Гдⷭ҇и і҆и҃се хрⷭ҇тѐ сн҃е бж҃їй, ра́ди чⷭ҇тнѣ́йшїѧ мт҃ре твоеѧ̀, и҆ безпло́тныхъ твои́хъ а҆́гг҃лъ, прⷪ҇ро́ка же и҆ п®те́чи и҆ крⷭ҇ти́телѧ твоегѡ̀, бг҃оглаго́ливыхъ же а҆пⷭ҇лъ, свѣ́тлыхъ и҆ добропобѣ́дныхъ мч҃нкъ, прпⷣбныхъ и҆ бг҃оно́сныхъ ѻ҆тє́цъ, и҆ всѣ́хъ ст҃ы́хъ мл҃твами, и҆зба́ви мѧ̀ настоѧ́щагѡ ѡ҆бстоѧ́нїѧ бѣсо́вскагѡ. Є҆́й, гдⷭ҇и мо́й и҆ тво́рче, не хотѧ́й сме́рти грѣ́шнагѡ, но ꙗ҆́коже ѡ҆брати́тисѧ и҆ жи́вꙋ бы́ти є҆мꙋ̀, да́ждь и҆ мнѣ̀ ѡ҆браще́нїе ѻ҆каѧ́нномꙋ и҆ недосто́йномꙋ: и҆зми́ мѧ ѿ ѹ҆́стъ па́гꙋбнагѡ ѕмі́ѧ, зїѧ́ющагѡ пожре́ти мѧ̀, и҆ свестѝ во а҆́дъ жи́ва. Є҆́й, гдⷭ҇и мо́й, ѹ҆тѣше́нїе моѐ, и҆́же менє̀ ра́ди ѻ҆каѧ́ннагѡ въ тлѣ́ннꙋю пло́ть ѡ҆болкі́йсѧ, и҆сто́ргни мѧ̀ ѿ ѻ҆каѧ́нства, и҆ ѹ҆тѣше́нїе пода́ждь дꙋшѝ мое́й ѻ҆каѧ́ннѣй. Всадѝ въ се́рдце моѐ твори́ти твоѧ̑ повелѣ̑нїѧ, и҆ ѡ҆ста́вити лꙋка̑ваѧ дѣѧ̑нїѧ, и҆ полꙋчи́ти бл҃жє́нства твоѧ̑: на тѧ́ бо гдⷭ҇и ѹ҆пова́хъ, сп҃си́ мѧ.