐ зе́млю и҆́хъ достоѧ́нїе, достоѧ́нїе і҆и҃лю лю́демъ свои̑мъ. гдⷭ҇и, и҆́мѧ твоѐ въ вѣ́къ, и҆ па́мѧть твоѧ̀ въ ро́дъ и҆ ро́дъ: ꙗ҆́кѡ сꙋди́ти и҆́мать гдⷭ҇ь лю́демъ свои̑мъ, и҆ ѡ҆ рабѣ́хъ свои́хъ ѹ҆мо́литсѧ. јдѡли ꙗ҆зы̑къ сребро̀ и҆ зла́то, дѣла̀ рꙋ́къ человѣ́ческихъ: ѹ҆ста̀ и҆́мꙋтъ, и҆ не возглаго́лютъ: ѻ҆́чи и҆́мꙋтъ, и҆ не ѹ҆́зрѧтъ: ѹ҆́ши и҆́мꙋтъ, и҆ не ѹ҆слы́шатъ: ниже́ бо є҆́сть дꙋ́хъ во ѹ҆стѣ́хъ и҆́хъ. подо́бни и҆̀мъ да бꙋ́дꙋтъ творѧ́щїи ѧ҆̀ и҆ всѝ надѣ́ющїисѧ на нѧ̀. до́ме і҆и҃левъ, бл҃гослови́те гдⷭ҇а: до́ме а҆арѡ́нь, бл҃гослови́те гдⷭ҇а: до́ме леѵї́инъ, бл҃гослови́те гдⷭ҇а: боѧ́щїисѧ гдⷭ҇а, бл҃гослови́те гдⷭ҇а. Бл҃гослове́нъ гдⷭ҇ь ѿ сїѡ́на, живы́й во і҆ерⷭ҇ли́мѣ. Ґллилꙋ́їа. [Три́жды.]
И҆сповѣ́дайтесѧ гдⷭ҇еви, ꙗ҆́кѡ бл҃гъ: ꙗ҆́кѡ въ вѣ́къ млⷭ҇ть є҆гѡ̀. Ґллилꙋ́їа. [Три́жды.] И҆сповѣ́дайтесѧ бг҃ꙋ богѡ́въ: ꙗ҆́кѡ въ вѣ́къ млⷭ҇ть є҆гѡ̀. и҆сповѣ́дайтесѧ гдⷭ҇еви господе́й: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ чꙋдеса̀ вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ небеса̀ ра́зꙋмомъ: ꙗ҆́кѡ въ вѣ́къ млⷭ҇ть є҆гѡ̀. ѹ҆тверди́вшемꙋ зе́млю на вода́хъ: ꙗ҆́кѡ въ вѣ́къ млⷭ҇ть є҆гѡ̀. сотво́ршемꙋ свѣти̑ла вє́лїѧ є҆ди́номꙋ: ꙗ҆́кѡ въ вѣ́къ млⷭ҇ть є҆гѡ̀: со́лнце во ѻ҆́бласть днѐ: ꙗ҆́кѡ въ вѣ́къ млⷭ҇ть є҆гѡ̀: лꙋнꙋ̀ и҆ ѕвѣ́зды во ѻ҆́бласть но́щи: ꙗ҆́кѡ въ вѣ́къ млⷭ҇ть є҆гѡ̀. порази́вшемꙋ є҆гѵ́пта съ пе́рвенцы є҆гѡ̀: ꙗ҆́кѡ въ вѣ́къ млⷭ҇ть є҆гѡ̀: и҆ и҆зве́дшемꙋ і҆и҃лѧ ѿ среды̀ и҆́хъ: ꙗ҆́кѡ въ вѣ́къ млⷭ҇ть є҆гѡ̀: рꙋко́ю крѣ́пкою и҆ мы́шцею высо́кою: ꙗ҆́кѡ въ вѣ́къ млⷭ҇ть є҆гѡ̀. раздѣ́льшемꙋ чермно́е мо́ре въ раздѣлє́нїѧ: ꙗ҆́кѡ въ вѣ́къ млⷭ҇ть є҆гѡ̀: и҆ прове́дшемꙋ і҆и҃лѧ посредѣ̀ є҆гѡ̀: ꙗ҆́кѡ въ вѣ́къ млⷭ҇ть є҆гѡ̀: и҆ и҆стрѧ́сшемꙋ фараѡ́на и҆ си́лꙋ є҆гѡ̀ въ мо́ре чермно́е: ꙗ҆́кѡ въ вѣ́къ млⷭ҇ть є҆гѡ̀. прове́дшемꙋ лю́ди своѧ̑ въ пꙋсты́ни: ꙗ҆́кѡ въ вѣ́къ млⷭ҇ть є҆гѡ̀. порази́вшемꙋ царѝ вє́лїѧ: ꙗ҆́кѡ въ вѣ́къ млⷭ҇ть є҆гѡ̀. и҆ ѹ҆би́вшемꙋ царѝ крѣ̑пкїѧ: ꙗ҆́кѡ въ вѣ́къ млⷭ҇ть є҆гѡ̀: сиѡ́на царѧ̀ а҆морре́йска: ꙗ҆́кѡ въ вѣ́къ млⷭ҇ть є҆гѡ̀: и҆ ѡ҆́га царѧ̀ васа́нска: ꙗ҆́кѡ въ вѣ́къ млⷭ҇ть є҆гѡ̀. и҆ да́вшемꙋ зе́млю и҆́хъ достоѧ́нїе: ꙗ҆́кѡ въ вѣ́къ млⷭ҇ть є҆гѡ̀: достоѧ́нїе і҆и҃лю рабꙋ̀ своемꙋ̀: ꙗ҆́кѡ въ вѣ́къ млⷭ҇ть є҆гѡ̀. ꙗ҆́кѡ во смире́нїи на́шемъ помѧнꙋ́ ны гдⷭ҇ь: ꙗ҆́кѡ въ вѣ́къ млⷭ҇ть є҆гѡ̀. и҆ и҆зба́вилъ ны̀ є҆́сть ѿ врагѡ́въ на́шихъ: ꙗ҆́кѡ въ вѣ́къ млⷭ҇ть є҆гѡ̀: даѧ́й пи́щꙋ всѧ́кой пло́ти: ꙗ҆́кѡ въ вѣ́къ млⷭ҇ть є҆гѡ̀. И҆сповѣ́дайтесѧ бг҃ꙋ нбⷭ҇номꙋ: ꙗ҆́кѡ въ вѣ́къ млⷭ҇ть є҆гѡ̀. Ґллилꙋ́їа. [Три́жды.]
пое́мыѧ по непоро́чнахъ,
въ недѣ́лѧхъ всегѡ̀ лёта, гла́съ є7.
Сті́хъ: Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
А҆́гг҃льскїй собо́ръ ѹ҆диви́сѧ, / зрѧ̀ тебѐ въ ме́ртвыхъ вмѣни́вшасѧ, / сме́ртнꙋю же, сп҃се, крѣ́пость разори́вша, / и҆ съ собо́ю а҆да́ма воздви́гша, / и҆ ѿ а҆́да всѧ̑ свобо́ждша.
Сті́хъ: Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
Почто̀ м›ра съ ми́лостивными слеза́ми, / ѽ ѹ҆ч҃нцы, растворѧ́ете; / блиста́ѧйсѧ во гро́бѣ а҆́гг҃лъ мѷроно́сицамъ вѣща́ше: / ви́дите вы̀ гро́бъ и҆ ѹ҆разꙋмѣ́йте, / сп҃съ бо воскр҃се ѿ гро́ба.
Сті́хъ: Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
Ѕѣлѡ̀ ра́нѡ мѷронѡ́сицы теча́хꙋ / ко гро́бꙋ твоемꙋ̀ рыда́ющѧ, / но предста̀ къ ни̑мъ а҆́гг҃лъ и҆ речѐ: / рыда́нїѧ вре́мѧ преста̀, не пла́чите, / воскрⷭ҇нїе же а҆пⷭ҇лѡмъ рцы́те.
Сті́хъ: Бл҃гослове́нъ є҆сѝ гдⷭ҇и, / наꙋчи́ мѧ ѡ҆правда́нїємъ твои̑мъ.
Мѷронѡ́сицы жєны̀, съ мѵ́ры прише́дшѧ / ко гро́бꙋ твоемꙋ̀, сп҃се, рыда́хꙋ, / а҆́гг҃лъ же къ ни̑мъ речѐ глаго́лѧ: / что̀ съ ме́ртвыми жива́го помышлѧ́ете; / ꙗ҆́кѡ бг҃ъ бо воскр҃се ѿ гро́ба.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Трⷪ҇ченъ: Поклони́мсѧ ѻ҆ц҃ꙋ̀ / и҆ є҆гѡ̀ сн҃ови, и҆ ст҃о́мꙋ д¦ꙋ, / ст҃ѣ́й трⷪ҇цѣ во є҆ди́номъ сꙋществѣ̀, / съ серафі́мы зовꙋ́ще: / свѧ́тъ, свѧ́тъ, свѧ́тъ, є҆сѝ гдⷭ҇и.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Жизнода́вца ро́ждши, / грѣха̀, дв҃о, а҆да́ма и҆зба́вила є҆сѝ, / ра́дость же є҆́ѵѣ въ печа́ли мѣ́сто подала̀ є҆сѝ: / па́дшыѧ же ѿ жи́зни къ се́й напра́ви, / и҆з̾ тебѐ воплоти́выйсѧ бг҃ъ и҆ чл҃вѣ́къ.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Во́льною и҆ животворѧ́щею твое́ю сме́ртїю хрⷭ҇тѐ, / врата̀ а҆́дѡва сокрꙋши́въ ꙗ҆́кѡ бг҃ъ, / ѿве́рзлъ є҆сѝ на́мъ дре́внїй ра́й, и҆ воскр҃съ и҆з̾ ме́ртвыхъ, / и҆зба́вилъ є҆сѝ ѿ тлѣ́нїѧ живо́тъ на́шъ.
На нб҃о ѻ҆́чи моѝ возвожꙋ̀, къ тебѣ̀ сло́ве: / ѹ҆ще́дри мѧ̀, да живꙋ̀ тебѣ̀.
Поми́лꙋй на́съ ѹ҆ничиже́нныхъ, / ѹ҆строѧ́ѧ бл҃гопотрє́бныѧ твоѧ̑ сосꙋ́ды сло́ве.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ст҃о́мꙋ д¦ꙋ, всѧ́каѧ всесп҃си́тельнаѧ вина̀, / а҆́ще ко́емꙋ се́й по достоѧ́нїю дхне́тъ, / ско́рѡ взе́млетъ ѿ земны́хъ: восперѧ́етъ, возраща́етъ, ѹ҆строѧ́етъ горѣ̀.
А҆́ще не гдⷭ҇ь бы бы́лъ въ на́съ, / никто́же ѿ на́съ проти́вꙋ возмо́глъ бы вра̑жїимъ бра́немъ ѡ҆долѣ́ти: / побѣжда́ющїи бо ѿ здѣ̀ возно́сѧтсѧ.
Зꙋбы̀ и҆́хъ да не ꙗ҆́та бꙋ́детъ дꙋша̀ моѧ̀ ꙗ҆́кѡ птене́цъ, сло́ве: / ѹ҆вы̀ мнѣ̀, ка́кѡ и҆́мамъ ѿ врага̀ и҆збы́ти грѣхолюби́въ сы́й!
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ст҃ы́мъ д¦омъ ѡ҆боже́нїе всѣ̑мъ, / бл҃говоле́нїе, ра́зꙋмъ, ми́ръ и҆ бл҃гослове́нїе: / равнодѣ́теленъ бо є҆́сть ѻ҆ц҃ꙋ̀ и҆ сло́вꙋ.
Надѣ́ющїисѧ на гдⷭ҇а врагѡ́мъ стра́шни, и҆ всѣ̑мъ ди́вни: / горѣ́ бо зрѧ́тъ.
Въ беззакѡ́нїѧ рꙋ́къ свои́хъ, пра́ведныхъ жре́бїй, / помо́щника тѧ̀ и҆мѣ́ѧ сп҃се, не простира́етъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ст҃а́гѡ д¦а держа́ва на всѣ́хъ: / є҆мꙋ́же вы̑шнѧѧ вѡ́инства покланѧ́ютсѧ, / со всѧ́кимъ дыха́нїемъ до́льнымъ.
Гдⷭ҇и, воздви́гни си́лꙋ твою̀, и҆ прїидѝ во є҆́же сп҃стѝ на́съ.
Гдⷭ҇и, воздви́гни си́лꙋ твою̀, и҆ прїидѝ во є҆́же сп҃стѝ на́съ.
Сті́хъ: Пасы́й і҆и҃лѧ вонмѝ, наставлѧ́ѧй ꙗ҆́кѡ ѻ҆вча̀ і҆ѡ́сифа.
Гдⷭ҇и, воздви́гни си́лꙋ твою̀, и҆ прїидѝ во є҆́же сп҃стѝ на́съ.
Гдⷭ҇и, воздви́гни си́лꙋ твою̀.
И҆ прїидѝ во є҆́же сп҃стѝ на́съ.
Всѧ́кое дыха́нїе да хва́литъ гдⷭ҇а.
Всѧ́кое дыха́нїе да хва́литъ гдⷭ҇а.
Сті́хъ: Хвали́те бг҃а во ст҃ы́хъ є҆гѡ̀, хвали́те є҆го̀ во ѹ҆твержде́нїи си́лы є҆гѡ̀.
Всѧ́кое дыха́нїе да хва́литъ гдⷭ҇а.
Всѧ́кое дыха́нїе.
Да хва́литъ гдⷭ҇а.
И҆ а҆́бїе, Гдⷭ҇и поми́лꙋй. [Три́жды.]
҆҆ Є҆ђлїе ѿ лꙋкѝ, зача́ло рд҃і.
Во вре́мѧ ѻ҆́но, воскре́съ і҆и҃съ ѿ ме́ртвыхъ, ста̀ посредѣ̀ ѹ҆чени̑къ свои́хъ, и҆ глаго́ла и҆̀мъ: ми́ръ ва́мъ. ѹ҆боѧ́вшесѧ же и҆ пристра́шни бы́вше, мнѧ́хꙋ дꙋ́хъ ви́дѧще. и҆ речѐ и҆̀мъ: что̀ смꙋще́ни є҆стѐ; и҆ почто̀ помышлє́нїѧ вхо́дѧтъ въ сердца̀ ва́ша; ви́дите рꙋ́цѣ моѝ, и҆ но́зѣ моѝ, ꙗ҆́кѡ са́мъ а҆́зъ є҆́смь. ѡ҆сѧжи́те мѧ̀ и҆ ви́дите, ꙗ҆́кѡ дꙋ́хъ пло́ти и҆ ко́сти не и҆́мать, ꙗ҆́коже менѐ ви́дите и҆мꙋ́ща. и҆ сїѐ ре́къ, показа̀ и҆̀мъ рꙋ́цѣ и҆ но́зѣ. є҆ще́ же не вѣ́рꙋющымъ и҆̀мъ ѿ ра́дости, и҆ чꙋдѧ́щымсѧ, речѐ и҆̀мъ: и҆́мате ли что̀ снѣ́дно здѣ̀, ѻ҆ни́ же да́ша є҆мꙋ̀ ры́бы печены̀ ча́сть, и҆ ѿ пче́лъ со́тъ. и҆ взе́мъ, пред̾ ни́ми ꙗ҆дѐ. рече́ же и҆̀мъ: сїѧ̀ сꙋ́ть словеса̀, ꙗ҆̀же глаго́лахъ къ ва́мъ, є҆щѐ сы́й съ ва́ми, ꙗ҆́кѡ подоба́етъ сконча́тисѧ всѣ̑мъ напи̑саннымъ въ зако́нѣ мѡѷсе́овѣ, и҆ проро́цѣхъ и҆ ѱалмѣ́хъ ѡ҆ мнѣ̀. тогда̀ ѿве́рзе и҆̀мъ ѹ҆́мъ, разꙋмѣ́ти писа̑нїѧ. и҆ речѐ и҆̀мъ: ꙗ҆́кѡ та́кѡ пи́сано є҆́сть, и҆ та́кѡ подоба́ше пострада́ти хрⷭ҇тꙋ̀ и҆ воскре́снꙋти ѿ ме́ртвыхъ въ тре́тїй де́нь, и҆ проповѣ́датисѧ во и҆́мѧ є҆гѡ̀ покаѧ́нїю и҆ ѿпꙋще́нїю грѣхѡ́въ, во всѣ́хъ ꙗ҆зы́цѣхъ, наче́нше ѿ і҆ерꙋсали́ма. вы́ же є҆стѐ свидѣ́телїе си̑мъ. и҆ сѐ а҆́зъ послю̀ ѡ҆бѣтова́нїе ѻ҆ц҃а̀ моегѡ̀ на вы̀: вы́ же сѣди́те во гра́дѣ і҆ерꙋсали́мстѣ, до́ндеже ѡ҆блече́тесѧ си́лою свы́ше. и҆зве́дъ же и҆̀хъ во́нъ до виѳа́ні҆и, и҆ воздви́гъ рꙋ́цѣ своѝ, и҆ бл҃гословѝ и҆̀хъ. и҆ бы́сть є҆гда̀ бл҃гословлѧ́ше и҆̀хъ, ѿстꙋпѝ ѿ ни́хъ, и҆ возноша́шесѧ на нб҃о. и҆ ті́и поклони́шасѧ є҆мꙋ̀, и҆ возврати́шасѧ во і҆ерꙋсали́мъ съ ра́достїю вели́кою. и҆ бѧ́хꙋ вы́нꙋ въ це́ркви, хва́лѧще и҆ благословѧ́ще бг҃а. а҆ми́нь.
Воскресе́нїе хрⷭ҇то́во ви́дѣвше, / поклони́мсѧ ст҃о́мꙋ гдⷭ҇ꙋ і҆и҃сꙋ, / є҆ди́номꙋ безгрѣ́шномꙋ. / крⷭ҇тꙋ̀ твоемꙋ̀ покланѧ́емсѧ хрⷭ҇тѐ, / и҆ ст҃о́е воскресе́нїе твоѐ пое́мъ и҆ сла́вимъ: / ты́ бо є҆сѝ бг҃ъ на́шъ, / ра́звѣ тебѐ и҆но́гѡ не зна́емъ, / и҆́мѧ твоѐ и҆менꙋ́емъ. / прїиди́те всѝ вѣ́рнїи, / поклони́мсѧ ст҃о́мꙋ хрⷭ҇то́вꙋ воскресе́нїю: / се́ бо прїи́де крⷭ҇то́мъ ра́дость всемꙋ̀ мі́рꙋ. / всегда̀ бл҃гословѧ́ще гдⷭ҇а, / пое́мъ воскресе́нїе є҆гѡ̀: / распѧ́тїе бо претерпѣ́въ, / сме́ртїю сме́рть разрꙋшѝ.
