Ирмос: Несть свят, якоже Ты, Господи Боже мой, вознесши рог верных Твоих, Блаже, и утвердивый нас на камени исповедания Твоего.
Яко блудный сын приидох и аз, Щедре, житие мое все иждивый, во отшествии расточих богатство, еже дал ми еси, Отче: приими мя, кающагося, Боже, и помилуй мя.
Объятия ныне Отеческая простер, приими, Господи, и мене, якоже блуднаго, Щедре, яко да благодарно прославлю Тя.
Слава Отцу и Сыну и Святому Духу.
Слава Тебе, не погубившему мя доселе; слава Тебе, потерпевшему согрешения моя! Но приими мя, обращающагося, Благоутробне Отче, Сыне Единородный, Душе Святый, Создателю и Господи мой, и помилуй мя.
И ныне и присно и во веки веков. Аминь.
На мне, Боже, показав всю благостыню, презри моих множество согрешений, яко Благодетель, Божественными Матере Твоея мольбами.