О святый Архангеле Божий Гаврииле, присно предстояй престолу Всевышняго, прерадостный благовестниче и усердный споспешниче нашего спасения! С свойственным тебе милосердием приими сие хвалебное пение, от нас недостойных тебе приносимое. Исправи молитвы нашя, и принеси я яко фимиам на небесный олтарь кадильный: озари умы нашя светом познания таин спасительныя веры нашея: воспламени сердца наша любовию ко Христу Спасителю нашему, обрати и укрепи желания наша на спасительный путь Евангельских Его заповедей: да в сем веце тихо и благочестно поживем во славу Божию, в будущем же не лишимся вечнаго Царствия Божия, еже получити да сподобимся благодатию Христа Бога нашего, ходатайством Пречистыя Его Матери, Пренепорочныя Девы Марии и твоими многомощными ко Господу Богу о нас молитвами, и да прославим с тобою и прочими безплотными силами небесными и всеми святыми Единаго в Троице славимаго Бога, Отца и Сына и Святаго Духа, ныне и присно и во веки веков.