Поми́лꙋй мѧ̀ бж҃е, по вели́цѣй ми́лости твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ, ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ѹ҆бѣлю́сѧ. слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й. не ѿве́ржи менє̀ ѿ лица̀ твоегѡ̀, и҆ д¦а твоегѡ̀ ст҃а́гѡ не ѿимѝ ѿ менє̀. возда́ждь мѝ ра́дость сп҃се́нїѧ твоегѡ̀, и҆ д¦омъ влⷣчнимъ ѹ҆тверди́ мѧ. наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. и҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. гдⷭ҇и, ѹ҆стнѣ̀ моѝ ѿве́рзеши, и҆ ѹ҆ста̀ моѧ̑ возвѣстѧ́тъ хвалꙋ̀ твою̀. ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ѹ҆́бѡ: всесожже́нїѧ не бл҃говоли́ши. же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ѹ҆ничижи́тъ. ѹ҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Мл҃твами а҆пⷭ҇лѡвъ, / млⷭ҇тиве, ѡ҆чи́сти / мно́жєства согрѣше́нїй на́шихъ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Мл҃твами бцⷣы, / млⷭ҇тиве, ѡ҆чи́сти / мно́жєства согрѣше́нїй на́шихъ.
Та́же, гла́съ ѕ҃: Поми́лꙋй мѧ̀, бж҃е, / по вели́цѣй млⷭ҇ти твое́й, / и҆ по мно́жествꙋ щедро́тъ твои́хъ, / ѡ҆чи́сти беззако́нїе моѐ.
Та́же: Воскр҃съ і҆и҃съ ѿ гро́ба, / ꙗ҆́коже проречѐ, / дадѐ на́мъ живо́тъ вѣ́чный, / и҆ ве́лїю млⷭ҇ть.
Гдⷭ҇и поми́лꙋй, в҃i.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
И҆ а҆́бїе начина́емъ канѡ́ны со стїхосло́вїемъ: воскрⷭ҇нъ, крⷭ҇товоскрⷭ҇нъ и҆ прест҃ѣ́й бцⷣѣ.
Пёснь а҃.
Їрмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, / по бе́зднѣ стопа́ми, / гони́телѧ фараѡ́на ви́дѧ потоплѧ́ема, / бг҃ꙋ побѣ́днꙋю пѣ́снь / пои́мъ, вопїѧ́ше.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Распросте́ртыма дла́ньма на крⷭ҇тѣ̀, / ѻ҆те́ческагѡ и҆спо́лнилъ є҆сѝ бл҃говоле́нїѧ, бл҃гі́й і҆и҃се, всѧ́чєскаѧ. / тѣ́мже побѣ́днꙋю пѣ́снь тебѣ̀ всѝ пои́мъ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Стра́хомъ къ тебѣ̀ ꙗ҆́кѡ рабы́нѧ, сме́рть / повелѣ́на пристꙋпѝ влⷣцѣ живота̀, / то́ю подаю́щемꙋ на́мъ безконе́чный живо́тъ и҆ воскрⷭ҇нїе.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Своего̀ прїе́мши содѣ́телѧ, ꙗ҆́кѡ са́мъ восхотѣ̀, / ѿ безсѣ́меннагѡ твоегѡ̀ чре́ва, па́че ѹ҆ма̀ воплоща́ема, чⷭ҇таѧ, / тва́рей вои́стиннꙋ ꙗ҆ви́ласѧ є҆сѝ влⷣчца.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Сꙋди́лищꙋ пїла́товꙋ предстои́тъ хотѧ̀ / беззако́нномꙋ сꙋдꙋ̀, ꙗ҆́кѡ сꙋди́мь сꙋдїѧ̀, / и҆ ѿ рꙋкѝ непра́вды по лицꙋ̀ заꙋша́етсѧ бг҃ъ, / є҆го́же трепе́щꙋтъ землѧ̀, и҆ нбⷭ҇наѧ.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Просте́рлъ є҆сѝ бж҃е́ственнѣи дла̑ни твоѝ сп҃се, / на пречⷭ҇тѣмъ твое́мъ и҆ живоно́снѣмъ крⷭ҇тѣ̀: / и҆ собра́лъ є҆сѝ ꙗ҆зы́ки въ позна́нїе твоѐ влⷣко, / покланѧ́ющыѧсѧ гдⷭ҇и, сла́вномꙋ твоемꙋ̀ распѧ́тїю.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Стоѧ́ше сле́зъ и҆сто́чники и҆спꙋща́ющи, пренепоро́чнаѧ / при крⷭ҇тѣ̀ твое́мъ сп҃се, / ꙗ҆̀же ѿ ребра̀ твоегѡ̀ ка̑пли крове́й зрѧ́щи хрⷭ҇тѐ, / и҆ твою̀ безприкла́днꙋю млⷭ҇ть сла́вѧщи.
Припѣ́въ: Прест҃а́ѧ бцⷣе, сп҃сѝ на́съ.
Прича́щшисѧ є҆́ѵа садꙋ̀, преслꙋша́ннагѡ бра́шна, клѧ́твꙋ введѐ: / но сїю̀ разрѣ́шила є҆сѝ чⷭ҇таѧ, / бл҃гослове́нїѧ нача́токъ хрⷭ҇та̀ ро́ждши.
Припѣ́въ: Прест҃а́ѧ бцⷣе, сп҃сѝ на́съ.
Ꙗ҆́же би́сера ѿ бж҃е́ственныѧ мо́лнїи хрⷭ҇та̀ ро́ждши, / страсте́й мои́хъ мглꙋ̀, и҆ прегрѣше́нїй смꙋще́нїе чⷭ҇таѧ, / разженѝ свѣ́томъ твоеѧ̀ свѣ́тлости.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Ꙗ҆зы́кѡвъ ча́ѧнїе, і҆а́кѡвъ и҆з̾ тебѐ воплоща́емаго / предзрѧ́ше та́йнѡ ѹ҆́мныма ѻ҆чи́ма бг҃а, / и҆зба́вльшаго на́съ хода́тайствомъ твои́мъ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѡ҆скꙋдѣ́вшымъ кнѧзє́мъ ѿ колѣ́на і҆ꙋ́дова пречⷭ҇таѧ, / сн҃ъ тво́й и҆ бг҃ъ, / проше́дъ во́ждь, над̾ концы̀ земны́ми / ны́нѣ вои́стиннꙋ воцр҃и́сѧ.
Катава́сїа: Ѿве́рзꙋ ѹ҆ста̀ моѧ̑, / и҆ напо́лнѧтсѧ д¦а, / и҆ сло́во ѿры́гнꙋ цр҃и́цѣ мт҃ри, / и҆ ꙗ҆влю́сѧ свѣ́тлѡ торжествꙋ́ѧ, / и҆ воспою̀ ра́дꙋѧсѧ тоѧ̀ чꙋдеса̀.
Їрмо́съ: Нѣ́сть ст҃ъ, / ꙗ҆́коже ты̀ гдⷭ҇и бж҃е мо́й, / вознесы́й ро́гъ вѣ́рныхъ твои́хъ бл҃же, / и҆ ѹ҆тверди́вый на́съ на ка́мени / и҆сповѣ́данїѧ твоегѡ̀.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Бг҃а распина́ема пло́тїю зрѧ́щи тва́рь растаѧва́шесѧ стра́хомъ: / но содержи́тельною дла́нїю на́съ ра́ди распѧ́тагѡ, крѣ́пкѡ держи́ма бѣ̀.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Сме́ртїю сме́рть разоре́на лежи́тъ ѻ҆каѧ́ннаѧ без̾ дыха́нїѧ: / живота́ бо не терпѧ́щи бж҃е́ственнагѡ прираже́нїѧ, / ѹ҆мерщвлѧ́етсѧ крѣ́пкїй, и҆ да́рꙋетсѧ всѣ̑мъ воскрⷭ҇нїе.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Бж҃е́ственнагѡ ржⷭ҇тва̀ твоегѡ̀ чⷭ҇таѧ, / всѧ́кїй є҆стества̀ чи́нъ превосхо́дитъ чꙋ́до: / бг҃а бо преесте́ственнѣ зачала̀ є҆сѝ во чре́вѣ, / и҆ ро́ждши пребыва́еши при́снѡ дв҃а.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Во гро́бѣ тридне́вствовавый / воскр҃си́лъ є҆сѝ животворѧ́щимъ воста́нїемъ твои́мъ пре́жде ѹ҆мерщвлє́нныѧ, / и҆ ѡ҆сꙋжде́нїѧ разрѣши́вшесѧ ра́достнѡ веселѧ́хꙋсѧ, / сѐ и҆збавле́нїе прише́лъ є҆сѝ гдⷭ҇и, взыва́юще.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Сла́ва твоемꙋ̀ воста́нїю сп҃се на́шъ, / ꙗ҆́кѡ на́съ ѿ а҆́да тлѣ́нїѧ, и҆ сме́рти и҆зба́вилъ є҆сѝ ꙗ҆́кѡ всеси́ленъ, / и҆ пою́ще глаго́лемъ: / нѣ́сть ст҃ъ ра́звѣ тебѐ гдⷭ҇и чл҃вѣколю́бче.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Ты̀ ѿ тебѐ ро́ждшагосѧ ꙗ҆́кѡ ви́дѣла є҆сѝ ѹ҆ѧ́звлена копїе́мъ, / ѹ҆ѧзви́ласѧ є҆сѝ се́рдцемъ прест҃а́ѧ всенепоро́чнаѧ, / и҆ ѹ҆жаса́ющисѧ глаго́лала є҆сѝ: / что̀ тебѣ̀ воздадѐ, ча́до, наро́дъ пребеззако́нный;
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Тлѣ́ннꙋю мою̀ пло́ть и҆ сме́ртнꙋю, всечⷭ҇таѧ бг҃ома́ти, / и҆з̾ чре́ва твоегѡ̀ несказа́ннѡ прїе́мъ бл҃гі́й, / и҆ ѡ҆безтлѣ́нивъ сїю̀, вѣ́чнѣ себѣ̀ свѧза́лъ є҆́сть.
Припѣ́въ: Прест҃а́ѧ бцⷣе, сп҃сѝ на́съ.
Бг҃а воплоща́ема и҆з̾ тебѐ зрѧ́ще дв҃о, / ѹ҆жаса́хꙋсѧ стра́хомъ ли́цы а҆́гг҃льстїи, / и҆ ꙗ҆́кѡ мт҃рь бж҃їю немо́лчными пѣ́сньми тѧ̀ почита́ютъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Ѹ҆жасе́сѧ, го́рꙋ ѹ҆́мнꙋю ви́дѣвъ тѧ̀ прⷪ҇ро́къ данїи́лъ, / и҆з̾ неѧ́же ка́мень ѿсѣче́сѧ кромѣ̀ рꙋ́къ: / и҆ де́мѡнскаѧ ка̑пища, бг҃омт҃и, крѣ́пкѡ сокрꙋшѝ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Не мо́жетъ сло́во тѧ̀ чл҃вѣ́ческое, / нижѐ ѧ҆зы́къ дв҃о похвали́ти досто́йнѡ: / и҆з̾ тебе́ бо без̾ сѣ́мене / жизнода́вецъ хрⷭ҇то́съ воплоти́тисѧ, пречⷭ҇таѧ, бл҃говолѝ.
Катава́сїа: Твоѧ̑ пѣсносло́вцы бцⷣе, / живы́й и҆ незави́стный и҆сто́чниче, / ли́къ себѣ̀ совокꙋ́пльшыѧ д¦о́внѡ ѹ҆твердѝ, / въ бж҃е́ственнѣй твое́й сла́вѣ, / вѣнцє́въ сла́вы сподо́би.
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
҆҆ Сѣда́ленъ, гла́съ д҃. Подо́бенъ: Вознесы́йсѧ на крⷭ҇тъ:
Мо́лимъ тѧ̀, влⷣко млⷭ҇тиве сп҃се, / и҆зба́ви на́съ ѿ всѣ́хъ ви́димыхъ и҆ неви́димыхъ вра̑гъ, / и҆ и҆ноплеме́нныхъ нахожде́нїй, / и҆ всѧ́кихъ бѣ́дъ и҆ смꙋще́нїѧ, / пра́зднꙋющихъ вѣ́рою и҆ любо́вїю бж҃е́ственное воскресе́нїе твоѐ, / є҆гѡ́же ра́ди сподо́би на́съ полꙋчи́ти / вѣ́чныхъ бл҃ги́хъ наслажде́нїе.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Ѹ҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю / и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, / кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, / и҆ свидѣ́тельствꙋѧ ѡ҆брꙋ́чникъ тво́й и҆ храни́тель свѧще́нникѡмъ взыва́ше: / дв҃а ражда́етъ, и҆ по ржⷭ҇твѣ̀ па́ки дв҃ою пребыва́етъ.
Їрмо́съ: Хрⷭ҇то́съ моѧ̀ си́ла, / бг҃ъ и҆ гдⷭ҇ь, чⷭ҇тна́ѧ цр҃ковь / бг҃олѣ́пнѡ пое́тъ взыва́ющи, / ѿ смы́сла чи́ста ѡ҆ гдⷭ҇ѣ пра́зднꙋющи.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Дре́во процвѣло̀ є҆́сть хрⷭ҇тѐ, и҆́стинныѧ жи́зни: / крⷭ҇тъ бо водрꙋзи́сѧ, / и҆ напое́нъ бы́въ кро́вїю и҆ водо́ю ѿ нетлѣ́ннагѡ твоегѡ̀ ребра̀, / живо́тъ на́мъ прозѧбѐ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Не ктомꙋ̀ ѕмі́й мнѣ̀ ло́жнѣ ѡ҆боже́нїе подлага́етъ: / хрⷭ҇то́съ бо бг҃одѣ́латель чл҃вѣ́ческагѡ є҆стества̀, / ны́нѣ невозбра́ннѡ стезю̀ живота̀ мнѣ̀ ѿве́рзе.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Ꙗ҆́кѡ вои́стиннꙋ неизвѣща̑нна и҆ непостижи̑ма, / ꙗ҆̀же твоегѡ̀ бг҃олѣ́пнагѡ бцⷣе сꙋ́ть ржⷭ҇тва̀, / сꙋ́щымъ на землѝ и҆ на нб҃сѝ, приснодв҃о, та̑инства.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Чⷭ҇тны́й крⷭ҇тъ тво́й почита́емъ, и҆ гво́зди хрⷭ҇тѐ, / и҆ ст҃о́е копїѐ съ тро́стїю, вѣне́цъ и҆́же ѿ те́рнїй, / и҆́миже ѿ а҆́дова и҆стлѣ́нїѧ и҆зба́вихомсѧ.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Гро́бъ сп҃се тѧ̀ под̾ѧ́тъ во́лею ме́ртва ѡ҆ на́съ ꙗ҆́вльшагосѧ, / но ника́коже возмо́же сло́ве, ѹ҆держа́ти: / ꙗ҆́кѡ бг҃ъ бо воскрⷭ҇лъ є҆сѝ, сп҃са́ѧ ро́дъ на́шъ.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Бг҃ороди́тельнице приснодв҃о, / сп҃са хрⷭ҇та̀ человѣ́кѡмъ ро́ждшаѧ, / ѿ бѣ́дъ и҆ мꙋ́къ и҆зба́ви на́съ, / прибѣга́ющихъ вѣ́рою къ бж҃е́ственномꙋ покро́вꙋ твоемꙋ̀.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Пое́мъ пречⷭ҇таѧ тебѐ всенепоро́чнꙋю, / и҆̀же тобо́ю сп҃сшїисѧ, / и҆ бл҃гоче́стнѡ пою́ще взыва́емъ: / бл҃гослове́нна, ꙗ҆́же бг҃а приснодв҃о ро́ждшаѧ.
Припѣ́въ: Прест҃а́ѧ бцⷣе, сп҃сѝ на́съ.
Свѣ́тъ незаходи́мый дв҃о родила̀ є҆сѝ, / сꙋ́щымъ во тьмѣ̀ житїѧ̀, / пло́тїю свѣтѧ́щъ всебл҃же́ннаѧ, и҆ пою́щымъ тѧ̀, / ра́дость приснодв҃о и҆сточи́ла є҆сѝ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Бл҃года́ть процвѣтѐ, зако́нъ преста̀, тобо́ю всест҃а́ѧ: / ты́ бо чⷭ҇таѧ, родила̀ є҆сѝ гдⷭ҇а, / подаю́щаго на́мъ приснодв҃о, ѡ҆ставле́нїе.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ме́ртва мѧ̀ показа̀ сада̀ вкꙋше́нїе, / жи́зни же дре́во и҆з̾ тебѐ ꙗ҆́вльшеесѧ пречⷭ҇таѧ, воскр҃сѝ, / и҆ ра́йскїѧ сла́дости наслѣ́дника мѧ̀ ѹ҆стро́и.
Катава́сїа: Сѣдѧ́й въ сла́вѣ, / на прⷭ҇то́лѣ бж҃ества̀, / во ѻ҆́блацѣ ле́гцѣ / прїи́де і҆и҃съ пребж҃е́ственный, / нетлѣ́нною дла́нїю, / и҆ сп҃се зовꙋ́щыѧ: / сла́ва хрⷭ҇тѐ си́лѣ твое́й.
Їрмо́съ: Бж҃їимъ / свѣ́томъ твои́мъ бл҃же, / ѹ҆́тренюющихъ тѝ дꙋ́шы любо́вїю ѡ҆зарѝ, молю́сѧ, / тѧ̀ вѣ́дѣти сло́ве бж҃їй, / и҆́стиннагѡ бг҃а, / ѿ мра́ка грѣхо́внагѡ взыва́юща.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Ѹ҆стꙋпа́ютъ мнѣ̀ херꙋві́ми ны́нѣ, / и҆ пла́менное ѻ҆рꙋ́жїе, влⷣко, плещы̀ мнѣ̀ дае́тъ, / тѧ̀ ви́дѣвше сло́ве бж҃їй и҆́стиннаго бг҃а, / разбо́йникꙋ пꙋ́ть сотво́ршаго въ ра́й.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Не ктомꙋ̀ бою́сѧ, є҆́же въ зе́млю влⷣко хрⷭ҇тѐ возвраще́нїѧ: / ты́ бо ѿ землѝ мѧ̀ возве́лъ є҆сѝ забве́нна, / бл҃гоꙋтро́бїѧ ра́ди мно́гагѡ, / къ высотѣ̀ нетлѣ́нїѧ воскрⷭ҇нїемъ твои́мъ.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: И҆̀же бцⷣꙋ тѧ̀ ѿ дꙋшѝ, влⷣчце мі́ра бл҃га́ѧ, / и҆сповѣ́дающихъ сп҃сѝ: / тебе́ бо предста́тельство непобори́мое и҆́мамы, / и҆́стиннꙋю бг҃ороди́тельницꙋ.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Снѣ́дїю дре́ва во є҆де́мѣ прельсти́выйсѧ въ тлю̀ поползѐ родонача́льникъ, / преслꙋ́шавый гдⷭ҇и за́пѡвѣди твоѧ̑ пребл҃гі́й: / но сего̀ крⷭ҇то́мъ па́ки возве́лъ є҆сѝ въ пе́рвꙋю добро́тꙋ, / послꙋшли́въ ѻ҆ц҃ꙋ̀ сп҃се бы́вый.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Твое́ю сме́ртїю бл҃же, сме́рти потреби́сѧ держа́ва, / и҆сто́чникъ жи́зни на́мъ и҆сточѝ, и҆ безсме́ртїе дарова́сѧ: / сегѡ̀ ра́ди погребе́нїю твоемꙋ̀ и҆ воскрⷭ҇нїю вѣ́рою покланѧ́емсѧ, / и҆́мже ꙗ҆́кѡ бг҃ъ мі́ръ ве́сь просвѣти́лъ є҆сѝ.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Живы́й на нб҃сѣ́хъ и҆ творе́цъ всѣ́хъ гдⷭ҇ь, / во твою̀ всенепоро́чнаѧ, всели́сѧ неизрече́ннѡ ѹ҆тро́бꙋ, / просла́вивый тѧ̀ превы́шшꙋю нб҃съ, / и҆ ст҃ѣ́йшꙋю чинѡ́въ невеще́ственныхъ: / тѣ́мже ны́нѣ и҆̀же на земли́ тѧ ѹ҆бл҃жа́емъ.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Чистото́ю возсїѧ́вши свѣ́тлѡ / бж҃е́ственное пребыва́нїе влⷣки всепѣ́таѧ была̀ є҆сѝ. / ты́ бо є҆ди́на мт҃и бж҃їѧ ꙗ҆ви́ласѧ є҆сѝ, / во ѡ҆б̾ѧ́тїихъ ꙗ҆́кѡ младе́нца сего̀ носи́вши.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Носѧ́щи добро́тꙋ ѹ҆́мнꙋю, краснѣ́йшїѧ твоеѧ̀ дꙋшѝ, / невѣ́ста бж҃їѧ была̀ є҆сѝ, / запеча́тствована дв҃ствомъ чи́стаѧ, / и҆ свѣ́томъ чистоты̀ мі́ръ просвѣща́ющи.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Да рыда́етъ собра́нїе ѕлочести́выхъ, / не проповѣ́дающихъ тѧ̀ ꙗ҆́вѣ чи́стꙋю бг҃ома́терь: / ты́ бо врата̀ бж҃їѧ свѣ́та ꙗ҆ви́ласѧ є҆сѝ на́мъ, / мра́къ прегрѣше́нїй разгонѧ́ющи.
