Возсїѧ́лъ є҆сѝ свѣ́тъ живо́тный, и҆збавле́нїе носѧ̀ воево́дамъ, непра́веднꙋю сме́рть прїѧ́ти и҆мꙋ́щымъ, тебѐ до́брый па́стырю нїко́лае, призыва́ющымъ, є҆гда̀ вско́рѣ ꙗ҆́вльсѧ во снѣ̀ царе́ви, ѹ҆страши́лъ є҆сѝ є҆го̀, си́хъ же неврежде́нныхъ ѿпꙋсти́ти повелѣ́лъ є҆сѝ. Сегѡ̀ ра́ди съ ни́ми кꙋ́пнѡ и҆ мы̀ бл҃года́рственнѡ вопїе́мъ тѝ:
Ра́дꙋйсѧ, ᲂу҆се́рднѡ призыва́ющымъ тѧ̀ помога́ѧй:
Ра́дꙋйсѧ, ѿ непра́веднагѡ ѹ҆бїе́нїѧ и҆збавлѧ́ѧй.
Ра́дꙋйсѧ, ѿ ле́стныѧ сохранѧ́ѧй клеветы̀:
Ра́дꙋйсѧ, непра́вєдныѧ разрꙋша́ѧй совёты.
Ра́дꙋйсѧ, растерза́ѧй лжꙋ̀ ꙗ҆́кѡ паꙋчи́нꙋ:
Ра́дꙋйсѧ, возноша́ѧй сла́внѡ и҆́стинꙋ.
Ра́дꙋйсѧ, непови́нныхъ ѿ ѹ҆́зъ разрѣше́нїе:
Ра́дꙋйсѧ, и҆ мертвецє́въ ѡ҆живле́нїе.
Ра́дꙋйсѧ, проѧви́телю пра́вды:
Ра́дꙋйсѧ, помрачи́телю непра́вды.
Ра́дꙋйсѧ, ꙗ҆́кѡ тобо́ю непови́ннїи и҆зба́влени ѿ меча̀:
Ра́дꙋйсѧ, ꙗ҆́кѡ тобо́ю наслади́шасѧ свѣ́та.
Ра́дꙋйсѧ, нїко́лае, вели́кїй чꙋдотво́рче.