Припѣ́въ: Прест҃а́ѧ бцⷣе, сп҃сѝ на́съ.
По́мощи ꙗ҆́же ѿ тебє̀ тре́бꙋющыѧ не пре́зри, дв҃о, пою́щыѧ и҆ превозносѧ́щыѧ тѧ̀ во вѣ́ки.
Припѣ́въ: Прест҃а́ѧ бцⷣе, сп҃сѝ на́съ.
Неможе́нїе дꙋшѝ моеѧ̀ и҆сцѣлѧ́еши, и҆ тѣлє́сныѧ болѣ̑зни, дв҃о: да тѧ̀ просла́влю, чⷭ҇таѧ, во вѣ́ки.
Припѣ́въ: Прест҃а́ѧ бцⷣе, сп҃сѝ на́съ.
И҆сцѣле́нїй бога́тство и҆злива́еши вѣ́рнѡ пою́щымъ тѧ̀, дв҃о, и҆ превозносѧ́щымъ неизрече́нное твоѐ ржⷭ҇тво̀.
Припѣ́въ: Прест҃а́ѧ бцⷣе, сп҃сѝ на́съ.
Напа́стей ты̀ прило́ги ѿгонѧ́еши, и҆ страсте́й нахо́ды, дв҃о: тѣ́мже тѧ̀ пое́мъ во всѧ̑ вѣ́ки.