Катава́сїа: Ѹ҆жасо́шасѧ всѧ́чєскаѧ / ѡ҆ бж҃е́ственнѣй сла́вѣ твое́й: / ты́ бо неискꙋсобра́чнаѧ дв҃о, / и҆мѣ́ла є҆сѝ во ѹ҆тро́бѣ над̾ всѣ́ми бг҃а, / и҆ родила̀ є҆сѝ безлѣ́тнаго сн҃а, / всѣ̑мъ воспѣва́ющымъ тѧ̀, / ми́ръ подава́ющаѧ.
Їрмо́съ: Жите́йское мо́ре / воздвиза́емое зрѧ̀ напа́стей бꙋ́рею, / къ ти́хомꙋ приста́нищꙋ твоемꙋ̀ прите́къ вопїю́ ти: / возведѝ ѿ тлѝ живо́тъ мо́й, / многомлⷭ҇тиве.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Распина́емь влⷣко, гвоздьмѝ ѹ҆́бѡ / клѧ́твꙋ ю҆́же на на́съ потреби́лъ є҆сѝ: / копїе́мъ же пробода́емь въ ребро̀, / а҆да́мово рꙋкописа́нїе растерза́въ, мі́ръ свободи́лъ є҆сѝ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Ґда́мъ низведе́сѧ, ле́стїю запѧ́тъ бы́въ, ко а҆́довѣ про́пасти: / но и҆́же є҆стество́мъ, бг҃ъ же и҆ млⷭ҇тивъ, / сше́лъ є҆сѝ на взыска́нїе, / и҆ на ра́мꙋ поне́съ, совоскр҃си́лъ є҆сѝ.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Пречⷭ҇таѧ влⷣчце, / ро́ждшаѧ человѣ́кѡмъ ко́рмчїю гдⷭ҇а, / страсте́й мои́хъ непостоѧ́нное и҆ лю́тое ѹ҆толѝ смꙋще́нїе, / и҆ тишинꙋ̀ пода́ждь се́рдцꙋ моемꙋ̀.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Хрⷭ҇тоꙋбі́йца и҆ прⷪ҇рокоꙋбї́йца бы́сть є҆вре́йское мно́жество: / ꙗ҆́кѡ бо прⷪ҇ро́ки дре́вле и҆́стины сꙋ́щыѧ та̑йныѧ лꙋчѝ, ѹ҆би́ти не ѹ҆боѧ́сѧ: / си́це и҆ ны́нѣ гдⷭ҇а, є҆го́же проповѣ́дахꙋ ѻ҆нѝ тогда̀, / за́вистїю влеко́ми ѹ҆би́ша. / но на́мъ бы́сть живо́тъ ѹ҆мерщвле́нїе є҆гѡ̀.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Ꙗ҆́тъ бы́лъ є҆сѝ, но не ѹ҆держа́нъ сп҃се во гро́бѣ, / а҆́ще бо и҆ во́лею вкꙋси́лъ є҆сѝ сме́рти сло́ве, / но воскрⷭ҇лъ є҆сѝ ꙗ҆́кѡ бг҃ъ безсме́ртенъ, / совоздви́гнꙋвый ѹ҆́зники сꙋ́щыѧ во а҆́дѣ, / и҆ ра́дость жена́мъ вмѣ́стѡ печа́ли пре́жнїѧ, па́ки премѣни́вый.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Безче́стенъ тво́й и҆ скꙋ́денъ ꙗ҆ви́сѧ ви́дъ плотскі́й / па́че человѣ́кѡвъ, во вре́мѧ стра́сти: / и҆́бо бж҃ества̀ сꙋщество́мъ, красе́нъ добро́тою дв҃дꙋ показа́сѧ: / но жезло́мъ твоегѡ̀ црⷭ҇твїѧ врагѡ́въ сотры́й крѣ́пость, глаго́лаше чⷭ҇таѧ: / ѽ сн҃е мо́й и҆ бж҃е, ѿ гро́ба воста́ни.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Вели́кїй преднаписа̀ во прⷪ҇ро́цѣхъ мѡѷсе́й тѧ̀, / ковче́гъ, и҆ трапе́зꙋ, и҆ свѣ́щникъ, и҆ рꙋ́чкꙋ, / ѡ҆бра́знѡ назна́менꙋѧ воплоще́нїе, / є҆́же и҆з̾ тебѐ вы́шнѧгѡ, мт҃и дв҃о.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Ѹ҆мерщвлѧ́етсѧ сме́рть, и҆ тлѣ́нїе ѹ҆пражнѧ́етсѧ / а҆да́мова ѡ҆сꙋжде́нїѧ, ѽ влⷣчце! / плодꙋ̀ твоемꙋ̀ прирази́вшеесѧ: / жи́знь бо родила̀ є҆сѝ, / ѿ и҆стлѣ́нїѧ и҆збавлѧ́ющꙋю пою́щихъ тѧ̀.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Зако́нъ и҆знемо́же, и҆ сѣ́нь ми́мѡ и҆́де, / па́че ѹ҆ма̀ и҆ смы́сла ꙗ҆́вльшейсѧ мѝ бл҃года́ти, / є҆́же ѿ тебѐ дв҃о ржⷭ҇тва̀, / бг҃а и҆ сп҃са, многопѣ́таѧ.
Катава́сїа: Бж҃е́ственное сїѐ и҆ всечестно́е, / соверша́юще пра́зднество, / бг҃омꙋ́дрїи бг҃омт҃ре, / прїиди́те рꙋка́ми воспле́щимъ, / ѿ неѧ̀ ро́ждшагосѧ бг҃а сла́вимъ.
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Живонача́льною дла́нїю, / ѹ҆ме́ршыѧ ѿ мра́чныхъ ѹ҆до́лїй, / жизнода́вецъ воскр҃си́въ всѣ́хъ хрⷭ҇то́съ бг҃ъ, / воскрⷭ҇нїе подадѐ человѣ́ческомꙋ ро́дꙋ: / є҆́сть бо всѣ́хъ сп҃си́тель, / воскрⷭ҇нїе и҆ живо́тъ, и҆ бг҃ъ всѣ́хъ.
Јкосъ: Крⷭ҇тъ и҆ погребе́нїе твоѐ жизнода́вче, воспѣва́емъ вѣ́рнїи, и҆ покланѧ́емсѧ, / ꙗ҆́кѡ а҆́дъ свѧза́лъ є҆сѝ безсме́ртне, ꙗ҆́кѡ бг҃ъ всеси́льный: / и҆ мє́ртвыѧ совоскр҃си́лъ є҆сѝ, и҆ врата̀ смє́ртнаѧ сокрꙋши́лъ є҆сѝ, / и҆ держа́вꙋ а҆́довꙋ низложи́лъ є҆сѝ, ꙗ҆́кѡ бг҃ъ. / тѣ́мже земноро́днїи славосло́вимъ тѧ̀ любо́вїю, воскр҃сшаго, / и҆ низложи́вшаго вра́жїю держа́вꙋ всепа́гꙋбнꙋю, / и҆ всѣ́хъ воскр҃си́вшаго въ тѧ̀ вѣ́ровавшихъ, / и҆ мі́ръ и҆зба́вльшаго ѿ стрѣ́лъ ѕмїи́ныхъ, / и҆ ѿ пре́лести вра́жїѧ, ꙗ҆́кѡ бг҃ъ всѣ́хъ.
Їрмо́съ: Росода́тельнꙋ ѹ҆́бѡ пе́щь содѣ́ла а҆́гг҃лъ / прпⷣбнымъ ѻ҆трокѡ́мъ, / халдє́и же ѡ҆палѧ́ющее / велѣ́нїе бж҃їе, / мꙋчи́телѧ ѹ҆вѣща̀ вопи́ти: / бл҃гослове́нъ є҆сѝ бж҃е ѻ҆тє́цъ на́шихъ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Рыда́ющее во стрⷭ҇ти твое́й со́лнце, во мра́къ ѡ҆блече́сѧ, / и҆ во днѝ по все́й влⷣко, землѝ свѣ́тъ поме́рче, вопїѧ̀: / бл҃гослове́нъ є҆сѝ бж҃е ѻ҆тє́цъ на́шихъ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Ѡ҆блеко́шасѧ хрⷭ҇тѐ схожде́нїемъ твои́мъ во свѣ́тъ преиспѡ́днѧѧ, / пра́ѻтецъ же весе́лїѧ и҆спо́лнь ꙗ҆ви́сѧ ликовствꙋ́ѧ, взыгра́сѧ вопїѧ̀: / бл҃гослове́нъ є҆сѝ бж҃е ѻ҆тє́цъ на́шихъ.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Тобо́ю мт҃и дв҃о, / свѣ́тъ возсїѧ̀ все́й вселе́ннѣй свѣ́тлый: / зижди́телѧ бо ты̀ всѣ́хъ родила̀ є҆сѝ бг҃а. / є҆го́же просѝ всечⷭ҇таѧ, / на́мъ низпосла́ти вѣ̑рнымъ ве́лїю млⷭ҇ть.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Ѽ стра́ннагѡ ѡ҆́браза! / і҆и҃лѧ и҆збавле́й ѿ рабо́ты фараѡ́нскїѧ, / распина́етсѧ во́лею ѿ негѡ̀, / и҆ разрѣша́етъ вери̑ги согрѣше́нїй. / є҆мꙋ́же вѣ́рою пое́мъ: / и҆зба́вителю бж҃е, бл҃гослове́нъ є҆сѝ.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Тебѐ сп҃са на ло́бнѣмъ распѧ́ша пребеззако́нныхъ ѻ҆́троцы нечести́вїи, / врата̀ мѣ̑днаѧ и҆ верєѝ сломи́вшаго, / во сп҃се́нїе на́съ пою́щихъ: / и҆зба́вителю бж҃е, бл҃гослове́нъ, є҆сѝ.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Є҆́ѵы дре́внїѧ свобожде́нїе ро́ждшаѧ ѿ клѧ́твы, / разрѣша́еши а҆да́ма дв҃о чⷭ҇таѧ. / тѣ́мже со а҆́гг҃лы тѧ̀, съ сн҃омъ твои́мъ пое́мъ и҆ вопїе́мъ: / и҆зба́вителю бж҃е, бл҃гослове́нъ є҆сѝ.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Ю҆́нѡшъ трїе́хъ пе́щь не ѡ҆палѝ, ржⷭ҇тво̀ проѡбразꙋ́ющихъ твоѐ: / бж҃е́ственный бо ѻ҆́гнь тебѐ не ѡ҆пали́въ, всели́сѧ въ тѧ̀, / и҆ всѧ̑ наꙋчѝ вопи́ти: / бл҃гослове́нъ є҆сѝ бж҃е ѻ҆тє́цъ на́шихъ.
Припѣ́въ: Прест҃а́ѧ бцⷣе, сп҃сѝ на́съ.
Бл҃жа́тъ концы́ тѧ всечⷭ҇таѧ мт҃и, ꙗ҆́коже прорекла̀ є҆сѝ, / просвѣща́еми свѣтолꙋ́чными сїѧ́ньми твои́ми, / и҆ бл҃года́тїю пою́ще, вопїю́тъ: / бл҃гослове́нъ є҆сѝ бж҃е ѻ҆тє́цъ на́шихъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Па̑гꙋбныѧ ѹ҆́бѡ зꙋ́бы въ мѧ̀ вонзѐ ѕмі́й лꙋка́внѣйшїй: / но са́мъ тво́й бг҃ома́ти, сокрꙋшѝ сн҃ъ, / крѣ́пость же мнѣ̀ дадѐ вопи́ти: / бл҃гослове́нъ є҆сѝ бж҃е ѻ҆тє́цъ на́шихъ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѡ҆чисти́лище є҆стества̀ ты̀ є҆сѝ є҆ди́на бг҃обл҃же́ннаѧ, / на ра̑мꙋ бо херꙋв‡мскꙋ сѣдѧ́щаго бг҃а / бо ѡ҆б̾ѧ́тїихъ носѧ́щи вопїе́ши: / бл҃гослове́нъ є҆сѝ бж҃е ѻ҆тє́цъ на́шихъ.
Катава́сїа: Не послꙋжи́ша тва́ри бг҃омꙋ́дрїи / па́че созда́вшагѡ, / но ѻ҆́гненное преще́нїе мꙋ́жески попра́вше, / ра́довахꙋсѧ пою́ще: / препѣ́тый ѻ҆тцє́въ гдⷭ҇ь и҆ бг҃ъ бл҃гослове́нъ є҆сѝ.
Їрмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, / и҆ пра́веднагѡ же́ртвꙋ водо́ю попали́лъ є҆сѝ: / всѧ̑ бо твори́ши хрⷭ҇тѐ, то́кмѡ є҆́же хотѣ́ти, / тѧ̀ превозно́симъ во всѧ̑ вѣ́ки.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Їꙋдє́йскїѧ дре́вле прⷪ҇рокоꙋбі̑йцы лю́ди, / бг҃оꙋб‡йцы за́висть ны́нѣ содѣ́ла, / тебѐ на крⷭ҇тъ возне́сшыѧ, сло́ве бж҃їй: / є҆го́же превозно́симъ во всѧ̑ вѣ́ки.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Нбⷭ҇нагѡ крꙋ́га не ѡ҆ста́вилъ є҆сѝ, / и҆ во а҆́дъ соше́дъ, всего̀ совоздви́глъ є҆сѝ / лежа́щаго во гно́ищи хрⷭ҇тѐ человѣ́ка, / тѧ̀ превозносѧ́ща во всѧ̑ вѣ́ки.
Припѣ́въ: Прест҃а́ѧ бцⷣе, сп҃сѝ на́съ.
Бг҃оро́диченъ: Ѿ свѣ́та свѣтода́вца сло́ва зачала̀ є҆сѝ, / и҆ ро́ждши неизрече́ннѡ сего̀, просла́виласѧ є҆сѝ: / д¦ъ бо въ тѧ̀ ѻ҆трокови́це бж҃їй всели́сѧ. / тѣ́мже тѧ̀ пое́мъ во всѧ̑ вѣ́ки.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Ѹ҆жасе́сѧ всѧ́къ слꙋ́хъ, / ка́кѡ вы́шнїй во́лею прїи́де на зе́млю, / а҆́довꙋ крѣ́пость разрꙋши́ти крⷭ҇то́мъ и҆ погребе́нїемъ, / и҆ всѧ̑ воздви́гнꙋти зва́ти: / ѻ҆́троцы бл҃гослови́те, сщ҃е́нницы воспо́йте, / лю́дїе превозноси́те во всѧ̑ вѣ́ки.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Преста̀ а҆́дово мꙋчи́тельство, / и҆ ца́рство ѹ҆ничижи́сѧ про́чее, / на крⷭ҇тѣ́ бо на землѝ водрꙋ́зивсѧ, и҆́же над̾ всѣ́ми бг҃ъ, / сегѡ̀ могꙋ́тство низложѝ. / є҆го́же ѻ҆́троцы бл҃гослови́те, сщ҃е́нницы воспо́йте, / лю́дїе превозноси́те во всѧ̑ вѣ́ки.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Ѽ неизрече́ннагѡ твоегѡ̀ хрⷭ҇тѐ чл҃вѣколю́бїѧ, и҆ неизглаго́ланныхъ бла̑гъ! / мене́ бо ви́дѧ погиба́юща во а҆́довѣ темни́цѣ, / стра̑сти претерпѣ́вый и҆зба́вилъ є҆сѝ. / тѣ́мже тѧ̀ бл҃гослови́мъ всѣ́хъ влⷣкꙋ, / и҆ превозно́симъ во всѧ̑ вѣ́ки.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Позлаще́ною ри́зою ꙗ҆́коже цр҃и́цꙋ сн҃ъ тво́й просвѣти́въ заре́ю д¦а, / тебѐ ѡ҆деснꙋ́ю себѐ поста́ви пречⷭ҇таѧ: / є҆го́же превозно́симъ во всѧ̑ вѣ́ки.
Припѣ́въ: Прест҃а́ѧ бцⷣе, сп҃сѝ на́съ.
И҆́же хотѣ́нїемъ є҆ди́нымъ мі́ръ водрꙋзи́вый, / ѿ пречⷭ҇тыѧ твоеѧ̀ ѹ҆тро́бы пло́ть взе́млетъ, / свы́ше сїю̀ назда́ти хотѧ̀: / є҆го́же превозно́симъ во всѧ̑ вѣ́ки.
Благослови́мъ ѻ҆ц҃а̀ и҆ сн҃а и҆ ст҃а́гѡ д¦а, гдⷭ҇а.
Счета́нїемъ сло́ва ко мнѣ̀ человѣ́кꙋ, / бж҃е́ственное жили́ще была̀ є҆сѝ пречⷭ҇таѧ, / просїѧ́вши ꙗ҆́вѣ дв҃ства свѣ́тлостїю: / тѣ́мже тѧ̀ пое́мъ во всѧ̑ вѣ́ки.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Златоза́рный тѧ̀ свѣ́щникъ предвоѡбразѝ, / прїе́мшꙋю несказа́ннѡ свѣ́тъ непристꙋ́пный, / ра́зꙋмомъ свои́мъ ѡ҆зарѧ́ющъ всѧ́чєскаѧ. / тѣ́мже тѧ̀ пое́мъ чⷭ҇таѧ, во вѣ́ки.
