(Можно читать, можно пропустить и начинать с припева:)
Хор: Ирмос: Вои́стинну Богоро́дицу Тя испове́дуем,/ спасе́ннии Тобо́ю, Де́во чи́стая,// с безпло́тными ли́ки Тя велича́юще.
Припев: Святи́и апо́столи, моли́те Бо́га о нас.
Исто́чницы спаси́тельныя воды́ я́вльшеся апо́столи, иста́явшую ду́шу мою́ грехо́вною жа́ждою ороси́те.
Пла́вающаго в пучи́не поги́бели и в погруже́нии уже́ бы́вша Твое́ю десни́цею, я́коже Петра́, Го́споди, спаси́ мя.
Я́ко со́ли, вку́сных су́ще уче́ний, гни́льство ума́ моего́ изсуши́те и неве́дения тьму отжени́те.
Припев: Пресвята́я Богоро́дице, спаси́ нас.
Богоро́дицей: Ра́дость я́ко роди́вшая, плач мне пода́ждь, и́мже Боже́ственное утеше́ние, Влады́чице, в бу́дущем дни обрести́ возмогу́.