Гдⷭ҇и і҆и҃се хрⷭ҇тѐ бж҃е на́шъ, мл҃твъ ра́ди пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ, спаси́ мѧ грѣ́шнаго.
҆҆ Моли́тва ѿ ѡ҆скверне́нїѧ:
Гдⷭ҇и бж҃е на́шъ, є҆ди́не бл҃гі́й и҆ чл҃вѣколю́бче, є҆ди́не ст҃ы́й и҆ на ст҃ы́хъ почива́ѧй, и҆́же верхо́вномꙋ твоемꙋ̀ а҆пⷭ҇лꙋ петрꙋ̀ ꙗ҆ви́вый видѣ́нїемъ, ничто́же скве́рно и҆лѝ нечи́сто мнѣ́ти, ѿ тебє̀ сотворе́нныхъ на пи́щꙋ и҆ въ наслажде́нїе человѣ́кѡмъ, и҆ сосꙋ́домъ твои́мъ и҆збра́ннымъ, а҆пⷭ҇ломъ па́ѵломъ, всѧ̑ чи̑ста чи̑стымъ заповѣ́давый: ты̀ са́мъ влⷣко прест҃ы́й, призыва́нїемъ стра́шнагѡ и҆ пречⷭ҇тагѡ твоегѡ̀ и҆́мене, и҆ зна́менїемъ чⷭ҇тна́гѡ и҆ животворѧ́щагѡ крⷭ҇та̀, бл҃гословѝ и҆ ѡ҆чи́сти мѧ̀ раба̀ твоего̀ [и҆́мⷬ҇къ] ѡ҆скве́рншагосѧ ѿ всѧ́кагѡ непрїѧ́зненнагѡ дꙋ́ха, ѿ всѧ́кагѡ мечта́нїѧ и҆ га́да ꙗ҆дови́тагѡ, ѿ всѧ́кагѡ беззако́нїѧ и҆ всѧ́кїѧ ле́сти, ѿ всѧ́кагѡ потво́ра и҆ ѿ всѧ́кїѧ сꙋеты̀, и҆ ѿ всѧ́кагѡ недꙋ́га, и҆ всѧ́кїѧ ꙗ҆́зи, и҆ ѿ всѧ́кагѡ проти́внагѡ ѕлодѣ́йства дїа́волѧ. И҆ ны́нѣ недосто́йнаго менѐ раба̀ твоего̀ [и҆́мⷬ҇къ], сподо́би по твоемꙋ̀ млⷭ҇рдїю слꙋжи́ти пречⷭ҇тымъ твои̑мъ та́йнамъ. И҆ пре́жде ѡ҆чи́сти мѝ дꙋ́шꙋ и҆ тѣ́ло ѿ всѧ́кїѧ скве́рны, и҆ ѡ҆ста́ви всѧ́кое прегрѣше́нїе, во́льное и҆ нево́льное, є҆́же согрѣши́хъ во всѧ̑ дни̑ живота̀ моегѡ̀, дѣ́ломъ, сло́вомъ и҆ помышле́нїемъ, во днѝ и҆ въ нощѝ, и҆ до ны́нѣшнѧгѡ часа̀. И҆ да́ждь мѝ гдⷭ҇и, слꙋже́нїе сїѐ стра́шное нбⷭ҇ныхъ чинѡ́въ, и҆ прича́стїе пречⷭ҇тыхъ твои́хъ та̑инъ, не въ сꙋ́дъ, ни во ѡ҆сꙋжде́нїе, но въ проще́нїе грѣхѡ́въ, и҆ въ д¦а ст҃а́гѡ прише́ствїе, и҆ живо́тъ присносꙋ́щныѧ ра́дости, є҆го́же ѹ҆гото́валъ є҆сѝ и҆́стиннымъ твои̑мъ слꙋже́бникѡмъ. Сохрани́ мѧ, влⷣко всеси́льне, ѿ всѧ́кагѡ грѣха̀ и҆ ѕло́бы, соблюдѝ нескве́рна и҆ непоро́чна ѿ всѧ́кїѧ прока́зы проти́внагѡ дїа́вола: и҆ да́ждь мѝ гдⷭ҇и, слꙋжи́ти тебѣ̀ въ преподо́бїи и҆ пра́вдѣ до послѣ́днѧгѡ днѐ и҆ часа̀ и҆ сконча́нїѧ моегѡ̀: ты́ бо є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ д¦омъ, ны́нѣ и҆ при́снѡ, и҆ во вѣ́ки вѣкѡ́въ. Ґми́нь.
҆҆ Вины̑, и҆̀хже ра́ди приключа́етсѧ во снѣ̀ соблажне́нїе:
Ѡ҆ є҆́же сꙋди́ти и҆́скреннѧго, си́речь бра́та своего̀, є҆́же є҆́сть грѣшно̀ вельмѝ: ѿ высокоꙋ́мїѧ и҆ го́рдости, и҆ то̀ та́кожде грѣшно̀. ѿ многоѧде́нїѧ и҆ питїѧ̀, томꙋ́же прили́чно: ѿ є҆стества̀ без̾ двиза́нїѧ и҆ без̾ мечта́нїѧ и҆злива́етсѧ, ꙗ҆́коже и҆ и҆́на и҆зли̑шїѧ: ѿ сла́бости тѣле́сныѧ, и҆ болѣ́зни нѣ́кїѧ: ѿ за́висти бѣсо́вскїѧ: ꙗ҆̀же сꙋ́ть безгрѣ̑шна ѹ҆̀бо, но ѻ҆ба́че сквє́рна и҆менꙋ́ютсѧ.