Та́же: Хва́лимъ, благослови́мъ, покланѧ́емсѧ гдⷭ҇еви, пою́ще и҆ превозносѧ́ще во всѧ̑ вѣ́ки.
Катава́сїа: Ѻ҆́троки бл҃гочєсти́выѧ въ пещѝ / ржⷭ҇тво̀ бг҃оро́дичо сп҃сло̀ є҆́сть, / тогда̀ ѹ҆́бѡ ѡ҆бразꙋ́емое: / ны́нѣ же дѣ́йствꙋемое, / вселе́ннꙋю всю̀ воздвиза́етъ пѣ́ти тебѣ̀: / гдⷭ҇а по́йте дѣла̀, / и҆ превозноси́те є҆го̀ во всѧ̑ вѣ́ки.
Та́же, пое́мъ пѣ́снь бцⷣы: Вели́читъ дꙋша̀ моѧ̀ гдⷭ҇а: съ припѣ́вомъ: Чⷭ҇тнѣ́йшꙋю херꙋв‡мъ:
Вели́читъ дꙋша̀ моѧ̀ гдⷭ҇а, / и҆ возра́довасѧ дꙋ́хъ мо́й ѡ҆ бз҃ѣ сп҃сѣ мое́мъ.
Припѣ́въ: Чⷭ҇тнѣ́йшꙋю херꙋв‡мъ, / и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Ꙗ҆́кѡ призрѣ̀ на смире́нїе рабы̀ своеѧ̀, / се́ бо ѿ ны́нѣ ѹ҆бл҃жа́тъ мѧ̀ всѝ ро́ди.
Припѣ́въ: Чⷭ҇тнѣ́йшꙋю херꙋв‡мъ, / и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Ꙗ҆́кѡ сотворѝ мнѣ̀ вели́чїе си́льный, / и҆ ст҃о и҆́мѧ є҆гѡ̀, / и҆ млⷭ҇ть є҆гѡ̀ въ ро́ды родѡ́въ боѧ́щымсѧ є҆гѡ̀.
Припѣ́въ: Чⷭ҇тнѣ́йшꙋю херꙋв‡мъ, / и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Сотворѝ держа́вꙋ мы́шцею свое́ю, / расточѝ гѡ́рдыѧ мы́слїю се́рдца и҆́хъ.
Припѣ́въ: Чⷭ҇тнѣ́йшꙋю херꙋв‡мъ, / и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Низложѝ си̑льныѧ со престѡ́лъ, / и҆ вознесѐ смирє́нныѧ: а҆́лчꙋщыѧ и҆спо́лни бла̑гъ, / и҆ богатѧ́щыѧсѧ ѿпꙋстѝ тщы̀.
Припѣ́въ: Чⷭ҇тнѣ́йшꙋю херꙋв‡мъ, / и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Воспрїѧ́тъ і҆и҃лѧ ѻ҆́трока своего̀, / помѧнꙋ́ти млⷭ҇ти, / ꙗ҆́коже глаго́ла ко ѻ҆тцє́мъ на́шымъ, / а҆враа́мꙋ и҆ сѣ́мени є҆гѡ̀ да́же до вѣ́ка.
Припѣ́въ: Чⷭ҇тнѣ́йшꙋю херꙋв‡мъ, / и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Їрмо́съ: Бг҃а / человѣ́кѡмъ не возмо́жно ви́дѣти, / на него́же не смѣ́ютъ чи́ни а҆́гг҃льстїи взира́ти: / тобо́ю же всечⷭ҇таѧ, ꙗ҆ви́сѧ человѣ́кѡмъ / сло́во воплоще́нно, / є҆го́же велича́юще, / съ нбⷭ҇ными вѡ́и / тѧ̀ ѹ҆бл҃жа́емъ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Страсте́й неприча́стенъ ты̀ пребы́лъ є҆сѝ сло́ве бж҃їй, / пло́тїю прїѡбщи́всѧ стрⷭ҇тє́мъ: / но рѣши́ши ѿ страсте́й человѣ́ка, / стрⷭ҇тє́мъ бы́въ стра́сть сп҃се на́шъ: / є҆ди́нъ бо є҆сѝ безстрⷭ҇тенъ, и҆ всеси́ленъ.
Припѣ́въ: Сла́ва гдⷭ҇и, ст҃о́мꙋ воскрⷭ҇нїю твоемꙋ̀.
Тлю̀ сме́ртнꙋю прїе́мъ, тлѣ́нїѧ соблю́лъ є҆сѝ тѣ́ло твоѐ невкꙋ́сно, / твоѧ́ же животворѧ́щаѧ и҆ бж҃е́ственнаѧ влⷣко дꙋша̀, во а҆́дѣ не ѡ҆ста́влена бы́сть: / но ꙗ҆́коже ѿ сна̀ воскр҃съ, на́съ совоздви́глъ є҆сѝ.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Трⷪ҇ченъ: Бг҃а ѻ҆ц҃а̀, сн҃а собезнача́льна, / всѝ человѣ́цы ѹ҆стна́ми ѹ҆́бѡ чи́стыми сла́вимъ, / неизрече́ннꙋю же и҆ пресла́внꙋю д¦а всест҃а́гѡ си́лꙋ чти́мъ: / є҆ди́на бо є҆сѝ всеси́льнаѧ трⷪ҇ца неразлꙋ́чнаѧ.
И҆́нъ. Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
А҆́ще и҆ во гро́бъ соше́лъ є҆сѝ ꙗ҆́кѡ ме́ртвъ жизнода́вче, / но а҆́довꙋ крѣ́пость разрꙋши́лъ є҆сѝ хрⷭ҇тѐ, / совоздви́гнꙋвъ мє́ртвыѧ, ꙗ҆̀же и҆ поглотѝ, / и҆ воскрⷭ҇нїе всѣ̑мъ по́далъ є҆сѝ, ꙗ҆́кѡ бг҃ъ, / вѣ́рою и҆ любо́вїю тѧ̀ велича́ющымъ.
Припѣ́въ: Сла́ва гдⷭ҇и, крⷭ҇тꙋ̀ твоемꙋ̀ чⷭ҇тно́мꙋ и҆ воскрⷭ҇нїю.
Да ра́дꙋетсѧ тва́рь, и҆ да процвѣте́тъ ꙗ҆́кѡ крі́нъ: / хрⷭ҇то́съ бо ѿ ме́ртвыхъ воста̀ ꙗ҆́кѡ бг҃ъ. / гдѣ̀ твоѐ, сме́рте, ны́нѣ жа́ло; воззове́мъ. / гдѣ̀ твоѧ̀ а҆́де, побѣ́да; / низложи́ тѧ въ зе́млю, / возвы́сивый ро́гъ на́шъ, ꙗ҆́кѡ бл҃гоꙋтро́бенъ.
Припѣ́въ: Прест҃а́ѧ бцⷣе, сп҃сѝ на́съ.
Крⷭ҇тобг҃оро́диченъ: Но́сиши носѧ́щаго всѧ̑, / и҆ держи́ши ꙗ҆́кѡ младе́нца въ рꙋка́хъ, / и҆з̾ рꙋкѝ и҆збавлѧ́ющаго на́съ бори́телѧ врага̀, пречⷭ҇таѧ влⷣчце, / и҆ ви́диши на крⷭ҇тъ дре́ва возвыша́ема, / ѿ ро́ва ѕло́бы на́съ возвы́сивша.
И҆́нъ. Припѣ́въ: Прест҃а́ѧ бцⷣе, сп҃сѝ на́съ.
Ѕвѣзда̀ сїѧ́ющи зарѧ́ми бж҃ества̀ ѿ і҆а́кѡва, / ѿ мра́ка содержи̑мымъ возсїѧ̀: / тобо́ю бо всечⷭ҇таѧ, хрⷭ҇то́съ бг҃ъ сло́во воплоще́нно: / и҆́мже просвѣща́еми, съ нбⷭ҇ными вѡ́и тѧ̀ ѹ҆бл҃жа́емъ.
Припѣ́въ: Прест҃а́ѧ бцⷣе, сп҃сѝ на́съ.
Ѹ҆крѣ́пльсѧ си́лою твое́ю и҆ бл҃года́тїю, / тебѣ̀ пѣ́снь ѹ҆се́рднѡ ѿ се́рдца возложи́хъ: / но сїю̀ прїимѝ дв҃о чⷭ҇таѧ, / бл҃года́ть воздаю́щи твою̀ многосвѣ́тлꙋю, / ѿ нетлѣ́нныхъ сокро́вищъ, бг҃обл҃же́ннаѧ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Поста́въ показа́ласѧ є҆сѝ ꙗ҆́вѣ бж҃ества̀, / въ не́мже ри́зꙋ тѣлесѐ сло́во и҆стка̀, / бг҃осодѣ́лавъ мо́й дв҃о зра́къ: / въ него́же ѡ҆бле́ксѧ всѣ́хъ сп҃сѐ, / ѿ смы́сла чи́ста тебѐ велича́ющихъ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Мє́ртвымъ воскрⷭ҇нїе ны́нѣ дарова́сѧ, / твои́мъ несказа́ннымъ и҆ неизрече́ннымъ ржⷭ҇тво́мъ, бцⷣе всечⷭ҇таѧ: / жи́знь бо и҆з̾ тебѐ пло́тїю ѡ҆бле́кшисѧ, всѣ̑мъ возсїѧ̀, / и҆ сме́ртнꙋю дрѧ́хлость ꙗ҆́вѣ разрꙋшѝ.
Катава́сїа: Всѧ́къ земноро́дный / да взыгра́етсѧ д¦омъ просвѣща́емь, / да торжествꙋ́етъ же безпло́тныхъ ѹ҆мѡ́въ є҆стество̀, / почита́ющее сщ҃е́нное торжество̀ бг҃омт҃ре, / и҆ да вопїе́тъ: / ра́дꙋйсѧ всебл҃же́ннаѧ / бцⷣе, чⷭ҇таѧ приснодв҃о.
Гдⷭ҇и поми́лꙋй. [Три́жды.]
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Свѧ́тъ гдⷭ҇ь бг҃ъ на́шъ.
Свѧ́тъ гдⷭ҇ь бг҃ъ на́шъ.
Сті́хъ: Ꙗ҆́кѡ свѧ́тъ гдⷭ҇ь бг҃ъ на́шъ.
Свѧ́тъ гдⷭ҇ь бг҃ъ на́шъ.
Сті́хъ: Над̾ всѣ́ми людьмѝ бг҃ъ на́шъ.
Свѧ́тъ гдⷭ҇ь бг҃ъ на́шъ.
И҆ ќтренній воскре́сенъ є҆ѯапостїла́рїй.
Показꙋ́ѧ, ꙗ҆́кѡ человѣ́къ є҆сѝ сп҃се, по сꙋществꙋ̀, / посредѣ̀ ста́въ воскр҃съ ѿ гро́ба, / и҆ бра́шна сопричасти́лсѧ є҆сѝ, / ѹ҆чи́лъ є҆сѝ кр҃ще́нїю покаѧ́нїѧ. / а҆́бїе же къ нбⷭ҇номꙋ возне́слсѧ є҆сѝ ѻ҆ц҃ꙋ̀, / и҆ ѹ҆ч҃нкѡ́мъ ѹ҆тѣ́шителѧ посла́ти ѡ҆бѣща́лъ є҆сѝ пребж҃е́ственный бг҃очеловѣ́че: / сла́ва твоемꙋ̀ воста́нїю.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Творе́цъ созда́нїѧ и҆ бг҃ъ всѣ́хъ, / пло́ть чл҃вѣ́ческꙋю прїѧ́тъ ѿ пречⷭ҇тыхъ крове́й твои́хъ, всест҃а́ѧ дв҃о, / и҆ и҆стлѣ́вшее моѐ всѐ є҆стество̀ новосодѣ́ла, / па́ки ꙗ҆́коже пре́жде ржⷭ҇тва̀ ѡ҆ста́вль по ржⷭ҇твѣ̀. / тѣ́мже тѧ̀ вѣ́рнѡ всѝ восхвалѧ́емъ, зовꙋ́ще: / ра́дꙋйсѧ, влⷣчце мі́ра.
҆҆ И҆ пое́мъ Всѧ́кое дыха́нїе, ѱалмы̀: рм҃и-р҃н,
въ шесты́й гла́съ.
Всѧ́кое дыха́нїе да хва́литъ гдⷭ҇а. / хвали́те гдⷭ҇а съ нб҃съ, / хвали́те є҆го̀ въ вы́шнихъ. / тебѣ̀ подоба́етъ пѣ́снь бг҃ꙋ. / хвали́те є҆го̀ всѝ а҆́гг҃ли є҆гѡ̀, / хвали́те є҆го̀ всѧ̑ си̑лы є҆гѡ̀. / тебѣ̀ подоба́етъ пѣ́снь бг҃ꙋ.
И҆ по пѣ́нїи чте́мъ: Хвали́те є҆го̀ со́лнце и҆ лꙋна̀, хвали́те є҆го̀ всѧ̑ ѕвѣ́зды и҆ свѣ́тъ. Хвали́те є҆го̀ нб҃са̀ нб҃съ, и҆ вода̀ ꙗ҆́же превы́ше нб҃съ, да восхва́лѧтъ и҆́мѧ гдⷭ҇не. ꙗ҆́кѡ то́й речѐ, и҆ бы́ша: то́й повелѣ̀, и҆ созда́шасѧ. поста́ви ѧ҆̀ въ вѣ́къ, и҆ въ вѣ́къ вѣ́ка: повелѣ́нїе положѝ, и҆ не ми́мѡ и҆́детъ. хвали́те гдⷭ҇а ѿ землѝ ѕмі́евє, и҆ всѧ̑ бє́здны: ѻ҆́гнь, гра́дъ, снѣ́гъ, го́лоть, дꙋ́хъ бꙋ́ренъ, творѧ̑щаѧ сло́во є҆гѡ̀: го́ры и҆ всѝ хо́лми, древа̀ плодонѡ́сна, и҆ всѝ ке́дри: ѕвѣ́рїе и҆ всѝ ско́ти, га́ди и҆ пти̑цы перна̑ты: ца́рїе зе́мстїи, и҆ всѝ лю́дїе, кнѧ́зи, и҆ всѝ сꙋдїи̑ зе́мстїи: ю҆́нѡши и҆ дѣ̑вы, ста́рцы съ ю҆́нотами да восхва́лѧтъ и҆́мѧ гдⷭ҇не: ꙗ҆́кѡ вознесе́сѧ и҆́мѧ тогѡ̀ є҆ди́нагѡ. и҆сповѣ́данїе є҆гѡ̀ на землѝ и҆ на нб҃сѝ, и҆ вознесе́тъ ро́гъ люде́й свои́хъ. пѣ́снь всѣ̑мъ прпⷣбнымъ є҆гѡ̀, сыновѡ́мъ і҆и҃лєвымъ, лю́демъ приближа́ющымсѧ є҆мꙋ̀.
Воспо́йте гдⷭ҇еви пѣ́снь но́вꙋ, хвале́нїе є҆гѡ̀ въ цр҃кви прпⷣбныхъ. да возвесели́тсѧ і҆и҃ль ѡ҆ сотво́ршемъ є҆го̀, и҆ сы́нове сїѡ́ни возра́дꙋютсѧ ѡ҆ цр҃ѣ̀ свое́мъ: да восхва́лѧтъ и҆́мѧ є҆гѡ̀ въ ли́цѣ, въ тѷмпа́нѣ и҆ ѱалти́ри да пою́тъ є҆мꙋ̀. ꙗ҆́кѡ бл҃говоли́тъ гдⷭ҇ь въ лю́дехъ свои́хъ, и҆ вознесе́тъ крѡ́ткїѧ во сп҃се́нїе. восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ. возношє́нїѧ бж҃їѧ въ горта́ни и҆́хъ, и҆ мечѝ ѻ҆бою́дꙋ ѻ҆стры̀ въ рꙋка́хъ и҆́хъ: сотвори́ти ѿмще́нїе во ꙗ҆зы́цѣхъ, ѡ҆бличє́нїѧ въ лю́дехъ: свѧза́ти царѝ и҆́хъ пꙋ́ты, и҆ сла̑вныѧ и҆́хъ рꙋчны́ми ѻ҆кѡ́вы желѣ́зными.
Сті́хъ: Сотвори́ти въ ни́хъ сꙋ́дъ напи́санъ: / сла́ва сїѧ̀ бꙋ́детъ всѣ̑мъ прпⷣбнымъ є҆гѡ̀.
Крⷭ҇тъ тво́й гдⷭ҇и, / жи́знь и҆ воскрⷭ҇нїе лю́демъ твои̑мъ є҆́сть, / и҆ надѣ́ющесѧ на́нь, / тебѐ воскрⷭ҇шаго бг҃а на́шего пое́мъ: поми́лꙋй на́съ.
Сті́хъ: Хвали́те бг҃а во ст҃ы́хъ є҆гѡ̀, / хвали́те є҆го̀ во ѹ҆тверже́нїи си́лы є҆гѡ̀.
Погребе́нїе твоѐ влⷣко, / ра́й ѿве́рзе ро́дꙋ человѣ́ческомꙋ: / и҆ ѿ и҆стлѣ́нїѧ и҆зба́вльшесѧ, / тебѐ воскрⷭ҇шаго бг҃а на́шего пое́мъ: поми́лꙋй на́съ.
Сті́хъ: Хвали́те є҆го̀ на си́лахъ є҆гѡ̀, / хвали́те є҆го̀ по мно́жествꙋ вели́чествїѧ є҆гѡ̀.
Со ѻ҆ц҃е́мъ и҆ д¦омъ хрⷭ҇та̀ воспои́мъ, / воскрⷭ҇шаго и҆з̾ ме́ртвыхъ, / и҆ къ немꙋ̀ вопїи́мъ: / ты̀ живо́тъ є҆сѝ на́шъ, и҆ воскрⷭ҇нїе, поми́лꙋй на́съ.
Сті́хъ: Хвали́те є҆го̀ во гла́сѣ трꙋ́бнѣмъ, / хвали́те є҆го̀ во ѱалти́ри и҆ гꙋ́слехъ.
Тридне́венъ воскрⷭ҇лъ є҆сѝ хрⷭ҇тѐ ѿ гро́ба / ꙗ҆́коже пи́сано є҆́сть, / совоздви́гнꙋвый пра́ѻтца на́шего. / тѣ́мже тѧ̀ и҆ сла́витъ ро́дъ человѣ́ческїй, / и҆ воспѣва́етъ твоѐ воскрⷭ҇нїе.
Сті́хъ: Хвали́те є҆го̀ въ тѷмпа́нѣ и҆ ли́цѣ, / хвали́те є҆го̀ во стрꙋ́нахъ и҆ ѻ҆рга́нѣ.
Гдⷭ҇и, ве́лїе и҆ стра́шно є҆́сть / твоегѡ̀ воскрⷭ҇нїѧ та́инство: / та́кѡ бо произше́лъ є҆сѝ ѿ гро́ба, / ꙗ҆́кѡ жени́хъ ѿ черто́га, / сме́ртїю сме́рть разрꙋши́вый, / да а҆да́ма свободи́ши. / тѣ́мже на нб҃сѣ́хъ а҆́гг҃ли ликовствꙋ́ютъ, / и҆ на землѝ человѣ́цы сла́вѧтъ, / є҆́же на на́съ бы́вшее бл҃гоꙋтро́бїе твоѐ, чл҃вѣколю́бче.
Сті́хъ: Хвали́те є҆го̀ въ кѷмва́лѣхъ доброгла́сныхъ. хвали́те є҆го̀ въ кѷмва́лѣхъ восклица́нїѧ. / всѧ́кое дыха́нїе да хва́литъ гдⷭ҇а.
Ѽ пребеззако́ннїи і҆ꙋде́є, / гдѣ̀ сꙋ́ть печа̑ти и҆ сре́брєницы, ꙗ҆̀же да́сте во́инѡмъ; / не ѹ҆кра́дено бы́сть сокро́вище, / но воскр҃се ꙗ҆́кѡ си́ленъ: / са́ми же посрами́стесѧ ѿве́ргшїисѧ хрⷭ҇та̀ гдⷭ҇а сла́вы, / пострада́вша и҆ погребе́нна, и҆ воскрⷭ҇ша и҆з̾ ме́ртвыхъ: / томꙋ̀ поклони́мсѧ.
Сті́хъ: Воскрⷭ҇нѝ, гдⷭ҇и бж҃е мо́й, да вознесе́тсѧ рꙋка̀ твоѧ̀, / не забꙋ́ди ѹ҆бо́гихъ твои́хъ до конца̀.
Запеча́танꙋ гро́бꙋ, / ка́кѡ ѡ҆кра́дени бы́сте і҆ꙋде́є, / стра́жы поста́вльше, и҆ зна́мєнїѧ поло́жше, / две́ремъ заключє́ннымъ про́йде цр҃ь; / и҆лѝ ꙗ҆́кѡ ме́ртва предста́вите, / и҆лѝ ꙗ҆́кѡ бг҃ꙋ поклони́тесѧ, съ на́ми пою́ще: / сла́ва гдⷭ҇и, крⷭ҇тꙋ̀ твоемꙋ̀, и҆ воскрⷭ҇нїю твоемꙋ̀.
Сті́хъ: И҆сповѣ́мсѧ тебѣ̀, гдⷭ҇и, всѣ́мъ се́рдцемъ мои́мъ, / повѣ́мъ всѧ̑ чꙋдеса̀ твоѧ̑.
Живопрїѧ́тнагѡ твоегѡ̀ гро́ба, / мѷронѡ́сицы жєны̀ рыда́ющѧ, достиго́ша гдⷭ҇и, / и҆ м›ра носѧ́щѧ, / тѣ́ло твоѐ пречⷭ҇тое пома́зати и҆ска́хꙋ: / ѡ҆брѣто́ша же свѣтоно́сна а҆́гг҃ла на ка́мени сѣдѧ́ща, / и҆ къ ни̑мъ вѣща́юща, и҆ глаго́люща: / что̀ слезитѐ, и҆з̾ ре́бръ и҆сточи́вшаго жи́знь мі́рови; / что̀ и҆́щете ꙗ҆́кѡ ме́ртва во гро́бѣ безсме́ртнаго; / те́кшѧ же па́че возвѣсти́те тогѡ̀ ѹ҆ч҃нкѡ́мъ, / сла́внагѡ є҆гѡ̀ воскрⷭ҇нїѧ всемі́рное ра́дованїе, / и҆́мже и҆ на́съ сп҃се просвѣти́вый, / да́рꙋй ѡ҆чище́нїе и҆ ве́лїю млⷭ҇ть.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
҆҆ Ќтреннѧѧ є҆ђльскаѧ стїхи́ра, гла́съ ѕ҃:
И҆́стинный ми́ръ ты̀ хрⷭ҇тѐ, къ человѣ́кѡмъ бж҃їй / ми́ръ тво́й даѧ̀, по воста́нїи ѹ҆ч҃нкѡ́мъ, / пристра́шны показа́лъ є҆сѝ ѧ҆̀, / мнѧ́щыѧ дꙋ́хъ ви́дѣти: / но ѹ҆ти́шилъ є҆сѝ мѧте́жъ дꙋшѝ и҆́хъ, / показа́вый рꙋ́цѣ и҆ но́зѣ твоѝ. / ѻ҆ба́че не вѣ́рꙋющымъ є҆щѐ, / бра́шенъ причаще́нїемъ, и҆ ѹ҆че́нїй воспомина́нїемъ, / ѿве́рзлъ є҆сѝ и҆́хъ ѹ҆́мъ, є҆́же разꙋмѣ́ти писа̑нїѧ: / и҆̀мже и҆ ѻ҆ч҃еское ѡ҆бѣтова́нїе ѡ҆бѣща́въ, и҆ бл҃гослови́въ ѧ҆̀, / ѿстꙋпи́лъ є҆сѝ на нб҃о. / тѣ́мже съ ни́ми покланѧ́емсѧ тебѣ̀, / гдⷭ҇и сла́ва тебѣ̀.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ, гла́съ в҃: Пребл҃гослове́нна є҆сѝ бцⷣе дв҃о, / вопло́щшимъ бо сѧ и҆з̾ тебѐ а҆́дъ плѣни́сѧ, / а҆да́мъ воззва́сѧ, / клѧ́тва потреби́сѧ, / є҆́ѵа свободи́сѧ, / сме́рть ѹ҆мертви́сѧ, и҆ мы̀ ѡ҆жи́хомъ. / тѣ́мъ воспѣва́юще вопїе́мъ: / бл҃гослове́нъ хрⷭ҇то́съ бг҃ъ / бл҃говоли́вый та́кѡ, сла́ва тебѣ̀.
Сла́ва тебЁ показа́вшемꙋ на́мъ свётъ.
Сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе. хва́лимъ тѧ̀, бл҃гослови́мъ тѧ̀, кла́нѧемъ ти сѧ, славосло́вимъ тѧ̀, бл҃годари́мъ тѧ̀ вели́кїѧ ра́ди сла́вы твоеѧ̀. гдⷭ҇и цр҃ю̀ нбⷭ҇ный, бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е. гдⷭ҇и бж҃е, а҆́гнче бж҃їй, сн҃е ѻ҆ч҃ь, взе́млѧй грѣ́хъ мі́ра, поми́лꙋй на́съ: взе́млѧй грѣхѝ мі́ра, прїимѝ мл҃твꙋ на́шꙋ: сѣдѧ́й ѡ҆деснꙋ́ю ѻ҆ц҃а̀, поми́лꙋй на́съ. ꙗ҆́кѡ ты̀ є҆сѝ є҆ди́нъ свѧ́тъ, ты̀ є҆сѝ є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь.
На всѧ́къ де́нь бл҃гословлю́ тѧ, и҆ восхвалю̀ и҆́мѧ твоѐ во вѣ́ки, и҆ въ вѣ́къ вѣ́ка.
Сподо́би гдⷭ҇и въ де́нь се́й без̾ грѣха̀ сохрани́тисѧ на́мъ. бл҃гослове́нъ є҆сѝ гдⷭ҇и, бж҃е ѻ҆тє́цъ на́шихъ, и҆ хва́льно и҆ просла́влено и҆́мѧ твоѐ во вѣ́ки, а҆ми́нь.
Бꙋ́ди гдⷭ҇и, млⷭ҇ть твоѧ̀ на на́съ, ћкоже ᲂу҆пова́хомъ на тѧ̀.
Бл҃гослове́нъ є҆сѝ гдⷭ҇и, наꙋчи́ мѧ ѡ҆правда́нїємъ твои̑мъ. [Три́жды.]
Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ. а҆́зъ рѣ́хъ: гдⷭ҇и, поми́лꙋй мѧ̀, и҆сцѣлѝ дꙋ́шꙋ мою̀, ꙗ҆́кѡ согрѣши́хъ тебѣ̀.
Гдⷭ҇и, къ тебѣ̀ прибѣго́хъ, наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й: ꙗ҆́кѡ ѹ҆ тебѐ и҆сто́чникъ живота̀, во свѣ́тѣ твое́мъ ѹ҆́зримъ свѣ́тъ. проба́ви млⷭ҇ть твою̀ вѣ́дꙋщымъ тѧ̀.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ст҃ы́й безсме́ртный, поми́лꙋй на́съ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ.
Воскре́съ и҆з̾ гро́ба, и҆ ѹ҆́зы растерза́лъ є҆сѝ а҆́да, / разрꙋши́лъ є҆сѝ ѡ҆сꙋжде́нїе сме́рти гдⷭ҇и, / всѧ̑ ѿ сѣте́й врага̀ и҆зба́вивый: / ꙗ҆ви́вый же себѐ а҆пⷭ҇лѡмъ твои̑мъ, / посла́лъ є҆сѝ ѧ҆̀ на про́повѣдь, / и҆ тѣ́ми ми́ръ тво́й по́далъ є҆сѝ вселе́ннѣй, / є҆ди́не многомлⷭ҇тиве.
Гдⷭ҇и поми́лꙋй, м҃.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Та́же, Гдⷭ҇и поми́лꙋй, в҃i.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Ѹ҆твердѝ бж҃е, / ст҃ꙋ́ю правосла́внꙋю вѣ́рꙋ, правосла́вныхъ хрⷭ҇тїа́нъ, / во вѣ́къ вѣ́ка.
Чⷭ҇тнѣ́йшꙋю херꙋв‡мъ, и҆ сла́внѣйшꙋю без̾ сравне́нїѧ сераф‡мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Гдⷭ҇и поми́лꙋй. [Три́жды.]
Гдⷭ҇и бл҃гословѝ.
Гдⷭ҇и і҆и҃се хрⷭ҇тѐ сн҃е бж҃їй, воскресы́й и҆з̾ ме́ртвыхъ, моли́твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, прпⷣбныхъ и҆ бг҃оно́сныхъ ѻ҆ц҃ъ на́шихъ, и҆ всѣ́хъ ст҃ы́хъ, спасѝ на́съ, ꙗ҆́кѡ бла́гъ и҆ чл҃вѣколю́бецъ. а҆ми́нь.
Вели́каго господи́на и҆ ѻ҆тца̀ на́шего и҆́мⷬ҇къ, / ст҃ѣ́йшаго патрїа́рха моско́вскаго и҆ всеѧ̀ рꙋсѝ, / и҆ господи́на на́шего преѡсвѧще́нѣйшего и҆́мⷬ҇къ, / митрополі́та [и҆лѝ а҆рхїепⷭ҇кпа, и҆лѝ є҆пⷭ҇кпа є҆гѡ́же є҆́сть ѡ҆бласть], / бг҃охрани́мꙋю странꙋ̀ на́шꙋ рѡссі́йскꙋю, / настоѧ́телѧ, бра́тїю и҆ прихо́жанъ ст҃а́гѡ храма сегѡ̀, / и҆ всѧ̑ правосла́вныѧ хрⷭ҇тїа́ны, / гдⷭ҇и, сохранѝ и҆̀хъ на мно́гаѧ лѣ̑та.
И҆ глаго́лемъ ча́съ а҃-й.
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
Глаго́лы моѧ̑ внꙋшѝ гдⷭ҇и, разꙋмѣ́й зва́нїе моѐ. вонмѝ гла́сꙋ моле́нїѧ моегѡ̀, цр҃ю̀ мо́й и҆ бж҃е мо́й, ꙗ҆́кѡ къ тебѣ̀ помолю́сѧ гдⷭ҇и. заꙋ́тра ѹ҆слы́ши гла́съ мо́й, заꙋ́тра предста́нꙋ тѝ, и҆ ѹ҆́зриши мѧ̀. ꙗ҆́кѡ бг҃ъ не хотѧ́й беззако́нїѧ, ты̀ є҆сѝ: не присели́тсѧ къ тебѣ̀ лꙋка́внꙋѧй, нижѐ пребꙋ́дꙋтъ беззакѡ́нницы пред̾ ѻ҆чи́ма твои́ма. возненави́дѣлъ є҆сѝ всѧ̑ дѣ́лающыѧ беззако́нїе, погꙋби́ши всѧ̑ глаго́лющыѧ лжꙋ̀: мꙋ́жа крове́й и҆ льсти́ва гнꙋша́етсѧ гдⷭ҇ь. а҆́зъ же мно́жествомъ млⷭ҇ти твоеѧ̀, вни́дꙋ въ до́мъ тво́й, поклоню́сѧ ко хра́мꙋ ст҃о́мꙋ твоемꙋ̀ въ стра́сѣ твое́мъ. гдⷭ҇и, наста́ви мѧ̀ пра́вдою твое́ю, вра̑гъ мои́хъ ра́ди и҆спра́ви пред̾ тобо́ю пꙋ́ть мо́й. ꙗ҆́кѡ нѣ́сть во ѹ҆стѣ́хъ и҆́хъ и҆́стины, се́рдце и҆́хъ сꙋ́етно, гро́бъ ѿве́рстъ горта́нь и҆́хъ, ѧ҆зы́ки свои́ми льща́хꙋ. сꙋдѝ и҆̀мъ бж҃е, да ѿпадꙋ́тъ ѿ мы́слей свои́хъ: по мно́жествꙋ нече́стїѧ и҆́хъ и҆зри́ни ѧ҆̀, ꙗ҆́кѡ преѡгорчи́ша тѧ̀, гдⷭ҇и. и҆ да возвеселѧ́тсѧ всѝ ѹ҆пова́ющїи на тѧ̀, во вѣ́къ возра́дꙋютсѧ, и҆ всели́шисѧ въ ни́хъ: и҆ похва́лѧтсѧ ѡ҆ тебѣ̀ лю́бѧщїи и҆́мѧ твоѐ. ꙗ҆́кѡ ты̀ бл҃гослови́ши пра́ведника гдⷭ҇и, ꙗ҆́кѡ ѻ҆рꙋ́жїемъ бл҃говоле́нїѧ вѣнча́лъ є҆сѝ на́съ.
Гдⷭ҇и, прибѣ́жище бы́лъ є҆сѝ на́мъ въ ро́дъ и҆ ро́дъ. пре́жде да́же гора́мъ не бы́ти, и҆ созда́тисѧ землѝ и҆ вселе́ннѣй, и҆ ѿ вѣ́ка и҆ до вѣ́ка ты̀ є҆сѝ. не ѿвратѝ человѣ́ка во смире́нїе, и҆ ре́клъ є҆сѝ: ѡ҆брати́тесѧ сы́нове человѣ́честїи. ꙗ҆́кѡ ты́сѧща лѣ́тъ пред̾ ѻ҆чи́ма твои́ма гдⷭ҇и, ꙗ҆́кѡ де́нь вчера́шнїй, и҆́же мимои́де, и҆ стра́жа нощна́ѧ. ѹ҆ничиже́нїѧ и҆́хъ лѣ̑та бꙋ́дꙋтъ: ѹ҆́трѡ ꙗ҆́кѡ трава̀ мимои́детъ. Ќтрѡ процвѣте́тъ и҆ пре́йдетъ, на ве́черъ ѿпаде́тъ, ѡ҆жестѣ́етъ и҆ и҆́зсхнетъ. ꙗ҆́кѡ и҆счезо́хомъ гнѣ́вомъ твои́мъ, и҆ ꙗ҆́ростїю твое́ю смꙋти́хомсѧ. положи́лъ є҆сѝ беззакѡ́нїѧ на̑ша пред̾ тобо́ю: вѣ́къ на́шъ въ просвѣще́нїе лица̀ твоегѡ̀. ꙗ҆́кѡ всѝ дні́е на́ши ѡ҆скꙋдѣ́ша, и҆ гнѣ́вомъ твои́мъ и҆счезо́хомъ. лѣ̑та на̑ша ꙗ҆́кѡ паꙋчи́на поꙋча́хꙋсѧ: дні́е лѣ́тъ на́шихъ, въ ни́хже се́дмьдесѧтъ лѣ́тъ, а҆́ще же въ си́лахъ, ѻ҆́смьдесѧтъ лѣ́тъ, и҆ мно́жае и҆́хъ трꙋ́дъ и҆ болѣ́знь: ꙗ҆́кѡ прїи́де кро́тость на ны̀, и҆ нака́жемсѧ. кто̀ вѣ́сть держа́вꙋ гнѣ́ва твоегѡ̀, и҆ ѿ стра́ха твоегѡ̀ ꙗ҆́рость твою̀ и҆счестѝ; десни́цꙋ твою̀ та́кѡ скажи́ ми, и҆ ѡ҆кова̑нныѧ се́рдцемъ въ мꙋ́дрости. ѡ҆брати́сѧ гдⷭ҇и, доко́лѣ; и҆ ѹ҆моле́нъ бꙋ́ди на рабы̑ твоѧ̑. и҆спо́лнихомсѧ заꙋ́тра млⷭ҇ти твоеѧ̀ гдⷭ҇и, и҆ возра́довахомсѧ, и҆ возвесели́хомсѧ. во всѧ̑ дни̑ на́шѧ возвесели́хомсѧ, за дни̑ въ нѧ́же смири́лъ ны̀ є҆сѝ, лѣ̑та въ нѧ́же ви́дѣхомъ ѕла̑ѧ. и҆ при́зри на рабы̑ твоѧ̑, и҆ на дѣла̀ твоѧ̑, и҆ наста́ви сы́ны и҆́хъ. и҆ бꙋ́ди свѣ́тлость гдⷭ҇а бг҃а на́шегѡ на на́съ, и҆ дѣла̀ рꙋ́къ на́шихъ и҆спра́ви на на́съ, и҆ дѣ́ло рꙋ́къ на́шихъ и҆спра́ви.
Млⷭ҇ть и҆ сꙋ́дъ воспою̀ тебѣ̀, гдⷭ҇и: пою̀ и҆ разꙋмѣ́ю въ пꙋтѝ непоро́чнѣ, когда̀ прїи́деши ко мнѣ̀; прехожда́хъ въ неѕло́бїи се́рдца моегѡ̀, посредѣ̀ до́мꙋ моегѡ̀. не предлага́хъ пред̾ ѻ҆чи́ма мои́ма ве́щь законопрестꙋ́пнꙋю, творѧ́щыѧ престꙋпле́нїе возненави́дѣхъ. не прильпѐ мнѣ̀ се́рдце стропти́во, ѹ҆клонѧ́ющагѡсѧ ѿ менѐ лꙋка́вагѡ не позна́хъ: ѡ҆клевета́ющагѡ та́й и҆́скреннѧго своего̀, сего̀ и҆згонѧ́хъ: го́рдымъ ѻ҆́комъ и҆ несы́тымъ се́рдцемъ, съ си́мъ не ꙗ҆дѧ́хъ. ѻ҆́чи моѝ на вѣ̑рныѧ землѝ, посажда́ти ѧ҆̀ со мно́ю: ходѧ́й по пꙋтѝ непоро́чнꙋ, се́й мѝ слꙋжа́ше. не живѧ́ше посредѣ̀ до́мꙋ моегѡ̀ творѧ́й горды́ню: глаго́лѧй непра́вєднаѧ, не и҆справлѧ́ше пред̾ ѻ҆чи́ма мои́ма. во ѹ҆́трїѧ и҆збива́хъ всѧ̑ грѣ̑шныѧ землѝ, є҆́же потреби́ти ѿ гра́да гдⷭ҇нѧ всѧ̑ дѣ́лающыѧ беззако́нїе.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їѧ, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
А҆́гг҃льскїѧ си̑лы на гро́бѣ твое́мъ, / и҆ стрегꙋ́щїи ѡ҆мертвѣ́ша: / и҆ стоѧ́ше мр҃і́а во гро́бѣ, / и҆́щꙋщи пречⷭ҇тагѡ тѣ́ла твоегѡ̀. / плѣни́лъ є҆сѝ а҆́дъ, не и҆скꙋси́всѧ ѿ негѡ̀: / срѣ́тилъ є҆сѝ дв҃ꙋ да́рꙋѧй живо́тъ. / воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Что́ тѧ нарече́мъ, q бл҃года́тнаѧ; нб҃о, ꙗ҆́кѡ возсїѧ́ла є҆сѝ сл҃нце пра́вды: ра́й, ꙗ҆́кѡ прозѧбла̀ є҆сѝ цвѣ́тъ нетлѣ́нїѧ: дв҃ꙋ, ꙗ҆́кѡ пребыла̀ є҆сѝ нетлѣ́нна: чи́стꙋю мт҃рь, ꙗ҆́кѡ и҆мѣ́ла є҆сѝ на ст҃ы́хъ твои́хъ ѡ҆б̾ѧ́тїѧхъ сн҃а, всѣ́хъ бг҃а. того̀ молѝ сп҃сти́сѧ дꙋша́мъ на́шымъ.
Стѡпы̀ моѧ̑ напра́ви по словесѝ твоемꙋ̀: и҆ да не ѡ҆блада́етъ мно́ю всѧ́кое беззако́нїе. и҆зба́ви мѧ̀ ѿ клеветы̀ человѣ́ческїѧ, и҆ сохраню̀ за́пѡвѣди твоѧ̑. лицѐ твоѐ просвѣтѝ на раба̀ твоего̀, и҆ наꙋчи́ мѧ ѡ҆правда́нїємъ твои̑мъ.
Да и҆спо́лнѧтсѧ ѹ҆ста̀ моѧ̑ хвале́нїѧ твоегѡ̀ гдⷭ҇и, ꙗ҆́кѡ да воспою̀ сла́вꙋ твою̀, ве́сь де́нь великолѣ́пїе твоѐ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Живонача́льною дла́нїю, / ѹ҆ме́ршыѧ ѿ мра́чныхъ ѹ҆до́лїй, / жизнода́вецъ воскр҃си́въ всѣ́хъ хрⷭ҇то́съ бг҃ъ, / воскрⷭ҇нїе подадѐ человѣ́ческомꙋ ро́дꙋ: / є҆́сть бо всѣ́хъ сп҃си́тель, / воскрⷭ҇нїе и҆ живо́тъ, и҆ бг҃ъ всѣ́хъ.
Гдⷭ҇и поми́лꙋй, м҃.
И҆́же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю ѡ҆бѣща̑нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ: дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней: ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Чⷭ҇тнѣ́йшꙋю херꙋв‡мъ, и҆ сла́внѣйшꙋю без̾ сравне́нїѧ сераф‡мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Гдⷭ҇и поми́лꙋй. [Три́жды.]
Взбра́нной воево́дѣ побѣди́тєльнаѧ, / ꙗ҆́кѡ и҆зба́вльшесѧ ѿ ѕлы́хъ, / бл҃года́рствєннаѧ восписꙋ́емъ тѝ рабѝ твоѝ, бцⷣе: / но ꙗ҆́кѡ и҆мꙋ́щаѧ держа́вꙋ непобѣди́мꙋю, / ѿ всѧ́кихъ на́съ бѣ́дъ свободѝ, да зове́мъ тѝ: / ра́дꙋйсѧ, невѣ́сто неневѣ́стнаѧ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Гдⷭ҇и поми́лꙋй. [Три́жды.]
Гдⷭ҇и бл҃гословѝ.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Сла́ва тебѣ̀ бж҃е на́шъ, сла́ва тебѣ̀.
Цр҃ю̀ нбⷭ҇ный, ѹ҆тѣ́шителю, дш҃е и҆́стины, и҆́же вездѣ̀ сы́й, и҆ всѧ̑ и҆сполнѧ́ѧй, сокро́вище бл҃ги́хъ и҆ жи́зни пода́телю, прїидѝ и҆ всели́сѧ въ ны̀, и҆ ѡ҆чи́сти ны̀ ѿ всѧ́кїѧ скве́рны, и҆ сп҃сѝ бл҃же, дꙋ́шы на́шѧ.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ, да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Та́же, Гдⷭ҇и поми́лꙋй, в҃і.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
Та́же ѱалмы̀:
Ѹ҆слы́ши гдⷭ҇и, пра́вдꙋ мою̀, вонмѝ моле́нїю моемꙋ̀, внꙋшѝ мл҃твꙋ мою̀ не во ѹ҆стна́хъ льсти́выхъ. ѿ лица̀ твоегѡ̀ сꙋдьба̀ моѧ̀ и҆зы́детъ, ѻ҆́чи моѝ да ви́дита правоты̑. и҆скꙋси́лъ є҆сѝ се́рдце моѐ, посѣти́лъ є҆сѝ но́щїю, и҆скꙋси́лъ мѧ̀ є҆сѝ, и҆ не ѡ҆брѣ́тесѧ во мнѣ̀ непра́вда. ꙗ҆́кѡ да не возглаго́лютъ ѹ҆ста̀ моѧ̑ дѣ́лъ человѣ́ческихъ, за словеса̀ ѹ҆сте́нъ твои́хъ, а҆́зъ сохрани́хъ пꙋти̑ же́стоки. совершѝ стѡпы̀ моѧ̑ во стезѧ́хъ твои́хъ, да не подви́жꙋтсѧ стѡпы̀ моѧ̑. а҆́зъ воззва́хъ, ꙗ҆́кѡ ѹ҆слы́шалъ мѧ̀ є҆сѝ бж҃е, приклонѝ ѹ҆́хо твоѐ мнѣ̀, и҆ ѹ҆слы́ши глаго́лы моѧ̑. ѹ҆дивѝ млⷭ҇ти твоѧ̑, сп҃са́ѧй ѹ҆пова́ющыѧ на тѧ̀ ѿ проти́вѧщихсѧ десни́цѣ твое́й. сохрани́ мѧ гдⷭ҇и, ꙗ҆́кѡ зѣ́ницꙋ ѻ҆́ка: въ кро́вѣ крилꙋ̀ твоє́ю покры́еши мѧ̀, ѿ лица̀ нечести́выхъ ѡ҆стра́стшихъ мѧ̀. вразѝ моѝ дꙋ́шꙋ мою̀ ѡ҆держа́ша, тꙋ́къ сво́й затвори́ша: ѹ҆ста̀ и҆́хъ глаго́лаша горды́ню. и҆згонѧ́щїи мѧ̀ ны́нѣ ѡ҆быдо́ша мѧ̀, ѻ҆́чи своѝ возложи́ша ѹ҆клони́ти на зе́млю. ѡ҆б̾ѧ́ша мѧ̀ ꙗ҆́кѡ ле́въ гото́въ на ло́въ, и҆ ꙗ҆́кѡ скѵ́менъ ѡ҆бита́ѧй въ та́йныхъ. воскрⷭ҇нѝ гдⷭ҇и, предварѝ ѧ҆̀, и҆ запнѝ и҆̀мъ: и҆зба́ви дꙋ́шꙋ мою̀ ѿ нечести́вагѡ, ѻ҆рꙋ́жїе твоѐ ѿ вра̑гъ рꙋкѝ твоеѧ̀. гдⷭ҇и, ѿ ма́лыхъ ѿ землѝ, раздѣлѝ ѧ҆̀ въ животѣ̀ и҆́хъ, и҆ сокрове́нныхъ твои́хъ и҆спо́лнисѧ чре́во и҆́хъ. насы́тишасѧ сынѡ́въ, и҆ ѡ҆ста́виша ѡ҆ста́нки младе́нцємъ свои̑мъ. а҆́зъ же пра́вдою ꙗ҆влю́сѧ лицꙋ̀ твоемꙋ̀, насы́щꙋсѧ, внегда̀ ꙗ҆ви́ти ми сѧ сла́вѣ твое́й.
Къ тебѣ̀ гдⷭ҇и, воздвиго́хъ дꙋ́шꙋ мою̀. бж҃е мо́й, на тѧ̀ ѹ҆пова́хъ, да не постыжꙋ́сѧ во вѣ́къ, нижѐ да посмѣю́тъ ми сѧ вразѝ моѝ: и҆́бо всѝ терпѧ́щїи тѧ̀ не постыдѧ́тсѧ. да постыдѧ́тсѧ беззако́ннꙋющїи вотщѐ. пꙋти̑ твоѧ̑ гдⷭ҇и, скажи́ ми, и҆ стезѧ́мъ твои̑мъ наꙋчи́ мѧ. наста́ви мѧ̀ на и҆́стинꙋ твою̀, и҆ наꙋчи́ мѧ: ꙗ҆́кѡ ты̀ є҆сѝ бг҃ъ сп҃съ мо́й, и҆ тебѐ терпѣ́хъ ве́сь де́нь. помѧнѝ щедрѡ́ты твоѧ̑ гдⷭ҇и, и҆ млⷭ҇ти твоѧ̑, ꙗ҆́кѡ ѿ вѣ́ка сꙋ́ть. грѣ̑хъ ю҆́ности моеѧ̀, и҆ невѣ́дѣнїѧ моегѡ̀ не помѧнѝ: по млⷭ҇ти твое́й помѧни́ мѧ ты̀, ра́ди бл҃гости твоеѧ̀, гдⷭ҇и. бл҃гъ и҆ пра́въ гдⷭ҇ь, сегѡ̀ ра́ди законоположи́тъ согрѣша́ющымъ на пꙋтѝ. наста́витъ крѡ́ткїѧ на сꙋ́дъ, наꙋчи́тъ крѡ́ткїѧ пꙋтє́мъ свои̑мъ. всѝ пꙋтїѐ гдⷭ҇ни млⷭ҇ть и҆ и҆́стина, взыска́ющымъ завѣ́та є҆гѡ̀ и҆ свидѣ́нїѧ є҆гѡ̀. ра́ди и҆́мене твоегѡ̀ гдⷭ҇и, и҆ ѡ҆чи́сти грѣ́хъ мо́й: мно́гъ бо є҆́сть. кто̀ є҆́сть человѣ́къ боѧ́йсѧ гдⷭ҇а; законоположи́тъ є҆мꙋ̀ на пꙋтѝ, є҆го́же и҆зво́ли. дꙋша̀ є҆гѡ̀ во бл҃ги́хъ водвори́тсѧ, и҆ сѣ́мѧ є҆гѡ̀ наслѣ́дитъ зе́млю. держа́ва гдⷭ҇ь боѧ́щихсѧ є҆гѡ̀, и҆ завѣ́тъ є҆гѡ̀ ꙗ҆ви́тъ и҆̀мъ. ѻ҆́чи моѝ вы́нꙋ ко гдⷭ҇ꙋ, ꙗ҆́кѡ то́й и҆сто́ргнетъ ѿ сѣ́ти но́зѣ моѝ. при́зри на мѧ̀, и҆ поми́лꙋй мѧ̀, ꙗ҆́кѡ є҆диноро́дъ и҆ ни́щь є҆́смь а҆́зъ. скѡ́рби се́рдца моегѡ̀ ѹ҆мно́жишасѧ, ѿ нꙋ́ждъ мои́хъ и҆зведи́ мѧ. ви́ждь смире́нїе моѐ и҆ трꙋ́дъ мо́й, и҆ ѡ҆ста́ви всѧ̑ грѣхѝ моѧ̑. ви́ждь врагѝ моѧ̑, ꙗ҆́кѡ ѹ҆мно́жишасѧ, и҆ ненавидѣ́нїемъ непра́веднымъ возненави́дѣша мѧ̀. сохранѝ дꙋ́шꙋ мою̀, и҆ и҆зба́ви мѧ̀, да не постыжꙋ́сѧ, ꙗ҆́кѡ ѹ҆пова́хъ на тѧ̀. неѕло́бивїи и҆ пра́вїи прилѣплѧ́хꙋсѧ мнѣ̀, ꙗ҆́кѡ потерпѣ́хъ тѧ̀ гдⷭ҇и. и҆зба́ви бж҃е, і҆и҃лѧ ѿ всѣ́хъ скорбе́й є҆гѡ̀.
Поми́лꙋй мѧ̀ бж҃е, по вели́цѣй ми́лости твое́й и҆ по мно́жествꙋ щедро́тъ твои́хъ ѡ҆чи́сти беззако́нїе моѐ. наипа́че ѡ҆мы́й мѧ̀ ѿ беззако́нїѧ моегѡ̀, и҆ ѿ грѣха̀ моегѡ̀ ѡ҆чи́сти мѧ̀. ꙗ҆́кѡ беззако́нїе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ. тебѣ̀ є҆ди́номꙋ согрѣши́хъ, и҆ лꙋка́вое пред̾ тобо́ю сотвори́хъ, ꙗ҆́кѡ да ѡ҆правди́шисѧ во словесѣ́хъ твои́хъ, и҆ побѣди́ши, внегда̀ сꙋди́ти тѝ. се́ бо въ беззако́нїихъ зача́тъ є҆́смь, и҆ во грѣсѣ́хъ роди́ мѧ ма́ти моѧ̀. се́ бо и҆́стинꙋ возлюби́лъ є҆сѝ, безвѣ̑стнаѧ и҆ та̑йнаѧ премꙋ́дрости твоеѧ̀ ꙗ҆ви́лъ мѝ є҆сѝ. ѡ҆кропи́ши мѧ̀ ѵ҆ссѡ́помъ, и҆ ѡ҆чи́щꙋсѧ: ѡ҆мы́еши мѧ̀, и҆ па́че снѣ́га ѹ҆бѣлю́сѧ. слꙋ́хꙋ моемꙋ̀ да́си ра́дость и҆ весе́лїе, возра́дꙋютсѧ кѡ́сти смирє́нныѧ. ѿвратѝ лицѐ твоѐ ѿ грѣ̑хъ мои́хъ, и҆ всѧ̑ беззакѡ́нїѧ моѧ̑ ѡ҆чи́сти. се́рдце чи́сто сози́жди во мнѣ̀ бж҃е, и҆ дꙋ́хъ пра́въ ѡ҆бновѝ во ѹ҆тро́бѣ мое́й. не ѿве́ржи менѐ ѿ лица̀ твоегѡ̀, и҆ д¦а твоегѡ̀ ст҃а́гѡ не ѿимѝ ѿ менѐ. возда́ждь мѝ ра́дость сп҃се́нїѧ твоегѡ̀, и҆ д¦омъ влⷣчнимъ ѹ҆тверди́ мѧ. наꙋчꙋ̀ беззакѡ́нныѧ пꙋтє́мъ твои̑мъ, и҆ нечести́вїи къ тебѣ̀ ѡ҆братѧ́тсѧ. и҆зба́ви мѧ̀ ѿ крове́й бж҃е, бж҃е сп҃се́нїѧ моегѡ̀, возра́дꙋетсѧ ѧ҆зы́къ мо́й пра́вдѣ твое́й. гдⷭ҇и, ѹ҆стнѣ̀ моѝ ѿве́рзеши, и҆ ѹ҆ста̀ моѧ̑ возвѣстѧ́тъ хвалꙋ̀ твою̀. ꙗ҆́кѡ а҆́ще бы восхотѣ́лъ є҆сѝ же́ртвы, да́лъ бы́хъ ѹ҆́бѡ: всесожже́нїѧ не бл҃говоли́ши. же́ртва бг҃ꙋ дꙋ́хъ сокрꙋше́нъ: се́рдце сокрꙋше́нно и҆ смире́нно бг҃ъ не ѹ҆ничижи́тъ. ѹ҆бл҃жѝ гдⷭ҇и, бл҃говоле́нїемъ твои́мъ сїѡ́на, и҆ да сози́ждꙋтсѧ стѣ́ны і҆ерⷭ҇ли̑мскїѧ. тогда̀ бл҃говоли́ши же́ртвꙋ пра́вды, возноше́нїе и҆ всесожега́ємаѧ: тогда̀ возложа́тъ на ѻ҆лта́рь тво́й тельцы̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
А҆́гг҃льскїѧ си̑лы на гро́бѣ твое́мъ, / и҆ стрегꙋ́щїи ѡ҆мертвѣ́ша: / и҆ стоѧ́ше мр҃і́а во гро́бѣ, / и҆́щꙋщи пречⷭ҇тагѡ тѣ́ла твоегѡ̀. / плѣни́лъ є҆сѝ а҆́дъ, не и҆скꙋси́всѧ ѿ негѡ̀: / срѣ́тилъ є҆сѝ дв҃ꙋ да́рꙋѧй живо́тъ. / воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Бцⷣе, ты̀ є҆сѝ лоза̀ и҆́стиннаѧ, возрасти́вшаѧ на́мъ пло́дъ живота̀, тебѣ̀ мо́лимсѧ, моли́сѧ влⷣчце со ст҃ы́ми а҆пⷭ҇лы, поми́ловати дꙋ́шы на́шѧ.
Гдⷭ҇ь бг҃ъ бл҃гослове́нъ, бл҃гослове́нъ гдⷭ҇ь де́нь днѐ, поспѣши́тъ на́мъ бг҃ъ сп҃се́нїй на́шихъ: бг҃ъ на́шъ, бг҃ъ сп҃са́ти.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Живонача́льною дла́нїю, / ѹ҆ме́ршыѧ ѿ мра́чныхъ ѹ҆до́лїй, / жизнода́вецъ воскр҃си́въ всѣ́хъ хрⷭ҇то́съ бг҃ъ, / воскрⷭ҇нїе подадѐ человѣ́ческомꙋ ро́дꙋ: / є҆́сть бо всѣ́хъ сп҃си́тель, / воскрⷭ҇нїе и҆ живо́тъ, и҆ бг҃ъ всѣ́хъ.
Гдⷭ҇и поми́лꙋй, м҃.
И҆́же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ покланѧ́емый и҆ сла́вимый, хрⷭ҇тѐ бж҃е, долготерпѣли́ве, многомлⷭ҇тиве, многобл҃гоꙋтро́бне: и҆́же пра́вєдныѧ любѧ́й и҆ грѣ̑шныѧ ми́лꙋѧй, и҆́же всѧ̑ зовы́й ко сп҃се́нїю, ѡ҆бѣща́нїѧ ра́ди бꙋ́дꙋщихъ бла̑гъ. са́мъ гдⷭ҇и, прїимѝ и҆ на́шѧ въ ча́съ се́й мл҃твы, и҆ и҆спра́ви живо́тъ на́шъ къ за́повѣдемъ твои̑мъ. дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней, ѡ҆градѝ на́съ ст҃ы́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Чⷭ҇тнѣ́йшꙋю херꙋв‡мъ, и҆ сла́внѣйшꙋю без̾ сравне́нїѧ сераф‡мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
Влⷣко бж҃е ѻ҆́ч҃е вседержи́телю, гдⷭ҇и сн҃е є҆диноро́дный і҆и҃се хрⷭ҇тѐ, и҆ ст҃ы́й дш҃е, є҆ди́но бж҃ество̀ є҆ди́на си́ла, поми́лꙋй мѧ̀ грѣ́шнаго, и҆ и҆́миже вѣ́си сꙋдьба́ми, сп҃си́ мѧ недосто́йнаго раба̀ твоего̀: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Прїиди́те, поклони́мсѧ цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ хрⷭ҇тꙋ̀, цр҃е́ви на́шемꙋ бг҃ꙋ.
Прїиди́те, поклони́мсѧ и҆ припаде́мъ самомꙋ̀ хрⷭ҇тꙋ̀, цр҃е́ви и҆ бг҃ꙋ на́шемꙋ.
Бж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми: бж҃е, ѹ҆слы́ши мл҃твꙋ мою̀, внꙋшѝ глаго́лы ѹ҆́стъ мои́хъ. ꙗ҆́кѡ чꙋ́ждїи воста́ша на мѧ̀, и҆ крѣ́пцыи взыска́ша дꙋ́шꙋ мою̀, и҆ не предложи́ша бг҃а пред̾ собо́ю. се́ бо бг҃ъ помога́етъ мѝ, и҆ гдⷭ҇ь застꙋ́пникъ дꙋшѝ мое́й. ѿврати́тъ ѕла̑ѧ врагѡ́мъ мои̑мъ, и҆́стиною твое́ю потребѝ и҆̀хъ. во́лею пожрꙋ̀ тебѣ̀, и҆сповѣ́мсѧ и҆́мени твоемꙋ̀ гдⷭ҇и, ꙗ҆́кѡ бл҃го. ꙗ҆́кѡ ѿ всѧ́кїѧ печа́ли и҆зба́вилъ мѧ̀ є҆сѝ, и҆ на врагѝ моѧ̑ воззрѣ̀ ѻ҆́ко моѐ.
Внꙋшѝ бж҃е мл҃твꙋ мою̀, и҆ не пре́зри моле́нїѧ моегѡ̀. вонми́ ми, и҆ ѹ҆слы́ши мѧ̀: возскорбѣ́хъ печа́лїю мое́ю, и҆ смѧто́хсѧ ѿ гла́са вра́жїѧ и҆ ѿ стꙋже́нїѧ грѣ́шнича. ꙗ҆́кѡ ѹ҆клони́ша на мѧ̀ беззако́нїе, и҆ во гнѣ́вѣ враждова́хꙋ мѝ. се́рдце моѐ смѧте́сѧ во мнѣ̀, и҆ боѧ́знь сме́рти нападѐ на мѧ̀. стра́хъ и҆ тре́петъ прїи́де на мѧ̀, и҆ покры́ мѧ тьма̀. и҆ рѣ́хъ: кто̀ да́стъ мѝ крилѣ̀ ꙗ҆́кѡ голꙋби́нѣ, и҆ полещꙋ̀ и҆ почі́ю; сѐ ѹ҆дали́хсѧ бѣ́гаѧ, и҆ водвори́хсѧ въ пꙋсты́ни. ча́ѧхъ бг҃а, сп҃са́ющагѡ мѧ̀ ѿ малодꙋ́шїѧ и҆ ѿ бꙋ́ри. потопѝ гдⷭ҇и, и҆ раздѣлѝ ꙗ҆зы́ки и҆́хъ, ꙗ҆́кѡ ви́дѣхъ беззако́нїе, и҆ прерѣка́нїе во гра́дѣ. дне́мъ и҆ но́щїю ѡ҆бы́детъ и҆̀ по стѣна́мъ є҆гѡ̀: беззако́нїе и҆ трꙋ́дъ посредѣ̀ є҆гѡ̀, и҆ непра́вда: и҆ не ѡ҆скꙋдѣ̀ ѿ сто́гнъ є҆гѡ̀ ли́хва и҆ ле́сть. ꙗ҆́кѡ а҆́ще бы вра́гъ поноси́лъ мѝ, претерпѣ́лъ бы́хъ ѹ҆̀бо: и҆ а҆́ще бы ненави́дѧй мѧ̀ на мѧ̀ велерѣ́чевалъ, ѹ҆кры́лъ бы́хъ сѧ ѿ негѡ̀. ты́ же человѣ́че равнодꙋ́шне, влады́ко мо́й, и҆ зна́емый мо́й: и҆́же кꙋ́пнѡ наслажда́лсѧ є҆сѝ со мно́ю бра́шенъ, въ домꙋ̀ бж҃їи ходи́хомъ є҆диномышле́нїемъ. да прїи́детъ же сме́рть на тѧ̀, и҆ да сни́дꙋтъ во а҆́дъ жи́ви: ꙗ҆́кѡ лꙋка́вство въ жили́щахъ и҆́хъ, посредѣ̀ и҆̀хъ: а҆́зъ къ бг҃ꙋ воззва́хъ, и҆ гдⷭ҇ь ѹ҆слы́ша мѧ̀. ве́черъ и҆ заꙋ́тра и҆ полꙋ́дне повѣ́мъ, и҆ возвѣщꙋ̀, и҆ ѹ҆слы́шитъ гла́съ мо́й. и҆зба́витъ ми́ромъ дꙋ́шꙋ мою̀ ѿ приближа́ющихсѧ мнѣ̀: ꙗ҆́кѡ во мно́зѣ бѧ́хꙋ со мно́ю. ѹ҆слы́шитъ бг҃ъ, и҆ смири́тъ ѧ҆̀, сы́й пре́жде вѣ̑къ: нѣ́сть бо и҆̀мъ и҆змѣне́нїѧ, ꙗ҆́кѡ не ѹ҆боѧ́шасѧ бг҃а. прострѐ рꙋ́кꙋ свою̀ на воздаѧ́нїе, ѡ҆скверни́ша завѣ́тъ є҆гѡ̀. раздѣли́шасѧ ѿ гнѣ́ва лица̀ є҆гѡ̀, и҆ прибли́жишасѧ сердца̀ и҆́хъ: ѹ҆мѧ́кнꙋша словеса̀ и҆́хъ па́че є҆ле́а, и҆ та̑ сꙋ́ть стрѣ́лы. возве́рзи на гдⷭ҇а печа́ль твою̀, и҆ то́й тѧ̀ препита́етъ, не да́стъ въ вѣ́къ молвы̀ пра́ведникꙋ. ты́ же бж҃е, низведе́ши ѧ҆̀ въ стꙋдене́цъ и҆стлѣ́нїѧ. мꙋ́жїе крове́й и҆ льстѝ не преполовѧ́тъ дне́й свои́хъ: а҆́зъ же гдⷭ҇и ѹ҆пова́ю на тѧ̀.
Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ. рече́тъ гдⷭ҇еви: застꙋ́пникъ мо́й є҆сѝ, и҆ прибѣ́жище моѐ, бг҃ъ мо́й, и҆ ѹ҆пова́ю на него̀. ꙗ҆́кѡ то́й и҆зба́витъ тѧ̀ ѿ сѣ́ти ло́вчи, и҆ ѿ словесѐ мѧте́жна. плещма̀ свои́ма ѡ҆сѣни́тъ тѧ̀, и҆ под̾ крилѣ̀ є҆гѡ̀ надѣ́ешисѧ. ѻ҆рꙋ́жїемъ ѡ҆бы́детъ тѧ̀ и҆́стина є҆гѡ̀, не ѹ҆бои́шисѧ ѿ стра́ха нощна́гѡ, ѿ стрѣлы̀ летѧ́щїѧ во днѝ, ѿ ве́щи во тьмѣ̀ преходѧ́щїѧ, ѿ срѧ́ща и҆ бѣ́са полꙋ́деннагѡ. паде́тъ ѿ страны̀ твоеѧ̀ ты́сѧща, и҆ тьма̀ ѡ҆деснꙋ́ю тебѐ, къ тебѣ́ же не прибли́житсѧ. ѻ҆ба́че ѻ҆чи́ма твои́ма смо́триши, и҆ воздаѧ́нїе грѣ́шникѡвъ ѹ҆́зриши. ꙗ҆́кѡ ты̀ гдⷭ҇и, ѹ҆пова́нїе моѐ, вы́шнѧго положи́лъ є҆сѝ прибѣ́жище твоѐ. не прїи́детъ къ тебѣ̀ ѕло̀, и҆ ра́на не прибли́житсѧ тѣлесѝ твоемꙋ̀. ꙗ҆́кѡ а҆́гг҃лѡмъ свои̑мъ заповѣ́сть ѡ҆ тебѣ̀, сохрани́ти тѧ̀ во всѣ́хъ пꙋте́хъ твои́хъ. на рꙋка́хъ во́змꙋтъ тѧ̀, да не когда̀ преткне́ши ѡ҆ ка́мень но́гꙋ твою̀. на а҆́спїда и҆ васїлі́ска настꙋ́пиши, и҆ попере́ши льва̀ и҆ ѕмі́ѧ. ꙗ҆́кѡ на мѧ̀ ѹ҆пова̀, и҆ и҆зба́влю и҆̀: покры́ю и҆̀, ꙗ҆́кѡ позна̀ и҆́мѧ моѐ: воззове́тъ ко мнѣ̀, и҆ ѹ҆слы́шꙋ є҆го̀: съ ни́мъ є҆́смь въ ско́рби, и҆змꙋ̀ є҆го̀: и҆ просла́влю є҆го̀: долгото́ю дне́й и҆спо́лню є҆го̀, и҆ ꙗ҆влю̀ є҆мꙋ̀ сп҃се́нїе моѐ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ґллилꙋ́їа, а҆ллилꙋ́їа, а҆ллилꙋ́їа, сла́ва тебѣ̀ бж҃е. [Три́жды.]
Гдⷭ҇и поми́лꙋй. [Три́жды.]
А҆́гг҃льскїѧ си̑лы на гро́бѣ твое́мъ, / и҆ стрегꙋ́щїи ѡ҆мертвѣ́ша: / и҆ стоѧ́ше мр҃і́а во гро́бѣ, / и҆́щꙋщи пречⷭ҇тагѡ тѣ́ла твоегѡ̀. / плѣни́лъ є҆сѝ а҆́дъ, не и҆скꙋси́всѧ ѿ негѡ̀: / срѣ́тилъ є҆сѝ дв҃ꙋ да́рꙋѧй живо́тъ. / воскр҃сы́й и҆з̾ ме́ртвыхъ, гдⷭ҇и, сла́ва тебѣ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Ꙗ҆́кѡ не и҆́мамы дерзнове́нїѧ за премнѡ́гїѧ грѣхѝ на́шѧ, ты̀ и҆́же ѿ тебѐ ро́ждшагосѧ молѝ бцⷣе дв҃о: мно́гѡ бо мо́жетъ моле́нїе мт҃рнее ко бл҃госе́рдїю влⷣки. не пре́зри грѣ́шныхъ мольбы̑ всечⷭ҇таѧ, ꙗ҆́кѡ млⷭ҇тивъ є҆́сть, и҆ сп҃стѝ могі́й, и҆́же и҆ страда́ти ѡ҆ на́съ и҆зво́ливый.
Ско́рѡ да предварѧ́тъ ны̀ щедрѡ́ты твоѧ̑ гдⷭ҇и, ꙗ҆́кѡ ѡ҆бнища́хомъ ѕѣлѡ̀: помозѝ на́мъ бж҃е сп҃се на́шъ, сла́вы ра́ди и҆́мене твоегѡ̀ гдⷭ҇и, и҆зба́ви на́съ, и҆ ѡ҆чи́сти грѣхѝ на́шѧ, и҆́мене ра́ди твоегѡ̀.
Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Прест҃а́ѧ трⷪ҇це, поми́лꙋй на́съ: гдⷭ҇и, ѡ҆чи́сти грѣхѝ на́шѧ: влⷣко, простѝ беззакѡ́нїѧ на̑ша: ст҃ы́й, посѣтѝ и҆ и҆сцѣлѝ не́мѡщи на́шѧ, и҆́мене твоегѡ̀ ра́ди.
Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Живонача́льною дла́нїю, / ѹ҆ме́ршыѧ ѿ мра́чныхъ ѹ҆до́лїй, / жизнода́вецъ воскр҃си́въ всѣ́хъ хрⷭ҇то́съ бг҃ъ, / воскрⷭ҇нїе подадѐ человѣ́ческомꙋ ро́дꙋ: / є҆́сть бо всѣ́хъ сп҃си́тель, / воскрⷭ҇нїе и҆ живо́тъ, и҆ бг҃ъ всѣ́хъ.
Гдⷭ҇и поми́лꙋй, м҃.
И҆́же на всѧ́кое вре́мѧ, и҆ на всѧ́кїй ча́съ, на нб҃сѝ и҆ на землѝ, покланѧ́емый и҆ сла́вимый хрⷭ҇тѐ бж҃е, долготерпѣли́ве, многоми́лостиве, многобл҃гоꙋтро́бне, и҆́же пра́вєдныѧ любѧ́й, и҆ грѣ̑шныѧ ми́лꙋѧй, и҆́же всѧ̑ зовы́й ко спасе́нїю ѡ҆бѣща́нїѧ ра́ди бꙋ́дꙋщихъ бла̑гъ: са́мъ гдⷭ҇и, прїимѝ и҆ на́шѧ въ ча́съ се́й моли̑твы, и҆ и҆спра́ви живо́тъ на́шъ къ за́повѣдемъ твои̑мъ, дꙋ́шы на́шѧ ѡ҆свѧтѝ, тѣлеса̀ ѡ҆чи́сти, помышлє́нїѧ и҆спра́ви, мы̑сли ѡ҆чи́сти, и҆ и҆зба́ви на́съ ѿ всѧ́кїѧ ско́рби, ѕѡ́лъ и҆ болѣ́зней. ѡ҆градѝ на́съ свѧты́ми твои́ми а҆́гг҃лы, да ѡ҆полче́нїемъ и҆́хъ соблюда́еми и҆ наставлѧ́еми, дости́гнемъ въ соедине́нїе вѣ́ры, и҆ въ ра́зꙋмъ непристꙋ́пныѧ твоеѧ̀ сла́вы: ꙗ҆́кѡ бл҃гослове́нъ є҆сѝ во вѣ́ки вѣкѡ́въ, а҆ми́нь.
Посе́мъ: Гдⷭ҇и поми́лꙋй. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Чⷭ҇тнѣ́йшꙋю херꙋв‡мъ, и҆ сла́внѣйшꙋю без̾ сравне́нїѧ сераф‡мъ, без̾ и҆стлѣ́нїѧ бг҃а сло́ва ро́ждшꙋю, сꙋ́щꙋю бцⷣꙋ тѧ̀ велича́емъ.
Моли́твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ, бж҃е на́шъ, поми́лꙋй на́съ, а҆ми́нь.
҆҆ Та́же мл҃тва ст҃а́гѡ вели́кагѡ васі́лїа:
Бж҃е и҆ гдⷭ҇и си́лъ, и҆ всеѧ̀ тва́ри содѣ́телю, и҆́же за млⷭ҇рдїе безприкла́дныѧ млⷭ҇ти твоеѧ̀, є҆диноро́днаго сн҃а твоего̀, гдⷭ҇а на́шего і҆и҃са хрⷭ҇та̀, низпосла́вый на сп҃се́нїе ро́да на́шегѡ, и҆ чⷭ҇тны́мъ є҆гѡ̀ крⷭ҇то́мъ рꙋкописа́нїе грѣ̑хъ на́шихъ растерза́вый, и҆ побѣди́вый тѣ́мъ нача̑ла и҆ вла̑сти тьмы̀: са́мъ влⷣко чл҃вѣколю́бче, прїимѝ и҆ на́съ грѣ́шныхъ бл҃года́рствєнныѧ сїѧ̑ и҆ молє́бныѧ мл҃твы, и҆ и҆зба́ви на́съ ѿ всѧ́кагѡ всегꙋби́тельнагѡ и҆ мра́чнагѡ прегрѣше́нїѧ, и҆ всѣ́хъ ѡ҆ѕло́бити на́съ и҆́щꙋщихъ, ви́димыхъ и҆ неви́димыхъ вра̑гъ. пригвоздѝ стра́хꙋ твоемꙋ̀ плѡ́ти на́шѧ, и҆ не ѹ҆клонѝ серде́цъ на́шихъ въ словеса̀ и҆лѝ помышлє́нїѧ лꙋка́вствїѧ: но любо́вїю твое́ю ѹ҆ѧзвѝ дꙋ́шы на́шѧ, да къ тебѣ̀ всегда̀ взира́юще, и҆ є҆́же ѿ тебѐ свѣ́томъ наставлѧ́еми, тебѐ непристꙋ́пнаго и҆ присносꙋ́щнаго зрѧ́ще свѣ́та, непреста́нное тебѣ̀ и҆сповѣ́данїе и҆ бл҃годаре́нїе возсыла́емъ, безнача́льномꙋ ѻ҆ц҃ꙋ̀ со є҆диноро́днымъ твои́мъ сн҃омъ, и҆ всест҃ы́мъ, и҆ бл҃ги́мъ, и҆ животворѧ́щимъ твои́мъ д¦омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
И҆ глаго́лемъ здѣ̀ и҆з̾ѡбрази́тєльнаѧ.
҆҆ И҆з̾ѡбрази́тельныѧ.
Глаго́ли си́це: Бл҃гословѝ дꙋшѐ моѧ̀ гдⷭ҇а, бл҃гослове́нъ є҆сѝ гдⷭ҇и.
Бл҃гословѝ дꙋшѐ моѧ̀ гдⷭ҇а, и҆ всѧ̑ внꙋ́трєннѧѧ моѧ̑, и҆́мѧ ст҃о́е є҆гѡ̀. бл҃гословѝ дꙋшѐ моѧ̀ гдⷭ҇а, и҆ не забыва́й всѣ́хъ воздаѧ́нїй є҆гѡ̀: ѡ҆чища́ющаго всѧ̑ беззакѡ́нїѧ твоѧ̑, и҆сцѣлѧ́ющаго всѧ̑ недꙋ́ги твоѧ̑: и҆збавлѧ́ющаго ѿ и҆стлѣ́нїѧ живо́тъ тво́й, вѣнча́ющаго тѧ̀ ми́лостїю и҆ щедро́тами: и҆сполнѧ́ющаго во бл҃ги́хъ жела́нїе твоѐ: ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀. творѧ́й ми́лѡстыни гдⷭ҇ь, и҆ сꙋдьбꙋ̀ всѣ̑мъ ѡ҆би̑димымъ. сказа̀ пꙋти̑ своѧ̑ мѡѷсе́ови, сыновѡ́мъ і҆и҃лєвымъ хотѣ̑нїѧ своѧ̑. ще́дръ и҆ млⷭ҇тивъ гдⷭ҇ь, долготерпѣли́въ и҆ многомлⷭ҇тивъ. не до конца̀ прогнѣ́ваетсѧ, нижѐ во вѣ́къ враждꙋ́етъ. не по беззако́нїємъ на́шымъ сотвори́лъ є҆́сть на́мъ, нижѐ по грѣхѡ́мъ на́шымъ возда́лъ є҆́сть на́мъ. ꙗ҆́кѡ по высотѣ̀ нбⷭ҇нѣй ѿ землѝ, ѹ҆тверди́лъ є҆́сть гдⷭ҇ь млⷭ҇ть свою̀ на боѧ́щихсѧ є҆гѡ̀. є҆ли́кѡ ѿстоѧ́тъ восто́цы ѿ за̑падъ, ѹ҆да́лилъ є҆́сть ѿ на́съ беззакѡ́нїѧ на̑ша. ꙗ҆́коже ще́дритъ ѻ҆те́цъ сы́ны, ѹ҆ще́дри гдⷭ҇ь боѧ́щихсѧ є҆гѡ̀. ꙗ҆́кѡ то́й позна̀ созда́нїе на́ше, помѧнꙋ̀, ꙗ҆́кѡ пе́рсть є҆смы̀: Человѣ́къ, ꙗ҆́кѡ трава̀ дні́е є҆гѡ̀, ꙗ҆́кѡ цвѣ́тъ се́льный та́кѡ ѡ҆цвѣте́тъ. ꙗ҆́кѡ дꙋ́хъ про́йде въ не́мъ, и҆ не бꙋ́детъ, и҆ не позна́етъ ктомꙋ̀ мѣ́ста своегѡ̀. млⷭ҇ть же гдⷭ҇нѧ ѿ вѣ́ка и҆ до вѣ́ка на боѧ́щихсѧ є҆гѡ̀, и҆ пра́вда є҆гѡ̀ на сынѣ́хъ сынѡ́въ хранѧ́щихъ завѣ́тъ є҆гѡ̀, и҆ по́мнѧщихъ за́пѡвѣди є҆гѡ̀ твори́ти ѧ҆̀. гдⷭ҇ь на нб҃сѝ ѹ҆гото́ва прⷭ҇то́лъ сво́й, и҆ црⷭ҇тво є҆гѡ̀ всѣ́ми ѡ҆блада́етъ. бл҃гослови́те гдⷭ҇а всѝ а҆́гг҃ли є҆гѡ̀, си́льнїи крѣ́постїю, творѧ́щїи сло́во є҆гѡ̀, ѹ҆слы́шати гла́съ слове́съ є҆гѡ̀. бл҃гослови́те гдⷭ҇а всѧ̑ си̑лы є҆гѡ̀, слꙋги̑ є҆гѡ̀, творѧ́щїи во́лю є҆гѡ̀. бл҃гослови́те гдⷭ҇а всѧ̑ дѣла̀ є҆гѡ̀, на всѧ́комъ мѣ́стѣ влⷣчества є҆гѡ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бл҃гословѝ дꙋшѐ моѧ̀ гдⷭ҇а, и҆ всѧ̑ внꙋ́трєннѧѧ моѧ̑, и҆́мѧ ст҃о́е є҆гѡ̀. бл҃гослове́нъ є҆сѝ гдⷭ҇и.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Хвалѝ дꙋшѐ моѧ̀ гдⷭ҇а. восхвалю̀ гдⷭ҇а въ животѣ̀ мое́мъ, пою̀ бг҃ꙋ моемꙋ̀, до́ндеже є҆́смь. не надѣ́йтесѧ на кнѧ́зи, на сы́ны человѣ́чєскїѧ, въ ни́хже нѣ́сть спасе́нїѧ. и҆зы́детъ дꙋ́хъ є҆гѡ̀, и҆ возврати́тсѧ въ зе́млю свою̀: въ то́й де́нь поги́бнꙋтъ всѧ̑ помышлє́нїѧ є҆гѡ̀. бл҃же́нъ, є҆мꙋ́же бг҃ъ і҆а́кѡвль помо́щникъ є҆гѡ̀, ѹ҆пова́нїе є҆гѡ̀ на гдⷭ҇а бг҃а своего̀: сотво́ршаго нб҃о и҆ зе́млю, мо́ре, и҆ всѧ̑ ꙗ҆̀же въ ни́хъ: Хранѧ́щаго и҆́стинꙋ въ вѣ́къ, творѧ́щаго сꙋ́дъ ѡ҆би̑димымъ, даю́щаго пи́щꙋ а҆́лчꙋщымъ. гдⷭ҇ь рѣши́тъ ѡ҆кова̑нныѧ, гдⷭ҇ь ѹ҆мꙋдрѧ́етъ слѣпцы̀, гдⷭ҇ь возво́дитъ низве́ржєнныѧ, гдⷭ҇ь лю́битъ пра́ведники. гдⷭ҇ь храни́тъ прише́льцы, си́ра и҆ вдовꙋ̀ прїи́метъ, и҆ пꙋ́ть грѣ́шныхъ погꙋби́тъ. воцр҃и́тсѧ гдⷭ҇ь во вѣ́къ, бг҃ъ тво́й сїѡ́не, въ ро́дъ и҆ ро́дъ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Є҆диноро́дный сн҃е, и҆ сло́ве бж҃їй, безсме́ртенъ сы́й, и҆ и҆зво́ливый сп҃се́нїѧ на́шегѡ ра́ди воплоти́тисѧ ѿ ст҃ы́ѧ бцⷣы, и҆ приснодв҃ы мр҃і́и, непрело́жнѡ вочл҃вѣ́чивыйсѧ: распны́йсѧ же хрⷭ҇тѐ бж҃е, сме́ртїю сме́рть попра́вый, є҆ди́нъ сы́й ст҃ы́ѧ трⷪ҇цы, спрославлѧ́емый ѻ҆ц҃ꙋ̀ и҆ ст҃о́мꙋ д¦ꙋ, сп҃сѝ на́съ.
Во црⷭ҇твїи твое́мъ помѧнѝ на́съ, гдⷭ҇и, є҆гда̀ прїи́деши во црⷭ҇твїи твое́мъ.
Бл҃же́ни ни́щїи дꙋ́хомъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
Бл҃же́ни пла́чꙋщїи, ꙗ҆́кѡ ті́и ᲂу҆тѣ́шатсѧ.
Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
Сті́хъ: Бл҃же́ни чи́стїи се́рдцемъ, ꙗ҆́кѡ ті́и бг҃а ѹ҆́зрѧтъ.
Дре́вомъ а҆да́ма прельсти́вшагосѧ, / дре́вомъ крⷭ҇тнымъ па́ки сп҃слъ є҆сѝ и҆ разбо́йника, вопїю́ща: / помѧни́ мѧ гдⷭ҇и во црⷭ҇твїи твое́мъ.
Сті́хъ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
А҆́дѡва врата̀ и҆ верєѝ сокрꙋши́вый жизнода́вче, / воскр҃си́лъ є҆сѝ всѧ̑ сп҃се вопїю́щыѧ: / сла́ва воста́нїю твоемꙋ̀.
Сті́хъ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
Помѧни́ мѧ, и҆́же сме́рть плѣни́вый погребе́нїемъ твои́мъ, / и҆ воскрⷭ҇нїемъ твои́мъ ра́дости всѧ̑ и҆спо́лнивый, ꙗ҆́кѡ бл҃гоꙋтро́бенъ.
Сті́хъ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менѐ ра́ди.
Мѷронѡ́сицы ко гро́бꙋ прише́дшѧ, / а҆́гг҃ла зовꙋ́ща слы́шахꙋ: / хрⷭ҇то́съ воскр҃се, просвѣти́вый всѧ́чєскаѧ.
Сті́хъ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
На дре́вѣ крⷭ҇тнѣмъ пригвозди́вшагосѧ, / и҆ мі́ръ ѿ пре́лести и҆зба́вльшаго, / согла́снѡ всѝ хрⷭ҇та̀ воспои́мъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Трⷪ҇ченъ: Ѻ҆ц҃а̀, и҆ сн҃а славосло́вимъ, / и҆ д¦а ст҃а́го, глаго́люще: / трⷪ҇це ст҃а́ѧ, сп҃сѝ дꙋ́шы на́шѧ.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бг҃оро́диченъ: Неизрече́ннѡ въ послѣ̑днѧѧ заче́нши, / и҆ ро́ждши созда́телѧ твоего̀, / дв҃о, сп҃са́й тѧ̀ велича́ющыѧ.
Сп҃сѝ гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ.
Сп҃сѝ гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ.
Сті́хъ: Къ тебѣ̀ гдⷭ҇и воззовꙋ̀, бж҃е мо́й, да не премолчи́ши ѿ менѐ.
Сп҃сѝ гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ.
Сп҃сѝ гдⷭ҇и, лю́ди твоѧ̑.
И҆ бл҃гословѝ достоѧ́нїе твоѐ.
А҆пⷭ҇лъ днѐ.
Сті́хъ: Живы́й въ по́мощи вы́шнѧгѡ, въ кро́вѣ бг҃а нбⷭ҇нагѡ водвори́тсѧ.
Сті́хъ: Рече́тъ гдⷭ҇еви: застꙋ́пникъ мо́й є҆сѝ, и҆ прибѣ́жище моѐ, бг҃ъ мо́й, и҆ ѹ҆пова́ю на него̀.
Є҆ѵⷢ҇лїе днѐ.
Помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.
Помѧнѝ на́съ влⷣко, є҆гда̀ прїи́деши во црⷭ҇твїи твое́мъ.
Помѧнѝ на́съ ст҃ы́й, є҆гда̀ прїи́деши во црⷭ҇твїи твое́мъ.
Ли́къ нбⷭ҇ный пое́тъ тѧ̀, и҆ глаго́летъ: ст҃ъ, ст҃ъ, ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀.
Сті́хъ: Пристꙋпи́те къ немꙋ̀ и҆ просвѣти́тесѧ, и҆ ли́ца ва̑ша не постыдѧ́тсѧ.
Ли́къ нбⷭ҇ный пое́тъ тѧ̀, и҆ глаго́летъ: ст҃ъ, ст҃ъ, ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ.
Ли́къ ст҃ы́хъ а҆́гг҃лъ и҆ а҆рха̑гг҃лъ, со всѣ́ми нбⷭ҇ными си́лами пое́тъ тѧ̀, и҆ глаго́летъ: ст҃ъ, ст҃ъ, ст҃ъ гдⷭ҇ь саваѡ́ѳъ: и҆спо́лнь нб҃о и҆ землѧ̀ сла́вы твоеѧ̀.
И҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Вѣ́рꙋю во є҆ди́наго бг҃а ѻ҆ц҃а̀ вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ и҆ неви̑димымъ. и҆ во є҆ди́наго гдⷭ҇а і҆и҃са хрⷭ҇та̀, сн҃а бж҃їѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ: свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша. на́съ ра́ди человѣ̑къ, и҆ на́шегѡ ра́ди спасе́нїѧ, сше́дшаго съ нб҃съ, и҆ воплоти́вшагосѧ ѿ д¦а ст҃а и҆ мр҃і́и дв҃ы, и҆ вочеловѣ́чшасѧ. распѧ́таго же за ны̀ при понті́йстѣмъ пїла́тѣ, и҆ страда́вша, и҆ погребе́нна, и҆ воскрⷭ҇шаго въ тре́тїй де́нь по писа́нїємъ. и҆ возше́дшаго на нб҃са̀, и҆ сѣдѧ́ща ѡ҆деснꙋ́ю ѻ҆ц҃а̀. и҆ па́ки грѧдꙋ́щаго со сла́вою, сꙋди́ти живы̑мъ и҆ мє́ртвымъ, є҆гѡ́же црⷭ҇твїю не бꙋ́детъ конца̀. и҆ въ д¦а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, глаго́лавшаго прⷪ҇ро́ки. во є҆ди́нꙋ ст҃ꙋ́ю собо́рнꙋю и҆ а҆пⷭ҇льскꙋю цр҃ковь. и҆сповѣ́дꙋю є҆ди́но кр҃ще́нїе, во ѡ҆ставле́нїе грѣхѡ́въ. ча́ю воскрⷭ҇нїѧ ме́ртвыхъ: и҆ жи́зни бꙋ́дꙋщагѡ вѣ́ка. а҆ми́нь.
Ѡ҆сла́би, ѡ҆ста́ви, простѝ бж҃е прегрѣшє́нїѧ на̑ша, вѡ́льнаѧ и҆ невѡ́льнаѧ, ꙗ҆̀же въ сло́вѣ и҆ въ дѣ́лѣ, ꙗ҆̀же въ вѣ́дѣнїи и҆ не въ вѣ́дѣнїи, ꙗ҆̀же во днѝ и҆ въ нощѝ, ꙗ҆̀же во ѹ҆мѣ̀ и҆ въ помышле́нїи: всѧ̑ на́мъ простѝ, ꙗ҆́кѡ бл҃гъ и҆ чл҃вѣколю́бецъ.
Ѻ҆́ч҃е на́шъ, и҆́же є҆сѝ на нб҃сѣ́хъ, да свѧти́тсѧ и҆́мѧ твоѐ, да прїи́детъ црⷭ҇твїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
Живонача́льною дла́нїю, / ѹ҆ме́ршыѧ ѿ мра́чныхъ ѹ҆до́лїй, / жизнода́вецъ воскр҃си́въ всѣ́хъ хрⷭ҇то́съ бг҃ъ, / воскрⷭ҇нїе подадѐ человѣ́ческомꙋ ро́дꙋ: / є҆́сть бо всѣ́хъ сп҃си́тель, / воскрⷭ҇нїе и҆ живо́тъ, и҆ бг҃ъ всѣ́хъ.
Гдⷭ҇и поми́лꙋй, в҃і.
И҆ мл҃твꙋ: Всест҃а́ѧ трⷪ҇це, є҆диносꙋ́щнаѧ держа́во, нераздѣ́льное црⷭ҇тво, всѣ́хъ бл҃ги́хъ вина̀, бл҃говоли́ же и҆ ѡ҆ мнѣ̀ грѣ́шнѣмъ, ѹ҆твердѝ, вразꙋмѝ се́рдце моѐ, и҆ всю̀ мою̀ ѿимѝ скве́рнꙋ. просвѣтѝ мою̀ мы́сль, да вы́нꙋ сла́влю, пою̀ и҆ покланѧ́юсѧ, и҆ глаго́лю: є҆ди́нъ ст҃ъ, є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь.
Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Бл҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ѹ҆стѣ́хъ мои́хъ. ѡ҆ гдⷭ҇ѣ похва́литсѧ дꙋша̀ моѧ̀, да ѹ҆слы́шатъ кро́тцыи, и҆ возвеселѧ́тсѧ. возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ. взыска́хъ гдⷭ҇а, и҆ ѹ҆слы́ша мѧ̀, и҆ ѿ всѣ́хъ скорбе́й мои́хъ и҆зба́ви мѧ̀. пристꙋпи́те къ немꙋ̀, и҆ просвѣти́тесѧ, и҆ ли́ца ва̑ша не постыдѧ́тсѧ. се́й ни́щїй воззва̀, и҆ гдⷭ҇ь ѹ҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀. ѡ҆полчи́тсѧ а҆́гг҃лъ гдⷭ҇нь ѻ҆́крестъ боѧ́щихсѧ є҆гѡ̀, и҆ и҆зба́витъ и҆̀хъ. вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ѹ҆пова́етъ на́нь. бо́йтесѧ гдⷭ҇а всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀. бога́тїи ѡ҆бнища́ша и҆ взалка́ша, взыска́ющїи же гдⷭ҇а не лиша́тсѧ всѧ́кагѡ бл҃га. прїиди́те ча̑да, послꙋ́шайте менѐ, стра́хꙋ гдⷭ҇ню наꙋчꙋ̀ ва́съ. кто́ є҆сть человѣ́къ, хотѧ́й живо́тъ, любѧ́й дни̑ ви́дѣти бл҃ги; ѹ҆держѝ ѧ҆зы́къ тво́й ѿ ѕла̀, и҆ ѹ҆стнѣ̀ твоѝ є҆́же не глаго́лати льстѝ. ѹ҆клони́сѧ ѿ ѕла̀, и҆ сотворѝ бл҃го: взыщѝ ми́ра и҆ поженѝ и҆̀. ѻ҆́чи гдⷭ҇ни на пра́вєдныѧ, и҆ ѹ҆́ши є҆гѡ̀ въ мл҃твꙋ и҆́хъ: Лице́ же гдⷭ҇не на творѧ́щыѧ ѕла̑ѧ, є҆́же потреби́ти ѿ землѝ па́мѧть и҆́хъ. воззва́ша пра́веднїи, и҆ гдⷭ҇ь ѹ҆слы́ша и҆́хъ, и҆ ѿ всѣ́хъ скорбе́й и҆́хъ и҆зба́ви и҆̀хъ. бли́зъ гдⷭ҇ь сокрꙋше́нныхъ се́рдцемъ, и҆ смирє́нныѧ дꙋ́хомъ сп҃се́тъ. мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. храни́тъ гдⷭ҇ь всѧ̑ кѡ́сти и҆́хъ, ни є҆ди́на ѿ ни́хъ сокрꙋши́тсѧ. сме́рть грѣ́шникѡвъ люта̀, и҆ ненави́дѧщїи пра́веднаго прегрѣша́тъ. и҆зба́витъ гдⷭ҇ь дꙋ́шы ра̑бъ свои́хъ, и҆ не прегрѣша́тъ всѝ ѹ҆пова́ющїи на него̀.
Та́же: Досто́йно є҆́сть ꙗ҆́кѡ вои́стиннꙋ, / блажи́ти тѧ̀ бцⷣꙋ, / приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. / честѣ́йшꙋю херꙋв‡мъ, и҆ сла́внѣйшꙋю без̾ сравне́нїѧ сераф‡мъ, / без̾ и҆стлѣ́нїѧ бг҃а сло́ва ро́ждшꙋю, / сꙋ́щꙋю бцⷣꙋ тѧ̀ велича́емъ.
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ д¦ꙋ, и҆ ны́нѣ и҆ при́снѡ и҆ во вѣ́ки вѣкѡ́въ. а҆ми́нь.
Гдⷭ҇и поми́лꙋй. [Три́жды.]
Гдⷭ҇и бл҃гословѝ.
Гдⷭ҇и і҆и҃се хрⷭ҇тѐ сн҃е бж҃їй, воскресы́й и҆з̾ ме́ртвыхъ, моли́твами пречⷭ҇тыѧ своеѧ̀ мт҃ре, ст҃ы́хъ сла́вныхъ и҆ всехва́льныхъ а҆пⷭ҇лъ, прпⷣбныхъ и҆ бг҃оно́сныхъ ѻ҆ц҃ъ на́шихъ, и҆ всѣ́хъ ст҃ы́хъ, спасѝ на́съ, ꙗ҆́кѡ бла́гъ и҆ чл҃вѣколю́бецъ. а҆ми́нь.
Вели́каго господи́на и҆ ѻ҆тца̀ на́шего и҆́мⷬ҇къ, / ст҃ѣ́йшаго патрїа́рха моско́вскаго и҆ всеѧ̀ рꙋсѝ, / и҆ господи́на на́шего преѡсвѧще́нѣйшего и҆́мⷬ҇къ, / митрополі́та [и҆лѝ а҆рхїепⷭ҇кпа, и҆лѝ є҆пⷭ҇кпа є҆гѡ́же є҆́сть ѡ҆бласть], / бг҃охрани́мꙋю странꙋ̀ на́шꙋ рѡссі́йскꙋю, / настоѧ́телѧ, бра́тїю и҆ прихо́жанъ ст҃а́гѡ храма сегѡ̀, / и҆ всѧ̑ правосла́вныѧ хрⷭ҇тїа́ны, / гдⷭ҇и, сохранѝ и҆̀хъ на мно́гаѧ лѣ̑та.